അഞ്ജു അഷറഫ്-
കൊച്ചി:
ഇരുപത്തിയഞ്ചാമത് ഐ എഫ് എഫ് കെ രാജ്യാന്തര ചലച്ചിത്ര മേളയുടെ ഓര്ഗനൈസിംഗ് കമ്മിറ്റി ഓഫീസ് എറണാകുളത്ത് പ്രശസ്ത സംവിധായകന് ജോഷി ഉദ്ഘാടനം ചെയ്തു. ചലച്ചിത്ര സാങ്കേതിക പ്രവര്ത്തകരുടെ സാംസ്കാരിക സംഘടനയായ മാക്ടയുടെ എറണാകുളം നോര്ത്തിലുള്ള ഓഫീസ് കെട്ടിടത്തിലാണ് IFFK യുടെ ഓര്ഗനൈസിംഗ് കമ്മിറ്റി ഓഫീസ് പ്രവര്ത്തിക്കുക.
ഉദ്ഘാടനചടങ്ങില് കൊച്ചി മേയര് അഡ്വ. എം. അനില് കുമാര്, അമ്മ ജന. സെക്രട്ടറി ഇടവേള ബാബു, മാക്ട ചെയര്മാന് ജയരാജ്, ജന. സെക്രട്ടറി സുന്ദര്ദാസ്, നടന് ജോജു ജോര്ജ് ഐ.എഫ്.എഫ്.കെ പ്രതിനിധി സജിതാ മഠത്തില്, ഷിബു ചക്രവര്ത്തി, എസ്.എന് സ്വാമി, സോഹന് സീനുലാല്, എം.പത്മകുമാര്, സലാം ബാപ്പു, ബിജിബാല്, ബാദ്ഷ, ഡിക്സണ്, ഗായത്രി അശോകന്, എ.കെ സന്തോഷ്, സാബു പ്രവദ, കോളിന്സ്, എ.എസ് ദിനേശ് തുടങ്ങിയവര് പങ്കെടുത്തു. ഫെബ്രുവരി 17 മുതല് 21 വരെയാണ് കൊച്ചിയില് മേള നടക്കുക.
25വര്ഷത്തെ ഐ എഫ് എഫ് കെയുടെ ചരിത്രത്തില് ഇത് രണ്ടാം തവണയാണ് കൊച്ചിയില് മേള സംഘടിപ്പിക്കുന്നത്. 25 വര്ഷം മുമ്പ് കൊച്ചിയില് മേളയുടെ തുടക്കംകുറിച്ചത് മാക്ടയുടെ സഹകരണത്തോടെയായിരുന്നു. ഇപ്പോള് കോവിഡിന്റെ പശ്ചാത്തലത്തില് നാല് മേഖലയായിട്ടാണ് നടത്തുന്നതെങ്കില് പോലും മാക്ടയുടെ വലിയ സഹകരണത്തോടെയാണ് ഐ എഫ് എഫ് കെയുടെ പ്രവര്ത്തനം ആരംഭിച്ചിട്ടുള്ളത്.
ഉദ്ഘാടന ചടങ്ങില് അധ്യക്ഷത വഹിച്ച കൊച്ചിന് കോര്പ്പറേഷന് മേയര് അനില്കുമാര് ഐ എഫ് എഫ് കെയ്ക്ക് നഗരസഭയുടെ പൂര്ണ്ണ പിന്തുണ വാഗ്ദാനം ചെയ്തു. കൊച്ചിയെ ഏറ്റവും വലിയ സാംസ്കാരിക തലസ്ഥാനമാക്കി മാറ്റുമെന്നും ഉദ്ഘാടനപ്രസംഗത്തില് മേയര് പറഞ്ഞു.
ഐഎഫ് എഫ് കെയുടെ എറണാകുളത്തെ പ്രവര്ത്തന കമ്മിറ്റികളെക്കുറിച്ചും അതിലെ അംഗങ്ങളെ കുറിച്ചുമെല്ലാം ചലച്ചിത്ര അക്കാദമി അംഗമായ സജിത മഠത്തില് വിശദീകരിച്ചു.
മാക്ടയുടെ ഏറ്റവും വലിയ ഉത്സവ ആഘോഷമാണ് കൊച്ചിയില് നടക്കാന് പോകുന്ന ഐ എഫ് എഫ് കെ ചലച്ചിത്ര മേളയെന്ന് മാക്ട ചെയര്മാനും സംവിധായകനുമായ ജയരാജ് പറഞ്ഞു. നാലിടങ്ങളിലായിട്ടാണ് മേള നടക്കുന്നതെങ്കിലും ഇതൊരു മത്സരം അല്ല. സിനിമ എല്ലാവരിലേക്കും എത്തുന്നുവെന്ന ശുഭസൂചകമായി ഇതിനെ കാണാമെന്നും ജയരാജ് പറഞ്ഞു.
ധാരാളം ചലച്ചിത്രപ്രവര്ത്തകര് താമസിക്കുന്ന ഇടമാണ് കൊച്ചി. സിനിമയുടെ ഹബ്ബായി മാറിക്കൊണ്ടിരിക്കുന്ന കൊച്ചിയിലാണ് ഐഎഫ്എഫ്കെ പോലുള്ള വലിയ മേളകള് നടക്കേണ്ടതെന്ന് അമ്മയുടെ ജനറല് സെക്രട്ടറി ഇടവേള ബാബു പറഞ്ഞു.