അഞ്ജു അഷറഫ്-
കൊച്ചി:
പോയ വര്ഷം നമ്മോട് വിട പറഞ്ഞ ചലച്ചിത്ര രംഗത്തെ പ്രമുഖര്ക്ക് ഇരുപത്തിയഞ്ചാമതു രാജ്യാന്തര ചലച്ചിത്ര മേളയില് ആദരമര്പ്പിച്ചു.
മേളയുടെ രണ്ടാം ഘട്ടത്തിന് വേദിയായ കൊച്ചിയില് വെച്ചാണ് അനുസ്മരണ ചടങ്ങ് സംഘടിപ്പിച്ചത്. മലയാളത്തിലെ പ്രശസ്ത തിരക്കഥാകൃത്തും സംവിധായകനുമായ സച്ചി, അഭിനേതാവ് അനില് നേടുമങ്ങാട് എന്നിവരെ സംവിധായകന് രഞ്ജിത്ത് അനുസ്മരിച്ചു.
മനസ്സില് ജനിച്ച കഥയെ ഖനനം ചെയ്തുകൊണ്ടുള്ളതായായിരുന്നു സച്ചിയുടെ യാത്രകളെന്ന് രഞ്ജിത്ത് അനുസ്മരണ പ്രഭാഷണത്തില് ഓര്ത്തു.
രാജ്യാന്തര ചലച്ചിത്ര മേളകളിലൂടെ തന്നെ മലയാളി പ്രേക്ഷകര്ക്ക് സുപരിചിതരായ കിം കി ദുക്, ഫെര്ണാണ്ടസ് സൊളാനസ്, സൗമിത്ര ചാറ്റര്ജി ഓസ്ക്കാര് ഇന്ത്യയിലേക്കെത്തിച്ച വസ്ത്രാലങ്കാരിക ഭാനു അത്തയ്യ എന്നീവരെ അനുസ്മരിച്ചു കൊണ്ട് അക്കാദമി വൈസ് ചെയര്പേഴ്സണ് ബീന പോള് സംസാരിച്ചു. അന്തരിച്ച സംഗീതജ്ഞന് എം.കെ അര്ജുനന് മാസ്റ്ററെ ഷിബു ചക്രവര്ത്തി അനുസ്മരിച്ചു. 'കരി', 'സൂഫിയും സുജാതയും' എന്നീ ചിത്രങ്ങളുടെ സംവിധായകന് ഷാനവാസ് നരണിപുഴയെ അനുസ്മരിച്ചു സംഗീത സംവിധായകന് സുദീപ് പലനാട് സംസാരിച്ചു.
കോവിഡിന് കീഴടങ്ങിയ സംഗീതജ്ഞന് എസ് പി ബാലസുബ്രമണ്യത്തെയും കവി അനില് പനച്ചൂരാനെയും അനുസ്മരിച്ചു സംഗീത സംവിധയകാന് ബിജിബാല് സംസാരിച്ചു. പ്രശസ്ത അഭിനേതാക്കളായ ഇര്ഫാന് ഖാന്, ഋഷി കപൂര് എന്നിവരെയും സമ്മേളനം അനുസ്മരിച്ചു.
കെ.ബി.വേണു രചിച്ച 'കിം കി ദുക് ; മൗനവും ഹിംസയും' എന്ന പുസ്തകത്തിന്റെ രണ്ടാം പതിപ്പ് ബിജിബാലിന് നല്കികൊണ്ട് സംവിധയകാന് രഞ്ജിത് പ്രകാശനം ചെയ്തു. ഷാനവാസ് നരണിപ്പുഴയുടെ 'കരി' എന്ന തിരക്കഥയുടെ പ്രകാശനം സംവിധയകാന് സലിം അഹമ്മദിന് നല്കികൊണ്ട് അക്കാദമി ചെയര്മാന് കമല് നിര്വഹിച്ചു.
പുസ്തക പ്രകാശനത്തിന് ശേഷം ഷാനവാസ് നരണിപുഴയയുടെ 'കരി' എന്ന ചിത്രം പ്രദര്ശിപ്പിച്ചു.