അഞ്ജു അഷറഫ്-
കൊച്ചി:
ലോകമൊട്ടാകെ വലിയ പ്രതിസന്ധിനേരിടുന്ന ഈ കാലത്തും സിനിമ എന്ന മാധ്യമത്തോടുള്ള സമൂഹത്തിന്റെ ഇഷ്ടവും മാധ്യമത്തിന്റെ ശക്തിയും വിളിച്ചോതുന്നതായിരുന്നു 25ആമത് ഇന്റര്‍നാഷണല്‍ ഫിലിം ഫെസ്റ്റിവല്‍ ഓഫ് കേരള കൊച്ചി എഡിഷന്റെ ഉദ്ഘാടന ചടങ്ങ്.
എല്ലാ മനുഷ്യരുടെയും ഇഷ്ടവിനോദമായി വീട്ടിലും മൊബൈലിലും ഈ കോവിഡ് കാലയളവിലും സിനിമ ഉണ്ടായിരുന്നുവെന്ന് ഉദ്ഘാടന ചടങ്ങില്‍ ചലച്ചിത്ര അക്കാദമി ചെയര്‍മാന്‍ കമല്‍ പറഞ്ഞു. ഇക്കാലയളവില്‍ ഏറ്റവും കൂടുതല്‍ സിനിമയെ ജീവിതത്തോട് ചേര്‍ത്ത് നിര്‍ത്തിയ ലോകത്തെ ഏറ്റവും വലിയ സമൂഹം മലയാളികളുടേതായിരിക്കും.
വിവാദങ്ങളോ ബഹിഷ്‌കരണങ്ങളോ ചലച്ചിത്രോല്‍സവത്തെ തളര്‍ത്തില്ലെന്നും ആരുടെ അസാന്നിധ്യവും മേളയ്ക്ക് പ്രതിസന്ധി സൃഷ്ടിക്കില്ലെന്നും അദ്ദേഹം പറഞ്ഞു. തിരുവനന്തപുരത്ത് നടന്ന മേളയില്‍ തിയേറ്ററിനകത്ത് നിന്ന് ആര്‍ക്കും കോവിഡ് പകര്‍ന്നിട്ടില്ല. ഓരോരുത്തരും കോവിഡ് പ്രോട്ടോക്കോള്‍ ഗൗരവമായി പാലിക്കേണ്ടതുണ്ട്. പുതുതലമുറയുടെ വര്‍ധിച്ച പങ്കാളിത്തമാണ് ഇത്തവണത്തെ ചലച്ചിത്രോല്‍സവത്തിന്റെ വലിയ കരുത്ത്. പ്രതിസന്ധികളെയും പ്രശ്‌നങ്ങളെയും അതിജീവിച്ചുകൊണ്ട് നില്‍ക്കുന്ന മഹത്തായ കലാരൂപമാണ് സിനിമ. തിയേറ്ററുകള്‍ അടഞ്ഞു കിടക്കുമ്പോഴും സിനിമ ആസ്വദിക്കാന്‍ കഴിയുന്നു എന്നതും ശ്രദ്ധേയമാണ്. ഫെബ്രുവരി 10 ന് തിരുവനന്തപുരത്ത് മുഖ്യമന്ത്രി ശ്രീ പിണറായി വിജയന്‍ ഉദ്ഘാടനം ചെയ്ത മേളയുടെ ആദ്യപതിപ്പ് വിജയകരമായിരുന്നു.
തിരുവനന്തപുരത്തെ കൊച്ചിയിലും കാണാന്‍ കഴിയുന്നുണ്ട്. മേളക്ക് വന്‍ സ്വീകാര്യതയാണ് ലഭിച്ചിട്ടുള്ളത്.
ഓരോ വര്‍ഷം കഴിയുമ്പോഴും മികച്ച സിനിമകള്‍ ഉണ്ടാകുന്നു. മികച്ച സിനിമകള്‍ നമുക്ക് ഇവിടെ പ്രദര്‍ശിപ്പിക്കാനും കഴിയുന്നു. തിരുവനന്തപുരത്ത് 2500 ഡെലിഗേറ്റ് പാസുകള്‍ നല്‍കി. കൊച്ചിയിലും 2500 പാസുകളാണ് വിതരണം ചെയ്തിട്ടുള്ളത്.
ഐഎഫ്എഫ്‌കെ ആദ്യമായി തുടക്കം കുറിക്കുന്നത് കോഴിക്കോടാണ്.
പിന്നീട് തിരുവനന്തപുരത്ത് അതിനുശേഷം 99 കൊച്ചിയില്‍ വന്നു. 21 വര്‍ഷത്തിന് ശേഷം ആണ് കൊച്ചിയില്‍ വീണ്ടും ഐഎഫ്എഫ്‌കെ രാജ്യാന്തര ചലച്ചിത്രോത്സവം സംഘടിപ്പിക്കുന്നത്. 98 ലാണ് ചലച്ചിത്ര അക്കാദമി സ്ഥാപിക്കുന്നത്. ഷാജി എന്‍ കരുണ്‍ ആയിരുന്നു അന്നത്തെ ചെയര്‍മാന്‍. അക്കാദമി സ്ഥാപിച്ചതിനു ശേഷം ഉള്ള ആദ്യത്തെ ഐഎഫ്എഫ്‌കെ രാജ്യന്തര മേള 99 ല്‍ കൊച്ചിയിലാണ് നടന്നത്.
ഇപ്പോഴത്തെ കമ്മിറ്റി നിലവില്‍ വരുന്നത് 2016 ലാണ്. ആദ്യവര്‍ഷം നന്നായി നടന്നു പിന്നീടുള്ള വര്‍ഷങ്ങളില്‍ ഓരോരോ പ്രശ്‌നങ്ങളെ അതി ജീവിച്ചാണ് മേള മുന്നോട്ട് പോയത്. സര്‍ക്കാരിന്റെയും മുഖ്യമന്ത്രിയുടെയും ഇച്ഛാശക്തികൊണ്ട് മാത്രമാണ് മേള നടത്താന്‍ കഴിഞ്ഞത്. മേളയുടെ 25 വര്‍ഷം എന്നത് ചെറിയ കാലയളവല്ല. ഒരു തലമുറ മാറ്റം തന്നെ സംഭവിച്ചിട്ടുണ്ടെന്നും ചെയര്‍ മാന്‍ കമല്‍ പറഞ്ഞു.
ഓണ്‍ലൈനിലൂടെ സാംസ്‌കാരിക വകുപ്പ് മന്ത്രി എ കെ ബാലന്‍ ഉദ്ഘാടനം ചെയ്തു.
ചലച്ചിത്രമേള രജത ജൂബിലി ആഘോഷിക്കുന്നതിന്റെ ഭാഗമായി മുതിര്‍ന്ന സംവിധായകന്‍ കെ ജി ജോര്‍ജ് തെളിച്ച തിരിനാളം കഴിഞ്ഞ പത്ത് വര്‍ഷത്തിനിടയില്‍ ദേശീയഅന്തര്‍ദേശീയ സംസ്ഥാന തലങ്ങളില്‍ മികവിനുള്ള പുരസ്‌കാരങ്ങള്‍ നേടിയ ഗീതു മോഹന്‍ദാസ്, സുരാജ് വെഞ്ഞാറമൂട്, സുരഭി ലക്ഷ്മി, ശ്യാം പുഷ്‌കരന്‍, ലിസ്റ്റിന്‍ സ്റ്റീഫന്‍, ആഷിക് അബു, റഫീഖ് അഹമ്മദ്, വിധു വിന്‍സെന്റ്, വിനായകന്‍, റിമ കല്ലിങ്കല്‍, സുരേഷ് കൊല്ലം, നിമിഷ സജയന്‍, ജോജു ജോര്‍ജ്ജ്, സിത്താര കൃഷ്ണകുമാര്‍, സൗബിന്‍ ഷാഹിര്‍, സമീറ സനീഷ്, വിജയ് ബാബു, മണികണ്ഠന്‍ ആചാരി, രഞ്ജിത്ത് അമ്പാടി, എഡിറ്റര്‍ കൃഷ്ണദാസ്, ക്യാമറാമാന്‍ മനീഷ് മാധവന്‍, സ്വാസിക, അന്നാ ബെന്‍ എന്നീ 24 പ്രതിഭകള്‍ കെജി ജോര്‍ജ് കൊളുത്തിയ തിരിനാളം ഏറ്റെടുത്തു ദീപം തെളിച്ചത്തോടെ 25 വര്‍ഷത്തെ സുവര്‍ണ്ണനിമിഷങ്ങള്‍ അടയാളപ്പെടുത്തുകയായിരുന്നു.
സെക്രട്ടറി സി. അജോയ് ചന്ദ്രന്‍ സ്വാഗതം ആശംസിച്ച ചടങ്ങില്‍ കൊച്ചി മേയര്‍ എം അനില്‍കുമാര്‍ അധ്യക്ഷനായിരുന്നു.
രാജ്യാന്തര ചലച്ചിത്രമേള അടുത്ത അഞ്ചുവര്‍ഷവും കൊച്ചിയില്‍ തുടരുമെന്ന് കൊച്ചി കോര്‍പ്പറേഷന്‍ മേയര്‍ അഡ്വ. എം.അനില്‍കുമാര്‍ നിറഞ്ഞ കയ്യടികള്‍ക്കിടയില്‍ പ്രഖ്യാപിച്ചു.
ഈ മേളയില്‍ എത്തിയിട്ടില്ലാത്തവരും ഇപ്പോഴത്തെ ജനപ്രതിനിധികളും ചലച്ചിത്രോല്‍സവത്തെ മുന്നോട്ടുകൊണ്ടുപോകാന്‍ ഒപ്പമുണ്ടാകുമെന്ന് തനിക്കുറപ്പുണ്ടെന്നും അദ്ദേഹം പറഞ്ഞു.
എംഎല്‍എമാരായ എം സ്വരാജ്, കെ ജെ മാക്‌സി, ജോണ്‍ ഫെര്‍ണാണ്ടസ്, ബീനാപോള്‍, സിബി മലയില്‍, സിയാദ് കോക്കര്‍, എം സി ബോബി, ആല്‍വിന്‍ ആന്റണി, ഇടവേള ബാബു, എം ഗോപിനാഥന്‍ നായര്‍ എന്നിവര്‍ ആശംസ പ്രസംഗം നടത്തി. ഒട്ടേറെ ചലച്ചിത്ര പ്രവര്‍ത്തകരും ചലച്ചിത്ര വിദ്യാര്‍ഥികളും പങ്കെടുത്ത ഉദ്ഘാടന ചടങ്ങിന് സജിത മഠത്തില്‍ നന്ദിപറഞ്ഞു.
ഫെസ്റ്റിവല്‍ ബുള്ളറ്റിന്‍ സ്വരാജ് എംഎല്‍എ സംവിധായകന്‍ സിബി മലയിലിന് നല്‍കി പ്രകാശനം ചെയ്തു. ഐ എഫ് എഫ് കെ യുടെ ചരിത്രം അടങ്ങുന്ന വെബ്‌സൈറ്റ് കെ ജി മാക്‌സി എംഎല്‍എ ഉദ്ഘാടനം ചെയ്തു. രജത ജൂബിലിയുടെ ഓര്‍മ്മയ്ക്കായി പുറത്തിറക്കിയ കപ്പ് ജോണ്‍ ഫെര്‍ണാണ്ടസ് എം എല്‍ എ ഇടവേള ബാബുവിന് നല്‍കി പ്രകാശനം ചെയ്തു.
