സി എന്‍ എ
തിരു:
26-ാമത് അന്താരാഷ്ട്ര ചലച്ചിത്രമേളയ്ക്കായി അനന്തപുരിയില്‍ ചലച്ചിത്ര അക്കാദമി മുന്നൊരുക്കങ്ങള്‍ തുടങ്ങി. ഡിസംബര്‍ 10 മുതല്‍ 17 വരെയാണ് മേള നടക്കുക.
എന്നാല്‍, തിരുവനന്തപുരത്ത് മാത്രമായി മേള നടത്തുമെന്ന് ഇതുവരെ ഉറപ്പില്ല. കൊവിഡ് മഹാമാരിയുടെ പശ്ചാത്തലത്തില്‍ സര്‍ക്കാര്‍ അന്തിമ തീരുമാനമെടുക്കുമ്പോഴേ ഇക്കാര്യത്തില്‍ വ്യക്തത വരികയുള്ളൂ എന്ന് ചലച്ചിത്ര അക്കാദമി സെക്രട്ടറി സി അജോയ് പറഞ്ഞു.
കഴിഞ്ഞ വര്‍ഷം നടന്ന 25-ാമത് മേള കൊവിഡ് മഹാമാരിയുടെ പശ്ചാത്തലത്തില്‍ നാല് ഇടങ്ങളിലായാണ് നടത്തിയത്. കൊവിഡ് ഭീതി ഒഴിവാകാത്തതിനാല്‍ ഇക്കുറിയും അതിന് സാധ്യതയുണ്ടെന്നാണ് അറിവ്.
ചിത്രങ്ങളുടെ തെരഞ്ഞെടുപ്പ് പൂര്‍ത്തിയായി. മത്സരവിഭാഗത്തില്‍ ഏഷ്യ, ആഫ്രിക്ക, ലാറ്റിന്‍ അമേരിക്ക തുടങ്ങിയി രാജ്യങ്ങളില്‍ നിന്നുള്ള സിനിമകളാണ് ഇക്കുറി ഉണ്ടാവുക. മലയാള സിനിമ വിഭാഗത്തിലേക്ക് സിനിമകള്‍ സമര്‍പ്പിക്കേണ്ട അവസാന തിയതി ഈ മാസം 30 വരെ നീട്ടിയിട്ടുണ്ട്.
