സി എന്‍ എ
തിരു:
ഇരുപത്തിയാറാമത് കേരള രാജ്യാന്തര ചലച്ചിത്രമേള ഡിസംബര്‍ 10 മുതല്‍ 17 വരെ നടക്കും. സ്ഥിരം വേദിയായ തിരുവനന്തപുരത്ത് മാത്രമായാണ് മേള നടക്കുക. ഡിസംബറില്‍ നിലവിലുള്ള കൊവിഡ് മാനദണ്ഡങ്ങള്‍ പാലിച്ചാകും മേളയുടെ നടത്തിപ്പ്.
കൊവിഡ് പശ്ചാത്തലത്തിലാണ് 26ാമത് രാജ്യാന്തര ചലച്ചിത്ര മേളയ്ക്ക് തിരി തെളിയുന്നത്. ഡിസംബര്‍ 10 മുതല്‍ 17 വരെ തിരുവനന്തപുരം കേന്ദ്രമാക്കിയാണ് മേള സംഘടിപ്പിക്കുന്നത്. കൊവിഡ് വ്യാപനം കണക്കിലെടുത്ത് കഴിഞ്ഞ തവണ തിരുവനന്തപുരം, കൊച്ചി, തലശ്ശേരി പാലക്കാട് എന്നിങ്ങനെ 4 മേഖലകളിലായി ആയിരുന്നു ചലച്ചിത്ര മേള സംഘടിപ്പിച്ചത്.
തിരുവനന്തപുരം കേന്ദ്രമാക്കി നടന്നു വന്നിരുന്ന മേള പല മേഖലകളിലായി വേര്‍പ്പെട്ടത് ഐഎഫ്എഫ്‌കെ പ്രേമികള്‍ക്കും നിരാശയായിരുന്നു. എന്നാല്‍ ഇത്തവണ കരുതലോടെ മേളക്കായി തിരുവനന്തപുരത്ത് ഒന്നിക്കാന്‍ കാത്തിരിക്കുകയാണ് സിനിമാ പ്രേമികള്‍.
ഡിസംബറില്‍ നിലവിലുള്ള കൊവിഡ് മാനദണ്ഡങ്ങള്‍ പാലിച്ചാകും മേളയുടെ നടത്തിപ്പ്. മലയാളം സിനിമകള്‍ സമര്‍പ്പിക്കേണ്ട അവസാന തീയതി: 30 സെപ്റ്റംബര്‍ 2021. മറ്റ് വിഭാഗങ്ങളില്‍ സിനിമകള്‍ സമര്‍പ്പിക്കുന്നതിനുള്ള അവസാന തീയതി: 10 സെപ്റ്റംബര്‍ 2021.
www.iffk.in എന്ന വെബ്‌സൈറ്റ് വഴി ഓണ്‍ലൈനായിട്ടാണ് മേളയിലേക്കുള്ള എന്‍ട്രികള്‍ സമര്‍പ്പിക്കേണ്ടത്. അന്താരാഷ്ട്ര മത്സര വിഭാഗം ഇന്ത്യന്‍ സിനിമ, മലയാള സിനിമ, ലോക സിനിമ എന്നീ വിഭാഗങ്ങളിലേയ്ക്കാണ് സിനിമകള്‍ സമര്‍പ്പിക്കാവുന്നത്. ആഫ്രിക്കന്‍, ലാറ്റിനമേരിക്കന്‍, ഏഷ്യന്‍ രാജ്യങ്ങളില്‍ നിന്നുള്ള ചിത്രങ്ങളാണ് മത്സരവിഭാഗത്തിലേയ്ക്ക് പരിഗണിക്കുകയെന്ന് ചലച്ചിത്ര അക്കാദമി അറിയിച്ചു.
