അഞ്ജു അഷറഫ്-
കൊച്ചി:
ചലച്ചിത്ര വ്യവസായം നേരിടുന്ന പ്രശ്‌നങ്ങളെക്കുറിച്ചും സാമ്പത്തിക പ്രതിസന്ധികളെ കുറിച്ചും കേരള ഫിലിം ചേംബര്‍ പ്രതിനിധികള്‍ സംസ്ഥാന ചീഫ് സെക്രട്ടറിയുമായി നടത്തിയ ചര്‍ച്ച പ്രതീക്ഷക്ക് വക നല്‍കുന്നു.
നിലവില്‍ അനുവദിച്ചിട്ടുള്ള ഇളവുകള്‍ നീട്ടി നല്‍കണമെന്നും സെക്കന്‍ഡ് ഷോ അനുവദിക്കണമെന്നും ആണ് ഫിലിം ചേംബര്‍ പ്രതിനിധികള്‍ മുന്നോട്ടുവച്ച പ്രധാന ആവശ്യങ്ങള്‍. പ്രതിനിധി സംഘം മുന്നോട്ട് വെച്ച കാര്യങ്ങള്‍ ചീഫ് സെക്രട്ടറി അനുഭാവപൂര്‍വ്വം കേള്‍ക്കുകയും ഇക്കാര്യം ബന്ധപ്പെട്ട വകുപ്പ് മന്ത്രിമാരുമായി കൂടിയാലോചിച്ച ശേഷം തിങ്കളാഴ്ചയോടെ പ്രഖ്യാപനം ഉണ്ടായേക്കും.
നിലവില്‍ തീയേറ്ററുകളിലെ സമയക്രമീകരണം രാവിലെ 9 മണി മുതല്‍ രാത്രി ഒമ്പത് മണിവരെയാണ്. പ്രധാന കളക്ഷന്‍ പോയിന്റായ സെക്കന്റ്‌ഷോ ഒഴിവാക്കി കൊണ്ടുള്ളതായിരുന്നു ഈ തീരുമാനം.
അതില്‍ മാറ്റം വരുന്നതോടെ കൂടുതല്‍ സിനിമകള്‍ പ്രദര്‍ശനത്തിനെത്തുകയും മൊത്തത്തില്‍ സിനിമാ മേഖലയ്ക്ക് പുതിയൊരു ഉണര്‍വ്വു നല്‍കുകയും ചെയ്യും. ചലച്ചിത്ര വ്യവസായ മേഖലയുടെ ഉന്നമനം ലക്ഷ്യമിട്ടുകൊണ്ട് അനുകൂലമായ തീരുമാനങ്ങള്‍ സര്‍ക്കാരിന്റെ ഭാഗത്തുനിന്നു ഉണ്ടാവുമെന്ന് തന്നെയാണ് എല്ലാവരുടെയും പ്രതീക്ഷ.
