അഞ്ജു അഷറഫ്-
തിരു:
കേരളത്തിലെ ആദ്യത്തെ 4DX സിനിമ തിയേറ്റര് തിരുവനന്തപുരത്ത് പ്രവര്ത്തനമാരംഭിക്കുന്നു.
തിരുവനന്തപുരം ലുലു മാളില് പി വി ആര് ഒരുക്കുന്ന 12 സ്ക്രീനുകളില് ഒന്നാണ് 4DX സ്ക്രീന്. ഇന്ത്യയില് ഇതുവരെ ഡല്ഹി, മുംബൈ, ബംഗളൂരു, ഹൈദരാബാദ് എന്നിവിടങ്ങളിലായി മൊത്തം അഞ്ചു 4DX തിയേറ്ററുകളാണുള്ളത്. നിലവിലെ സാങ്കേതിക സംവിധാനങ്ങളെ അപേക്ഷിച്ച് ഏറ്റവും മികച്ചതും വലുപ്പമേറിയതുമായ സ്ക്രീന് ആയിരിക്കും തിരുവനന്തപുരത്ത് സജ്ജമാകുന്നത്.
ലുലു മാള് ഉദ്ഘാടനം ചെയ്യുന്നതിനൊപ്പം തന്നെ പിവിആര് തിയേറ്ററുകളും തുറക്കുമെന്നാണ് അറിയുന്നത്.
നിലവില് ധാരാളം സിനിമാ തീയേറ്ററുകളുള്ള നഗരമാണ് തിരുവനന്തപുരം. ഇതോടെ കേരളത്തില് ഏറ്റവും കൂടുതല് സിനിമ തിയേറ്ററുള്ള ജില്ലയായി തിരുവനന്തപുരം മാറുകയാണ്.
ദക്ഷിണ കൊറിയന് സിനിമ ശൃംഖലയായ സി ജെ സി ജി വി യുടെ അനുബന്ധ സ്ഥാപനമായ സി ജെ 4 ഡിപ്ലക്സ്സ് വികസിപ്പിച്ചെടുത്ത ഫോര് ഡി ഫിലിം ഫോര്മാറ്റാണ് 4DX.
ചലനാത്മക സീറ്റുകള്, കാറ്റ്, സ്ട്രോബ് ലൈറ്റുകള്, സിമുലേറ്റഡ് സ്നോ, സുഗന്ധം എന്നിവ ഉള്പ്പെടെ വിവിധ പ്രായോഗിക ഇഫക്റ്റുകള് ഉപയോഗിച്ച് സിനിമ ആസ്വദിക്കാന് പ്രേക്ഷകര്ക്ക് കഴിയും എന്നതാണ് ഇതിന്റെ പ്രത്യേകത.
തീയറ്ററില് ഇരുന്ന് സിനിമ കാണുന്ന പ്രേക്ഷകനെ സംബന്ധിച്ചു സ്ക്രീനില് എന്താണോ കാണുന്നത് അത് നേരിട്ട് അനുഭവിച്ചറിയാനും ആസ്വദിക്കാനും കഴിയുന്ന സംവിധാനമാണ് 4DX. സ്ക്രീനില് കാണുന്ന സീനില് കാറ്റു വീശുകയാണെങ്കില് അത് നേരിട്ട് അനുഭവിക്കാന് കഴിയുന്ന പുതിയൊരു ആസ്വാദനതലമാണ് 4DX ഉയര്ത്തുന്നത്. ഫോര് ഡി എക്സിന് വേണ്ടി മാത്രമായി സിനിമ നിര്മ്മിച്ചു തുടങ്ങുന്ന കാലവും വിദൂരമല്ല.
48 നഗരങ്ങളില് 121 മാളുകളിലായി 557 സ്ക്രീനുകള് നിലവില് PVR ഗ്രൂപ്പിന് ഉണ്ട്.