അഞ്ജു അഷറഫ്-
കൊച്ചി:
ദേശീയ ചലച്ചിത്ര പുരസ്‌കാരങ്ങള്‍ പ്രഖ്യാപിച്ചപ്പോള്‍ ഒരേസമയം സന്തോഷവും സങ്കടവും അനുഭവിക്കുകയാണ് മലയാളിയായ സൗണ്ട് മിക്‌സര്‍ ബിബിന്‍ ദേവ്.
താനും റെസൂല്‍ പൂക്കുട്ടിയും ചേര്‍ന്ന് ഒരുക്കിയ തമിഴ് ചിത്രം 'ഒത്ത സെരിപ്പ് സൈസ് 7' എന്ന ചിത്രത്തിലെ റീ റെക്കോര്‍ഡിന് ദേശീയ പുരസ്‌കാരം ലഭിച്ചപ്പോള്‍, അവാര്‍ഡ് പട്ടികയില്‍ പേര് റെസൂല്‍ പൂക്കുട്ടിയുടെ മാത്രം.
സ്വന്തം പ്രയത്‌നം ദേശീയ തലത്തില്‍ അംഗീകരിക്കപ്പെട്ടപ്പോഴും ജീവിതത്തിലെ ഏറ്റവും വലിയ അംഗീകാരങ്ങളിലൊന്ന് ക്ലെറിക്കല്‍ പിഴവുമൂലം നഷ്ടപ്പെടുന്നതിന്റെ നിരാശയിലാണ് ബിബിന്‍ ദേവ്.
അവാര്‍ഡ് പ്രഖ്യാപനം വന്നപ്പോള്‍ തന്നെ ഈ ചിത്രം താനും ബിബിന്‍ ദേവും ചേര്‍ന്നാണ് ചെയ്തതെന്നും ഈ അവാര്‍ഡ് ബിബിന്‍ ദേവിന് അര്‍ഹതപ്പെട്ടതാണെന്നും വ്യക്തമാക്കി റെസൂല്‍ പൂക്കുട്ടി രംഗത്തെത്തിയിരുന്നു. സ്വന്തം പ്രയത്‌നം ദേശീയ തലത്തില്‍ അംഗീകരിക്കപ്പെട്ടതില്‍ സന്തോഷമുണ്ടെന്നും അവാര്‍ഡിന് പേര് നല്‍കിയതില്‍ വീഴ്ച സംഭവിച്ചത് എവിടെയാണെന്ന് പരിശോധിച്ചു വരികയാണെന്നും ബിബിന്‍ ദേവ് പറഞ്ഞു.
എറണാകുളം ജില്ലയിലെ അങ്കമാലി സ്വദേശിയായ ബിബിന്‍ ദേവ് മുംബൈ കേന്ദ്രീകരിച്ചാണ് പ്രവര്‍ത്തിക്കുന്നത്. 'യന്തിരന്‍ 2.0', 'ഒടിയന്‍', 'മാമാങ്കം', 'മാസ്റ്റര്‍പീസ്', 'കമ്മാരസംഭവം' തുടങ്ങി ഒട്ടേറെ ബിഗ് ബജറ്റ് സിനിമകളില്‍ ബിബിന്‍ ദേവ് പ്രവര്‍ത്തിച്ചിട്ടുണ്ട്.
