സി എന് എ-
മുംബൈ:
വിക്രമാദിത്യ മോട്വാന് സംവിധാനം ചെയ്യുന്ന ഹിന്ദി ഭാഷയിലുള്ള ബ്ലാക്ക് കോമഡി ത്രില്ലര് ചിത്രമാണ് 'AK-VS-AK'. അനില് കപൂര്, അനുരാഗ് കശ്യപ് എന്നിവര് എന്നിവര് കേന്ദ്ര കഥാപാത്രങ്ങളെ അവതരിപ്പിക്കുന്നു. AK-VS-AK (അനില് കപൂര് വേര്സസ് അനുരാഗ് കശ്യപ്) എന്ന ചിത്രത്തില് അനില് കപൂര് ധരിച്ചിരിക്കുന്ന വ്യോമസേനയുടെ യൂണിഫോം തെറ്റായാണ് ഉപയോഗിച്ചിരിക്കുന്നതെന്നും ഭാഷ അനുചിതമാണെന്നും ഇത് ഇന്ത്യന് സായുധസേനയിലുള്ളവരുടെ പെരുമാറ്റ മാനദണ്ഡങ്ങളുമായി പൊരുത്തപ്പെടുന്നില്ലെന്നും ചൂണ്ടിക്കാട്ടി ഇന്ത്യന് വ്യോമസേന രംഗത്ത് വരികയും സിനിമയിലെ ചില രംഗങ്ങള് പിന്വലിക്കണമെന്നും ആവശ്യപ്പെട്ടിരിക്കുകയാണ്. ട്വീറ്റിലൂടെയാണ് വ്യോമസേന ഈ കാര്യം അറിയിച്ചത്. സിനിമയുടെ ട്രെയ്ലര് കഴിഞ്ഞ ദിവസം പുറത്തിറങ്ങുകയുണ്ടായി. ബോളിവുഡില് ഇതിനു മുമ്പ് ആരും ചിന്തിക്കാത്തൊരു പ്രമേയവുമായാണ് AK-VS-AK എന്ന ചിത്രം എത്തുന്നത്.
ഒരു പത്രസമ്മേളനത്തിനിടെ അനില് കപൂറും അനുരാഗും തമ്മില് വാക്കേറ്റമുണ്ടാകുന്നതും അനിലിന്റെ മുഖത്തേയ്ക്ക് അനുരാഗ് ദേഷ്യത്തോടെ വെള്ളമൊഴിക്കുകയും ചെയ്യുന്ന ദൃശ്യങ്ങളോടെയാണ് ട്രെയിലര് ആരംഭിക്കുന്നത്. ബോളിവുഡ് താരം സോനം കപൂറിനെ കാണാനില്ല. സൂര്യനുദിക്കുന്നതിന് മുമ്പ് മകളെ കണ്ടെത്താനാണ് അച്ഛനും നടനുമായ അനില് കപൂറിന് ലഭിച്ച സന്ദേശം. എന്നാല് മൂന്ന് നിബന്ധനകളാണ് അദ്ദേഹത്തിന് മുന്നിലുള്ളത്. ഒന്ന് പോലീസിനെ വിളിക്കാനാവില്ല. രണ്ട്, പുറത്ത് നിന്നുള്ള ആരെയും അന്വേഷണത്തിന് കൂട്ടാനാവില്ല. മൂന്ന്, ഒരു ക്യാമറ ഇതെല്ലാം ചിത്രീകരിച്ചു കൊണ്ടേയിരിക്കും. വിചിത്രമെന്ന് തോന്നുന്ന ഇക്കാര്യങ്ങളെല്ലാം യഥാര്ഥത്തില് സംഭവിക്കുന്നതാണോ?, അതോ മുന്കൂട്ടി തയ്യാറാക്കിയ നാടകമാണോ? ഇതിന് പിന്നില് ആരാണ്... ? ഈ ചോദ്യങ്ങളാണ് സിനിമയുടെ ട്രെയ്ലര് ഉയര്ത്തുന്നത്. വിക്രമാദിത്യ മോട്വാന് സംവിധാനം ചെയ്യുന്ന ചിത്രം നെറ്റ്ഫ്ലിക്സിലൂടെ ഡിസംബര് 24നാണു റിലീസ് ചെയ്യുന്നത്.