MM Kamath
കൊച്ചി:
പ്രശസ്ത സിനിമ താരം കലാഭവന് മണിയുടെ ഓര്മ്മയ്ക്കായ്, 2022 ജനുവരി 1ന് അറേബ്യന് ഫാഷന് ജ്വല്ലറിയും സംയുക്തമായി ആറ്റിങ്ങല്, കലാഭവന് മണി സേവന സമിതി സംഘടിപ്പിച്ച സ്മാരക അവാര്ഡ് സിനിമ പി.ആര്.ഒ. എ.എസ്. ദിനേശിന് ലഭിച്ചു.
1997ല് റിലീസായ 'ആറ്റുവേല' എന്ന ചിത്രത്തിന്റെ പി.ആര്.ഒ. വര്ക്ക് ഏറ്റേടുത്തു കൊണ്ടാണ് എ.എസ്. ദിനേശ് മലയാള സിനിമാ രംഗത്ത് സജീവമാകുന്നത്.
പിന്നീട് തമ്പി കണ്ണന്താനം നിര്മ്മിച്ച 'പഞ്ചലോഹം' എന്ന സിനിമയ്ക്ക് വേണ്ടി പി.ആര്.ഒ. ആയി.
സര്ഗം കബീര് നിര്മ്മിച്ച് വിനയന് സംവിധാനം ചെയ്ത മമ്മൂട്ടി ചിത്രമായ 'ദാദാ സാഹിബ്', ജോണി സാഗരിഗ നിര്മ്മിച്ച് വിശ്വനാഥന് സംവിധാനം ചെയ്ത 'ഹരിഹരന് പിള്ള ഹാപ്പിയാണ്' എന്നീ സൂപ്പര് താരം ചിത്രങ്ങളിലൂടെ എ.എസ്.ദിനേശ്, പി ആര് ഒ എന്ന നിലയില് തന്റെതായ ഒരു മേല്വിലാസം ഉണ്ടാക്കി. തുടര്ന്ന് ഏകദേശം ആയിരത്തോളം സിനിമകളില് പി.ആര്.ഒ. ആയ ദിനേശ് ഇപ്പോഴും വളരെ സജീവമാണ്.
സിനിമയുടെ ചിത്രങ്ങളും ഷൂട്ടിങ്ങ് റിപ്പോര്ട്ടും വാരികകളില് എത്തിച്ചു കൊടുക്കുന്ന ആദ്യകാല പി.ആര്.ഒ. ജോലികളില് നിന്നും വ്യത്യസ്തമായി സിനിമയുടെ ടൈറ്റില് അനൗണ്സ്മെന്റ് മുതല് റിലീസിങ്ങും റിവ്യൂ വരെയുള്ള എല്ലാ പബ്ലിക്ക് റിലേഷന്സ് വര്ക്കുകളും ദിനേശ് ചെയ്യുന്നു.
പത്ര ദൃശ്യ മാഗസിനുകള് കൂടാതെ വിവര സാങ്കേതികവിദ്യയുടെ വളര്ച്ചക്കൊപ്പം ഫേസ്ബുക്ക് ഉള്പ്പെടെയുള്ള എല്ലാ സോഷ്യല് മീഡിയകളിലും ന്യൂസ് നെറ്റ്വര്ക്കിംഗ് സൈറ്റുകള് വഴിയും വൈവിധ്യവും സര്ഗ്ഗാത്മകതയുമുള്ള സിനിമാ വിശേഷങ്ങളും വാര്ത്തകളും നല്കുന്ന ദിനേശിന്റെ സ്ഥാനം മലയാള സിനിമയിലെ പി.ആര്.ഒ.മാരില് ആദ്യനിരയിലാണ്.
'സിനിമ പി.ആര്.ഒ. എന്ന നിലയില് ഇത്രയും വര്ഷത്തെ എന്റെ ഔദ്യോഗിക ജീവിതത്തിലെ ഏറ്റവും മഹനീയമായ അതിഗംഭീരമായ പുണ്യ മുഹൂര്ത്തം....
പ്രശസ്ത നടനും സുഹൃത്തുമായ കലാഭവന് മണിയുടെ ഓര്മ്മയ്ക്കായ്, ആറ്റിങ്ങല്, കലാഭവന് മണി സേവന സമിതി സംഘടിപ്പിച്ച സ്മാരക അവാര്ഡ്, പ്രശസ്ത നടനും ആത്മ മിത്രവുമായ ഇന്ദ്രന്സ് എനിക്ക് സമ്മാനിക്കുന്ന പ്രകാശപൂര്ണ്ണമായ സ്നേഹ നിമിഷം...' എന്ന് പി.ആര്.ഒ. എ.എസ്. ദിനേശ് തന്റെ ഫേസ്ബുക്ക് പോസ്റ്റില് കുറിച്ചു.
2004 ല് ജേസി ഫൗണ്ടേഷന് അവാര്ഡ് മുതല് ഇന്സ്പയര് അവാര്ഡ്, ഏഷ്യാവിഷന് അവാര്ഡ്, രാമുകാര്യാട്ട് ഫിലിം അവാര്ഡ്, ക്യാമ്പസ് ചോയ്സ് സിനി അവാര്ഡ്, ശാന്തിദേവി പുരസ്കാരം, ദേശീയ കലാസംസ്കൃതി അവാര്ഡ്, എന്നിങ്ങനെ നിരവധി പുരസ്കാരങ്ങള് പി.ആര്.ഒ. എന്ന നിലയില് എ.എസ്. ദിനേശിന് ലഭിച്ചിട്ടുണ്ട്.