സി എന്‍ എ-
കൊച്ചി:
തന്റെ സിനിമയില്‍ അഭിനയിക്കുന്നത് മലയാളത്തിലെ പ്രഗല്‍ഭരായ അഭിനേതാക്കള്‍ ആണെന്നും അവര്‍ക്ക് അഡ്വാന്‍സ് നല്‍കിയെന്നും അവരുടെ സോഷ്യല്‍ മീഡിയ അക്കൗണ്ടില്‍ എതിരഭിപ്രായക്കാരുടെ കമന്റുകള്‍ വരാതിരിക്കാനാണ് ഇപ്പോള്‍ പേരുകള്‍ പുറത്തുവിടാത്തതെന്നും അലി അക്ബര്‍ പറഞ്ഞു.
താരങ്ങളെ നിശ്ചയിക്കാനും അവര്‍ക്ക് അഡ്വാന്‍സ് കൊടുക്കാനുമായുള്ള ഓട്ടത്തിലായിരുന്നു. '1921' ന്റെ ആദ്യ ഷെഡ്യൂള്‍ ഫെബ്രുവരി 20ന് ആരംഭിക്കുകയാണ്. ഫെബ്രുവരി 2ന് കോഴിക്കോട് വച്ച് പ്രമുഖര്‍ പങ്കെടുക്കുന്ന വേദിയില്‍ സ്വിച്ച് ഓണ്‍ ഉണ്ടാകും. അന്ന് തന്നെ സോംഗ് റിലീസ് ചെയ്യും. സാമ്പത്തികമായി ലക്ഷ്യത്തില്‍ എത്തിയിട്ടില്ലെങ്കിലും മൂന്ന് ഷെഡ്യൂളുകളിലായി ഷൂട്ടിംഗ് നടത്താന്‍ തീരുമാനിച്ചിരിക്കുകയാണ്. 30 ദിവസത്തെ ആദ്യ ഷെഡ്യൂള്‍ വയനാട്ടില്‍ നടക്കും. പിന്നീട് സെറ്റ് വര്‍ക്കിനുശേഷം രണ്ടാമത്തെ ഷെഡ്യൂളും അതിനുശേഷം ഫൈനല്‍ ഷെഡ്യൂളും നടത്തും.
നടീനടന്മാരെ സമീപിച്ചപ്പോള്‍ ഇരുകൈയും നീട്ടിയാണ് അവര്‍ സ്വീകരിച്ചത്. ആര്, എങ്ങനെ എന്നൊക്കെ വഴിയേ പറയാം. മലയാളത്തില്‍ അറിയപ്പെടുന്ന പ്രഗത്ഭരായ ആളുകള്‍ തന്നെയാണ് സിനിമയില്‍ അഭിനയിക്കുന്നത്. അവര്‍ക്കൊക്കെ അഡ്വാന്‍സും കൊടുത്തുകഴിഞ്ഞുവെന്ന് അലി അക്ബര്‍ പറഞ്ഞു.
ആദ്യ ഷെഡ്യൂളിനുള്ള പണമാണ് കൈവശമുള്ളതെന്നും ഇതുവരെ ഒരു കോടിക്ക് മുകളില്‍ ക്രൗഡ് ഫണ്ടിംഗ് വഴി കിട്ടിയെന്നും അദ്ദേഹം വ്യക്തമാക്കി. ഫേസ്ബുക്ക് ലൈവില്‍ എത്തിയാണ് ഷൂട്ടിങ് വിശേഷങ്ങള്‍ പങ്കുവെച്ചത്. '1921 പുഴ മുതല്‍ പുഴ വരെ' എന്ന് പേരിട്ടിരിക്കുന്ന ചിത്രം മലബാര്‍ കലാപത്തെക്കുറിച്ചാണ് പറയുന്നത്. വാരിയംകുന്നത്ത് കുഞ്ഞഹമ്മദ് ഹാജിയുടെ ജീവിതം പറയുന്ന സിനിമ പൃഥ്വിരാജിനെ നായകനാക്കി ആഷിക് അബു പ്രഖ്യാപിച്ചതിനു പിന്നാലെയാണ് അലി അക്ബറും തന്റെ സിനിമ പ്രഖ്യാപിച്ചത്.
