സി.കെ. അജയ് കുമാര്-
ഹൈദരാബാദ്:
ആദ്യ സിനിമയില് അഭിനയിച്ചു തുടങ്ങും മുമ്പേ തന്നെ വാര്ത്താ പ്രാധാന്യം നേടിയ പുതുമുഖ നടിയാണ് അമ്രിന് ഖുറേഷി. പിതാവ് സജിത്ത് ഖുറേഷി പ്രശസ്ത തെലുങ്കു ചലച്ചിത്ര നിര്മ്മാതാവും സംവിധായകനുമാണെന്നത് മാത്രമല്ല അതിനു കാരണം. ഹിന്ദി സിനിമയിലൂടെയുള്ള ഈ ഹൈദരാബാദുകാരിയുടെ അരങ്ങേറ്റം പ്രശസ്ത ബോളിവുഡ് സംവിധായന് രാജ്കുമാര് സന്തോഷിയുടെ 'ബാഡ് ബോയ്' എന്ന സിനിമയിലൂടെയാണെന്നതുമാണ്. മാത്രമല്ല 'ബാഡ് ബോയ്'യുടെ ചിത്രീകരണം തുടങ്ങും മുമ്പേ തന്നെ ആന്റണി ഡിസൂസ സംവിധാനം ചെയ്യുന്ന സിനിമയിലേക്കും കരാര് ചെയ്യപ്പെട്ടു. രണ്ടു മെഗാ ബോളിവുഡ് സിനിമകളില് കരാര് ചെയ്യപ്പെട്ടതോടെ ഉത്തരേന്ത്യന് മാധ്യമങ്ങള് 'ഭാവി ഭാഗ്യ താര' മായിട്ടാണ് അമ്രിന് ഖുറേഷിയെ വിശേഷിപ്പിച്ചു തുടങ്ങിയിരിക്കുന്നത്. അതുകൊണ്ടു തന്നെ ശ്രദ്ധാ കേന്ദ്രമായിരിക്കയാണ് അമ്രിന്.
കഴിഞ്ഞ ദിവസം ആദ്യ ചിത്രത്തിന്റെ മുംബയിലെ ഷൂട്ടിംഗ് കഴിഞ്ഞു അമ്രിന് ഖുറേഷി ജന്മനാടായ ഹൈദരാബാദില് എത്തി. പ്രസ്തുത ചിത്രത്തിന്റെ ഗാന രംഗ ചിത്രീകരണത്തിനായി തന്നെ. ചമയങ്ങളൊന്നുമില്ലാതെ സാധാരണക്കാരിയായി എയര് പോര്ട്ടില് വന്നിറങ്ങിയ അമ്രിനെ സ്ക്രീനില് കാണും മുമ്പേ മീഡിയകളില് കണ്ട മുഖ പരിചയം വെച്ച് ആരാധകര് വട്ടമിട്ടു. അവരുടെ ഫോട്ടോയും വീഡിയോയും തങ്ങളുടെ മൊബൈലില് പകര്ത്തി സമൂഹ മാധ്യമങ്ങളിലൂടെ പ്രചരിപ്പിച്ചു തുടങ്ങി. ചമയങ്ങളില്ലാത്ത നവ താരത്തിന്റെ ചിത്രങ്ങളും വിഡിയോയും വൈറലായിക്കൊണ്ടിരിക്കയാണിപ്പോള്.
തന്റെ കന്നി ചിത്രത്തില് അഭിനയിക്കുന്നതിന്റെ അനുഭവവും താരം പുറത്തിറങ്ങി മാധ്യമങ്ങളുമായി പങ്കു വെച്ചു.
'ഹൈദരാബാദ് എന്റെ ജന്മ സ്ഥലമാണ്. സെക്കന്ദ്രാബാദിലെ ശിവ ശിവാനി സ്കൂളിലാണ് ഞാന് പഠിച്ചത്. അതിനു ശേഷം മുംബയിലെ ആക്റ്റിംഗ് സ്കൂളില് ചേര്ന്ന് അഭിനയം പഠിച്ചു. ബാഡ് ബോയ്സില് അവസരം കിട്ടിയതും നായികയായി അഭിനയിച്ചതും ഓര്ക്കുമ്പോള് സ്വപ്നമാണോ എന്ന് തോന്നി പോകുന്നു. മുംബയില് നിന്നും ജന്മദേശത്തില് നായികയായി മടങ്ങി എത്തിയ ത്രില്ലിലാണ് ഞാന്. ബാഡ്ബോയിയില് മിഥുന് ചക്രവര്ത്തിയുടെ മകന് നാമേഷ് ചക്രവര്ത്തിയാണ് എന്റെ നായകന്. I FEEL very Comfortable with him. തെലുങ്കു തമിഴ് സിനിമകളില് നിന്നും എനിക്ക് ഓഫറുകള് എത്തി തുടങ്ങിയിട്ടുണ്ട്. അതും മനസിന് ഉന്മേഷം നല്കുന്നു. എനിക്ക് മലയാളം ഉള്പ്പെടെ എല്ലാ സൗത്ത് ഇന്ത്യന് ഭാഷാ സിനിമകളിലും അഭിനയിക്കണം. അതാണ് എന്റെ ലക്ഷ്യം.' അമ്രിന് ഖുറേഷി പറഞ്ഞു.