CNA
തിരു:
മലയാള സിനിമ ചരിത്രത്തില്‍ ആദ്യമായി ഏര്‍പ്പെടുത്തിയ മികച്ച വിഷ്വല്‍ എഫക്ട്‌സിനുള്ള 2020 സംസ്ഥാന ചലച്ചിത്ര പുരസ്‌കാരത്തിന് അര്‍ഹരായിരിക്കുകയാണ്
അനീഷും സുമേഷും.
ബഹു. മത്സ്യബന്ധന, സാംസ്‌കാരിക, യുവജനകാര്യ വകുപ്പ് മന്ത്രി ശ്രീ. സജി ചെറിയാന്റെ അധ്യക്ഷതയില്‍ തിരുവനന്തപുരം നിശാഗന്ധി ഓഡിറ്റോറിയത്തില്‍ നടന്ന അവാര്‍ഡ് വിതരണ ചടങ്ങില്‍ അനീഷ് ദയാനന്ദനും സുമേഷ് ഗോപാലനും സര്‍ജാസ് മുഹമ്മദും ചേന്ന് മികച്ച വിഷ്വല്‍ എഫക്ട്‌സിനുള്ള കേരള സംസ്ഥാന ചലച്ചിത്ര അവാര്‍ഡ് ബഹു. മുഖ്യമന്ത്രി ശ്രീ. പിണറായി വിജയന്റെ കയ്യില്‍ നിന്നും ഏറ്റുവാങ്ങി.
എറണാകുളത്തുള്ള ഡിജിബ്രിക്‌സ് എന്റര്‍ടെയിന്‍മെന്റ് പ്രൈവറ്റ് ലിമിറ്റഡ് (Digibricks Entertainment Pvt. Ltd.) എന്ന സ്ഥാപനത്തിന്റെ ഡയറക്ടര്‍മാരാണ് അനീഷ് ദയാനന്ദനും സുമേഷ് ഗോപാലനും.
'ഈ അവാര്‍ഡ് ഇന്നത്തെ സിനിമയുടെ അവിഭാജ്യ ഘടകമായ ദൃശ്യസാങ്കേതിക മേഖലയില്‍ പ്രവര്‍ത്തിച്ചുകൊണ്ടിരിക്കുന്നവര്‍ക്കും ഈ മേഖലയിലേക്ക് കടന്നുവരാന്‍ ആഗ്രഹിക്കുന്നവര്‍ക്കും വലിയ പ്രചോദനം തന്നെയാണ്' എന്ന് ഇവര്‍ പറയുന്നു.
ആഷിഖ് ഉസ്മാന്റെ നിര്‍മ്മാണത്തില്‍ ഖാലിദ് റഹ്മാന്‍ സംവിധാനം ചെയ്ത 'ലവ്' എന്ന സിനിമയാണ് ഇവരെ പുരസ്‌കാരത്തിന് അര്‍ഹരാക്കിയത്.
'ലവ്' എന്ന ചിത്രത്തിലെ കഥാപാത്രത്തിന്റെ മാനസികാവസ്ഥയെ പ്രതിഫലിപ്പിക്കുന്ന വിധം ദൃശ്യസാങ്കേതികതയെ വിനിയോഗിച്ചതിനാണ് ഈ പുരസ്‌കാരം.
മലയാളം, തമിഴ്, ഹിന്ദി തുടങ്ങിയ ഭാഷകളില്‍ 80ല്‍ അധികം ചലച്ചിത്രങ്ങള്‍ക്കും നിരവധി പരസ്യ ചിത്രങ്ങള്‍ക്കും ഇവര്‍ വിഷ്വല്‍ എഫക്ടസ് ചെയ്തിട്ടുണ്ട്. കൂടാതെ വി.ആര്‍., എ.ആര്‍., സ്റ്റീരിയോ സ്‌കോപ്പി, വെര്‍ച്യുല്‍ പ്രൊഡക്ഷന്‍ എന്നിവയും ചെയ്യുന്നുണ്ട്.
ഇപ്പോള്‍ ചര്‍ച്ചയാകുന്ന 'കനകം കാമിനി കലഹം', 'എല്ലാം ശരിയാകും' എന്നീ ചിത്രങ്ങളിലും ഡിജി ബ്രിക്‌സിന്റെ കയ്യൊപ്പുണ്ട്.
'ആറാട്ട്', 'സല്യൂട്ട്', 'ഭീഷ്മപര്‍വ്വം', 'തല്ലുമാല' തുടങ്ങി ഒരുപിടി സിനിമകള്‍ ഇവരുടേതായി വരാനിരിക്കുന്ന ചിത്രങ്ങളാണ്.
പാലക്കാട് നൂറണി, മുതുകുളം അഭി നിവാസില്‍ ദയാനന്ദന്റെ മകനാണ് അനീഷ്.
വയനാട് മാനന്തവാടി വെള്ളമുണ്ട അശ്വതി ഹൗസില്‍ ഗോപാലന്റെ മകനാണ് സുമേഷ്.
വാര്‍ത്ത പ്രചരണം- എം.എം. കമ്മത്ത്
Online PR - CinemaNewsAgency.Com
