സി എന്‍ എ-
കൊച്ചി:
തിയേറ്റര്‍ ഉടമകളുടെ സംഘടനയായ ഫിയോക്കില്‍ നിന്നും നിര്‍മ്മാതാവ് ആന്റണി പെരുമ്പാവൂര്‍ രാജിവെച്ചു.
തിയേറ്റര്‍ ഉടമകളുടെ സംഘടനയുടെ വൈസ് പ്രസിഡന്റ് സ്ഥാനത്ത് താന്‍ തുടരാന്‍ ആഗ്രഹിക്കുന്നില്ലെന്നും രാജി കത്ത് സ്വീകരിക്കണമെന്നും ആവശ്യപ്പെട്ടുകൊണ്ടാണ് ആന്റണി പെരുമ്പാവൂര്‍ രാജി കത്ത് നടനും ഫിയോക് ചെയര്‍മാനുമായ ദിലീപിന് കൈമാറിയതെന്നാണ് റിപ്പോര്‍ട്ട്.
പ്രിയദര്‍ശന്‍ സംവിധാനം ചെയ്യുന്ന മോഹന്‍ലാല്‍ ചിത്രം 'മരക്കാര്‍ അറബിക്കടലിന്റെ സംഹം' എന്ന ചിത്രത്തിന്റെ റിലീസുമായി ബാന്ധപ്പെട്ട വിവാദങ്ങള്‍ നിലനില്‍ക്കുന്നതിനിടെയാണ് രാജി.
കുറച്ച് ദിവസങ്ങള്‍ക്ക് മുന്‍പാണ് 'മരക്കാര്‍ അറബിക്കടലിന്റെ സംഹം' ഒടിടി റിലീസ് ചെയ്യുമെന്ന വിവരം ആന്റണി പെരുമ്പാവൂര്‍ മാധ്യമങ്ങളെ അറിയിച്ചത്. ഇതിനെതിരെ തിയേറ്റര്‍ ഉടമകളുടെ പ്രതിഷേധം ഉയര്‍ന്നതിന് പിന്നാലെ, മരയ്ക്കാര്‍ തിയേറ്ററില്‍ റിലീസ് ചെയ്യണമെങ്കില്‍ അഡ്വാന്‍സായി 25 കോടി നല്‍കണമെന്നതടക്കമുള്ള ചില നിബന്ധനകളും ആന്റണി പെരുമ്പാവൂര്‍ മുന്നോട്ട് വെച്ചിരുന്നുവെന്നും ഇതില്‍ തീരുമാനമാകാതെ വന്നതോടെയാണ് രാജിയെന്നാണ് സൂചന.
