സി എന്‍ എ-
കൊച്ചി:
താര രാജാവ് മോഹന്‍ലാല്‍ ആദ്യമായി സംവിധാനം ചെയ്യുന്ന ബാറോസിനെ കുറിച്ച് മുതിര്‍ന്ന നടന്‍ പ്രതാപ് പോത്തന്‍ പങ്കുവെച്ച ചിത്രവും പോസ്റ്റും വയറലായി.
'ലെജന്‍ഡ് മോഹന്‍ലാല്‍ സംവിധാനം ചെയ്യുന്ന ചിത്രത്തില്‍ പ്രവര്‍ത്തിക്കാന്‍ സാധിക്കുന്നതില്‍ ഞാന്‍ അഭിമാനിക്കുന്നു, അദ്ദേഹം ഒരു അപൂര്‍വ പ്രതിഭയാണ്, ഒരു കംപ്ലീറ്റ് ആക്ടറും, അതിശയകരമായ ഒരു മനുഷ്യനുമാണ്. ഒരു സംവിധായകനെന്ന നിലയില്‍ നിങ്ങളുടെ ആദ്യത്തെ സിനിമയില്‍ എന്നെ ഭാഗമാക്കിയതില്‍ നന്ദി. ഞാന്‍ ഭാഗ്യവാനാണ്. ബാറോസ്' ഇതാണ് പ്രതാപ് പോത്തന്‍ പോസ്റ്റില്‍ കുറിച്ചത്.
(“With the best .. I am proud to be directed by a legend Mohanlal he is a rare talent a complete actor and a wonderful human being thank you for having me be a part of your maiden effort as a director ..I am blessed.. Baroz (sic).”)
'ബാറോസ്' എന്ന ബിഗ് ബജറ്റ് ത്രീഡി സിനിമയുടെ ചിത്രീകരണം മാര്‍ച്ച് പകുതിയോടെ ആരംഭിക്കും. സിനിമയുടെ പ്രീ പ്രൊഡക്ഷന്‍ ജോലികള്‍ പുരോഗമിക്കുകയാണ്.
ഗോവയും കൊച്ചിയുമാണ് സിനിമയുടെ പ്രധാന ലൊക്കേഷന്‍. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ ആണ് ചിത്രം നിര്‍മ്മിക്കുന്നത്.
ചിത്രത്തിന്റെ ഛായാഗ്രാഹകന്‍ സന്തോഷ് ശിവനാണ്. പ്രൊഡക്ഷന്‍ ഡിസൈനര്‍ സന്തോഷ് രാമന്‍.
പോര്‍ച്ചുഗീസ് പശ്ചാത്തലമുള്ള പിരീഡ് സിനിമയാണ് 'ബറോസ്'.
വാസ്‌കോഡഗാമയുടെ നിധി സൂക്ഷിപ്പുകാരനായ ഒരു ഭൂതമാണ് 'ബറോസ്'. നാനൂറ് വര്‍ഷങ്ങളായി നിധിക്ക് കാവലിരിക്കുന്ന 'ബറോസ്' നിധിയുടെ യഥാര്‍ത്ഥ അവകാശിയെയാണ് കാത്തിരിക്കുന്നത്. നിധി തേടി ഒരു കുട്ടി ബറോസിന് മുന്നിലെത്തുന്നതാണ് സിനിമയുടെ പ്രമേയം.
കൂടാതെ ഇന്ത്യക്കും ആഫ്രിക്കക്കും പോര്‍ച്ചുഗീസിനും ഇടയില്‍ നിലനിന്നിരുന്ന കടല്‍ മാര്‍ഗ്ഗമുള്ള വ്യാപാരബന്ധവും സിനിമയില്‍ ചര്‍ച്ചചെയ്യും.
'ഗാര്‍ഡിയന്‍ ഓഫ് ഡി ഗാമാസ് ട്രഷര്‍' എന്നാണ് സിനിമയുടെ ടാഗ് ലൈന്‍.
മോഹന്‍ലാല്‍ തന്നെയാണ് സിനിമയില്‍ പ്രധാനകഥാപാത്രമായ 'ബറോസ്' എന്ന ഭൂതത്തെ അവതരിപ്പിക്കുന്നത്.
1984ല്‍ പുറത്തിറങ്ങിയ ഇന്ത്യയിലെ ആദ്യ ത്രീഡി ചിത്രമായിരുന്ന 'മൈ ഡിയര്‍ കുട്ടിച്ചാത്തന്‍' സംവിധാനം ചെയ്ത ജിജോയുടെ കഥയെ ആസ്പദമാക്കിയാണ് സിനിമ ഒരുങ്ങുന്നത്.
പൃഥ്വിരാജും ചിത്രത്തില്‍ ഒരു പ്രധാന കഥാപാത്രമായി എത്തുന്നുണ്ടെന്നാണ് അനൗദ്യോഗിക റിപ്പോര്‍ട്ട്. ചിത്രത്തില്‍ പാസ് വേഗ, റാഫേല്‍ അമാര്‍ഗോ എന്നീ സ്പാനിഷ് താരങ്ങളും അഭിനയിക്കുന്നുണ്ട്. വാസ്‌കോ ഡ ഗാമയുടെ റോളില്‍ റഫേല്‍ അമര്‍ഗോയും ഭാര്യയുടെ റോളില്‍ പാസ് വേഗയും അഭിനയിക്കുക.
കൂടാതെ സിനിമയില്‍ സഹതാരങ്ങളായി യുഎസ്, പോര്‍ച്ചുഗല്‍, ഘാന എന്നിവിടങ്ങളില്‍ നിന്നുമുള്ള താരങ്ങളെത്തുന്നു.
