ന്യൂസ് ഡെസ്ക്-
കൊച്ചി :
നവാഗതനായ രാജീവ് ഷെട്ടി സംവിധാനം ചെയ്യുന്ന 'തിരിമാലി' എന്ന സിനിമയില് ബിബിന് ജോര്ജാണ് നായകന്. 'ശിക്കാരിശംഭു'വിനു ശേഷം ലോറന്സ് നിര്മ്മിക്കുന്ന സിനിമയാണിത്. മിമിക്രിവേദിയില് കോമഡി സ്കിറ്റുകള് ഒരുക്കി ശ്രദ്ധേയനായ കലാകാരനാണ് ബിബിന് ജോര്ജ്. മിമിക്രിയില് നിന്ന് ഒരുപാട് പേര് സിനിമയില് വന്നു ഉയരങ്ങളില് എത്തിയിട്ടുണ്ട്. മുന്ഗാമികളുടെ പാത പിന്തുടര്ന്നു ബിബിന്ജോര്ജും കൂട്ടുകാരനും സഹപ്രവര്ത്തകനുമായ വിഷ്ണു ഉണ്ണികൃഷ്ണനും ചേര്ന്ന് തിരക്കഥയുമായിട്ടാണ്സിനിമയിലെത്തിയത്. നാദിര്ഷ സംവിധാനം ചെയ്ത 'അമര് അക്ബര് അന്തോണി' ആണ് ആദ്യചിത്രം. പൃഥ്വിരാജ്, ജയസൂര്യ, ഇന്ദ്രജിത്ത് എന്നിവര് അഭിനയിച്ച സിനിമ വലിയ വിജയമായിരുന്നു. അതിനുശേഷം എഴുതിയ തിരക്കഥയാണ് 'കട്ടപ്പനയിലെ കൃതിക് റോഷന്'. അതും നാദിര്ഷയാണ് സംവിധാനം ചെയ്തത്. കട്ടപ്പനയില് വിഷ്ണു ആയിരുന്നു നായകന്. ഇരുവരും ചേര്ന്ന് തിരക്കഥ എഴുതിയ രണ്ട് സിനിമയിലും ബിബിന് ജോര്ജ് ചെറിയ വേഷങ്ങള് ചെയ്തിട്ടുണ്ട്. രണ്ട് പേരുടെയും ലക്ഷ്യം അഭിനയം ആയതുകൊണ്ട് തിരക്കഥയെഴുത്ത് മതിയാക്കി അഭിനയത്തിന്റെ റൂട്ട് പിടിച്ചു. വിഷ്ണു നായകനായി, ബിബിന് ക്യാരക്ടര് വേഷങ്ങളും ചെയ്തു കൊണ്ടിരിക്കെ ഓര്ക്കാപ്പുറത്താണ് ലോട്ടറി അടിച്ചത്. ജന്മനാ ഒരു കാലിന് അംഗവൈകല്യമുള്ള ബിബിന് ജോര്ജ് ഷാഫിസംവിധാനം ചെയ്യുന്ന 'ഒരു പഴയ ബോംബ് കഥ' എന്ന സിനിമയില് നായകനാകുന്നു. വാര്ത്ത കേട്ട് പലരും അമ്പരന്നു. അങ്ങനെ സംഭവിക്കാന് സാധ്യതയില്ലല്ലോ. നായകന് എന്നൊക്കെ പറയുമ്പോഴുള്ള സങ്കല്പവും കാഴ്ചപ്പാടും എത്രയോ വലുതാണ്. രണ്ടുകാലും മുഴുവനായിട്ടുള്ളവര്ക്ക് തന്നെ ഇവിടെ പിടിച്ചു നില്ക്കാന് പറ്റുന്നില്ല അപ്പോഴാണ്... അതൊന്നും നടക്കില്ല ആശാനേ.. ആദ്യ സിനിമ യാഥാര്ത്ഥ്യമായതോടെ സംസാരത്തിന്റെ രീതി മാറി. ഒരു ചക്ക വീണു മുയലു ചത്തുവെന്ന് കരുതി ഇനിയും ചക്ക വീണു മുയല് ചാകുമോ..? എന്ന രീതിയില് ബിബിന്റെ കാര്യം പറഞ്ഞു പ്രചരിപ്പിച്ചവര് ചലച്ചിത്രരംഗത്തുണ്ട്. ഒരു സിനിമ നടക്കും, ഇനി നടക്കില്ല. ഒരു കാലിന് സ്വാധീനമില്ലാത്ത ആളല്ലേ മലയാളസിനിമയില് സ്ഥിരമായി നടനാകാന് പോകുന്നത്. അവരെയൊക്കെ ഞെട്ടിച്ചുകൊണ്ട് രണ്ടാമതും ബിബിന് നായകനായി, 'മാര്ഗഗംകളി' എന്ന സിനിമയിലൂടെ അരങ്ങിലെത്തി. അപ്പോഴും പഴയ ആളുകള് രംഗത്തുവന്നു. ഇങ്ങനെ രണ്ടു സിനിമയൊക്കെ നടക്കും. ഇതോടെ തീര്ന്നു, ഇനി ഇല്ല. ബിബിന്റെ ചെവിയിലും ഇതൊക്കെ എത്തുന്നുണ്ടായിരുന്നു. പക്ഷെ ബിബിനും ബിബിന്റെ കൂട്ടുകാരും മിണ്ടിയില്ല. ഇപ്പോഴിതാ ബിബിന് വീണ്ടും നായകനാകുന്നു. പുതിയ ചിത്രമായ 'തിരിമാലി'യുടെ പൂജവേളയില് സംവിധായകനായ രാജീവ് ഷെട്ടിയുടെ ഗുരുവും പ്രശസ്ത സംവിധായകനുമായ ഷാഫി, ബിബിന്റെ കൂടി സാന്നിധ്യത്തിലാണ് ഇക്കാര്യങ്ങള് വെളിപ്പെടുത്തിയത്. ചിരിച്ചു കൊണ്ട് അതെല്ലാം കേട്ടിരിക്കുകയായിരുന്നു ബിബിന്. ഹരീഷ് കണാരന്, ജോണി ആന്റണി, ധര്മ്മജന് ബോള്ഗാട്ടി എന്നിവരൊക്കെ പ്രധാന കഥാപാത്രങ്ങളെ അവതരിപ്പിക്കുന്ന 'തിരിമാലി'യുടെ ഷൂട്ടിംഗ് കൊച്ചിയിലും നേപ്പാളിലും ആയി നടക്കും.