സി എന്‍ എ-
മുംബൈ:
ബോളിവുഡ് സൂപ്പര്‍ സ്റ്റാര്‍ 'ബിഗ്ഗ് ബി' അമിതാഭ് ബച്ചനും ഇമ്രാന്‍ ഹാഷ്മിയും ഒന്നിക്കുന്ന 'ചെഹ്‌രെ' 2021 ഏപ്രില്‍ 30ന് തിയേറ്ററിലെത്തും. 2020 ജുലൈയില്‍ റിലീസ് ചെയ്യാനിരുന്ന ചിത്രം കോവിഡ് മൂലം റിലീസ് നീണ്ട്‌പോകുകയായിരുന്നു.
'ബിഗ് ബി' തന്നെയാണ് മിസ്റ്റ്‌റി ത്രില്ലറായ 'ചെഹ്‌രെ'യുടെ റിലീസ് ഡേറ്റ് ട്വീറ്റ് ചെയ്തത്. ബച്ചന് പിന്നാലെ ഇമ്രാന്‍ ഹാഷ്മിയും റിലീസ് ഡേറ്റ് സംബന്ധിച്ച് ട്വീറ്റുമായി രംഗത്തെത്തി. റിലീസ് തീയതിക്കൊപ്പം ചിത്രത്തിന്റെ പുതിയ പോസ്റ്ററും പുറത്ത് വിട്ടിട്ടുണ്ട്.
ഒരു അഭിഭാഷകന്റെ വേഷത്തിലാണ് അമിതാഭ് ബച്ചന് എത്തുന്നത്.
റൂമി ജാഫ്രെയുടെ സംവിധാനത്തിലൊരുങ്ങുന്ന ചിത്രത്തില്‍ രേഖ ചക്രവര്‍ത്തി, ക്രിസ്റ്റല്‍ ഡിസൂസ, അന്നു കപൂര്‍, ധൃതിമാന്‍ ചാറ്റര്‍ജി എന്നിവര്‍ മറ്റ് പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
'ചെഹ്‌രെ'യെ കൂടാതെ 'ബ്രഹ്മാസ്ത്ര', 'മെയ് ഡേ', 'ജൂണ്ട്' എന്നീ ചിത്രങ്ങളാണ് അമിതാഭ് ബച്ചന്റേതായി ഇനി പുറത്തിറങ്ങാനുള്ളത്.
