സി എന് എ-
കോഴിക്കോട് :
മലയാള സിനിമാപ്രേമികള്ക്ക് മനോഹരമായൊരു ഗാനവുമായി നഞ്ചിയമ്മ വീണ്ടുമെത്തുന്നു.
മലയാളികള് ഏറ്റുപാടിയ 'അയ്യപ്പനും കോശിയും' എന്ന സിനിമയിലെ 'കലകാത്ത...' എന്ന് തുടങ്ങുന്ന ഗാനത്തിന് ശേഷം മനോഹരമായൊരു താരാട്ട് പാട്ടുമായാണ് നഞ്ചിയമ്മ വരുന്നത്..
ഒട്ടേറെ പ്രവാസി മലയാളികളുടെ കലാസ്വപ്നങ്ങള്ക്കു നിറം പകര്ന്ന ഖത്തര് ആസ്ഥാനമായി പ്രവര്ത്തിക്കുന്ന വണ് ടു വണ് മീഡിയയുടെ ബാനറില് മന്സൂര് അലി നിര്മ്മിച്ച് ഷാഫി എപ്പിക്കാട് രചനയും സംവിധാനവും നിര്വ്വഹിക്കുന്ന 'ചെക്കന്' എന്ന ചിത്രത്തിലൂടെയാണ് ഗായികയും, അഭിനേതാവുമായി നഞ്ചിയമ്മ വീണ്ടുമെത്തുന്നത്.
രചയിതാവും, സംഗീത സംവിധായകനും, ഗായകനുമായ പത്മശ്രീ കൈതപ്രം ദാമോദരന് നമ്പൂതിരിയാണ് ചെക്കനിലെ ആദ്യ ഗാനത്തിന്റെ വീഡിയോ ലോഞ്ചിംഗ് നിര്വ്വഹിച്ചത്.
നടന് വിനോദ് കോവൂരും, സംവിധായകന് ഷാഫി എപ്പിക്കാടും ചിത്രത്തിന്റെ മറ്റു അണിയറ പ്രവര്ത്തകരും സന്നിഹിതരായ ചടങ്ങ് കോഴിക്കോട് കൈതപ്രത്തിന്റെ വസതിയില് വെച്ചാണ് നടന്നത്.
വണ് ടു വണ് മീഡിയ യൂട്യൂബ് ചാനലിലൂടെയാണ് 'ആത്ക്ക് അന്താ പക്കം...' എന്ന് തുടങ്ങുന്ന ചിത്രത്തിലെ ആദ്യഗാനം പ്രേക്ഷകരിലേക്ക് എത്തിയിരിക്കുന്നത്.
ഗോത്ര വിഭാഗത്തില് ജനിച്ച ഗായകനായൊരു വിദ്യാര്ത്ഥിയുടെ കഥ പറയുന്ന ചിത്രം മനോഹരമായ ഗാനങ്ങളുടെ അകമ്പടിയോടെ വയനാടിന്റെ ദൃശ്യ ഭംഗിയിലാണ് ചിത്രീകരിച്ചിരിക്കുന്നത്.
പാരമ്പര്യമായി കിട്ടിയ സിദ്ധിയും, ഗായികയായ അമ്മൂമ്മ നഞ്ചിയമ്മയില് നിന്നും കിട്ടിയിരുന്ന അംഗീകാരവും നായകന് ചെക്കന് ഏറെ പ്രോത്സാഹനമായിരുന്നെങ്കിലും വര്ത്തമാന കാലത്തും തുടരുന്ന ജാതിയുടെയും നിറത്തിന്റെയും പേരിലുള്ള അവഗണനകളും, മാറ്റിനിര്ത്തലുകളും നേരിടേണ്ടിവരുന്നൊരു ബാലന്റെ നിസ്സഹായതയാണ് സംവിധായകന് ചെക്കനിലൂടെ വരച്ചു കാണിക്കുന്നത്.
കാടിന്റെയും, സംഗീതത്തിന്റെയും അകമ്പടിയോടെ ഒരുങ്ങുന്ന ചിത്രത്തില് നാടന് പാട്ടു ഗായകന് മണികണ്ഠന് പെരുമ്പടപ്പും മനോഹരമായ ഗാനങ്ങള്ക്ക് രചനയും, സംഗീതവും നിര്വഹിച്ചു ആലപിക്കുന്നുണ്ട്. അടുത്ത മാസം റിലീസ് ഒരുങ്ങുന്ന ചിത്രം തിയേറ്റര് റിലീസ് തന്നെയാണ് ഉദ്ദേശിക്കുന്നത്.
'ഗപ്പി', 'ചാലക്കുടിക്കാരന് ചെങ്ങാതി', 'എടക്കാട് ബറ്റാലിയന്' തുടങ്ങിയ ചിത്രത്തിലൂടെ ശ്രദ്ധേയനായ വിഷ്ണു പുരുഷനാണ് ചെക്കനായി അഭിനയിക്കുന്നത്. നായിക ആതിരയും. കൂടാതെ നഞ്ചിയമ്മ, വിനോദ് കോവൂര്, തസ്നിഖാന്, അബു സലീം, അമ്പിളി, അലി അരങ്ങാടത്ത്, മാരാര്, സലാം കല്പറ്റ, അഫ്സല് തുവൂര്, ടിക് ടോക് താരങ്ങളായ അബു സാലിം, ഷിഫാന, ലിയാ അമന് തുടങ്ങിയവരോടൊപ്പം ഒട്ടേറെ നാടക താരങ്ങളും വിവിധ വേഷത്തില് ചിത്രത്തിലെത്തുന്നു.
ഛായാഗ്രഹണം- സുരേഷ് റെഡ് വണ്, കലാ സംവിധാനം- ഉണ്ണി നിറം, ചമയം- ഹസ്സന് വണ്ടൂര്, എഡിറ്റ- ജര്ഷാജ്, വസ്ത്രാലങ്കാരം- സുരേഷ് കോട്ടാല, പ്രൊജക്റ്റ് ഡിസൈന്- അസിം കോട്ടൂര്, പ്രൊ.കാണ്ട്രോളര്- ഷൗക്കത്ത് വണ്ടൂര്, പ്രൊ.മാനേജര്- റിയാസ് വയനാട്, സ്റ്റില്സ- അപ്പു, പശ്ചാത്തല സംഗീതം- സിബു സുകുമാരന്,
സാമ്പത്തിക നിയന്ത്രണം- മൊയ്ദു കെ.വി, ഗതാഗതം-ഷബാദ് സബാട്ടി, പി.ആര്.ഒ- അജയ് തുണ്ടത്തില്, ഡിസൈന്- മനു ഡാവിഞ്ചി.
Online PR - CNA.