Editor- MM Kamath
കൊച്ചി:
സിനിമ ഇറങ്ങുന്നതിനു മുന്‍പ് പാട്ടുകള്‍ ഹിറ്റാകുന്ന ഒരു ട്രെന്‍ഡിലാണല്ലോ ഇപ്പോള്‍ സിനിമാ ലോകം, അത്തരം ഒരു സന്തോഷത്തിലാണ് 'ചെക്കന്‍ 'എന്ന സിനിമയുടെ അണിയറ പ്രവര്‍ത്തകര്‍.
നഞ്ചിയമ്മ പാടിയ 'ആതുക്കു അന്താ പക്കം' എന്ന താരാട്ടു പാട്ട് പുറത്തിറങ്ങി ദിവസങ്ങള്‍ കൊണ്ടുതന്നെ വൈറലായി മാറിയിരുന്നു. അതിനുശേഷം വീണ്ടും ലോക്ഡൗണ്‍ നീണ്ടു പോകുകയും സിനിമ റിലീസ് വൈകുകയും ചെയ്ത സാഹചര്യത്തിലാണ് സിനിമയിലെ 'മലര്‍കൊടിയേ ഞാന്‍ എന്നും'എന്ന ഗാനം കൂടി പുറത്തിറക്കേണ്ടി വന്നത് എന്നും, പാട്ട് ഇത്രയധികം വൈറല്‍ ആയി മാറിയത് അപ്രതീക്ഷിതമെന്നും അണിയറ പ്രവര്‍ത്തകര്‍ പറഞ്ഞു.
യൂട്യൂബില്‍ റിലീസ് ചെയ്ത ഗാനം രണ്ടാഴ്ചയോളം മ്യൂസിക് ട്രെന്‍ഡിങ്ങില്‍ ഒന്നാം സ്ഥാനത്തായിരുന്നു. പിന്നീട് ഇന്‍സ്റ്റാ റീല്‍സ്, ടിക്ടോക് തുടങ്ങിയ സോഷ്യല്‍ മീഡിയകള്‍ ഏറ്റെടുക്കുകയും, ഗാനം മില്ല്യണുകള്‍ പിന്നിടുകയുമായിരുന്നു.
പീര്‍ മുഹമ്മദ് പാടി ഒരു തലമുറ ഏറ്റുപാടിയ ഗാനം പുതിയ രൂപത്തില്‍ ചിട്ടപ്പെടുത്തിയത് സിബു സുകുമാരനും, ശബ്ദം നല്‍കിയത് നാടന്‍ പാട്ട് ഗായകന്‍ മണികണ്ഠനുമാണ്. പഴയ ഗാനത്തെ തനിമ ചോരാതെ അവതരിപ്പിച്ചതിനു ഒരുപാട് നല്ല അഭിപ്രായങ്ങളാണ് പ്രേക്ഷകരില്‍ നിന്നും ഉണ്ടായതെന്ന് സംവിധായകന്‍ ഷാഫി എപ്പിക്കാട് പറഞ്ഞു.
നിരവധി മ്യൂസിക് ആല്‍ബങ്ങളൊരുക്കിയ ഷാഫി എപ്പിക്കാടിന്റെ ആദ്യ സിനിമയാണ് 'ചെക്കന്‍'.
അവഗണിക്കപ്പെടുന്ന ഒരു ഗോത്ര ഗായകനായ വിദ്യാര്‍ത്ഥിയുടെ കഥ പറയുന്ന ചിത്രം വണ്‍ ടു വണ്‍ മീഡിയയുടെ ബാനറില്‍ മന്‍സൂര്‍ അലിയാണ് നിര്‍മ്മിച്ചിരിക്കുന്നത്. ചെക്കനിലെ മറ്റു ഗാനങ്ങള്‍ ആലപിച്ചിരിക്കുന്നത് മണികണ്ഠന്‍ പെരുമ്പടപ്പും അട്ടപ്പാടിയുടെ ഗായിക നഞ്ചിയമ്മയുമാണ്.
ചിത്രത്തില്‍ നായകന്‍ ചെക്കനായി വേഷമിടുന്നത് നിരവധി സിനിമകളിലൂടെ സുപരിചിതനായ വിഷ്ണു പുരുഷനാണ്. നായികയായി ആതിരയും, ഷിഫാനയും എത്തുന്നു. ഇവരെകൂടാതെ നഞ്ചിയമ്മ, വിനോദ് കോവൂര്‍, അബു സലിം, തസ്‌നി ഖാന്‍, അലി അരങ്ങാടത്ത് തുടങ്ങിയ താരങ്ങള്‍ക്കു പുറമേ ഒട്ടേറെ നാടക, ടിക് ടോക് താരങ്ങളും ഒപ്പം ഏറെ പുതുമുഖങ്ങളും ചിത്രത്തിലൂടെ കഥാപാത്രങ്ങളായി വരുന്നുണ്ട്.
ഛായാഗ്രഹണം- സുരേഷ് റെഡ് വണ്‍, കലാ സംവിധാനം- ഉണ്ണി നിറം, ചമയം- ഹസ്സന്‍ വണ്ടൂര്‍, എഡിറ്റിംഗ്- ജര്‍ഷാജ്, വസ്ത്രാലങ്കാരം- സുരേഷ് കോട്ടാല, പ്രൊജക്റ്റ് ഡിസൈന്‍- അസിം കോട്ടൂര്‍, പ്രൊ.കാണ്ട്രോളര്‍- ഷൗക്കത്ത് വണ്ടൂര്‍, പ്രൊ.മാനേജര്‍- റിയാസ് വയനാട്, സ്റ്റില്‍സ്- അപ്പു, പശ്ചാത്തല സംഗീതം- സിബു സുകുമാരന്‍, സാമ്പത്തിക നിയന്ത്രണം- മൊയ്ദു കെ.വി, ഗതാഗതം-ഷബാദ് സബാട്ടി, പി.ആര്‍.ഒ- അജയ് തുണ്ടത്തില്‍, ഡിസൈന്‍- മനു ഡാവിഞ്ചി.
'ചെക്കന്‍' അടുത്തമാസം റിലീസിനൊരുങ്ങുകയാണ്.
Online PR - CinemaNewsAgency.Com
