സി എന് എ-
തിരു:
കേരളത്തില് പത്തുമാസമായി അടഞ്ഞുകിടക്കുന്ന സിനിമ തീയറ്ററുകള് തുറക്കാന് സര്ക്കാര് അനുമതി നല്കി. എത്രയും വേഗം പ്രദര്ശനശാലകള് തുറക്കണം, സിനിമ ഷൂട്ടിംഗ് പഴയതുപോലെ സജീവമാകണമെന്നൊക്കെ ഈ രംഗത്ത് പ്രവര്ത്തിക്കുന്ന മുഴുവനാളുകളുടെയും പ്രാര്ത്ഥനയായിരുന്നു. മറ്റു സംസ്ഥാനങ്ങളില് തീയേറ്ററുകള് തുറന്നു പ്രവര്ത്തനം ആരംഭിച്ചപ്പോഴും കേരളത്തിലെ തിയേറ്ററുകള് അടഞ്ഞു തന്നെ കിടക്കുകയായിരുന്നു. എല്ലാവരുടെയും നിരന്തരമായ ആവശ്യം പരിഗണിച്ചാണ് സര്ക്കാര് ഇപ്പോള് തിയേറ്ററുകള് തുറന്ന് പ്രവര്ത്തിക്കാനുള്ള അനുമതി നല്കിയത്. അതേസമയം തീയേറ്ററുകള് തുറന്നാലും സിനിമ നല്കില്ലെന്ന് ഡിസ്ട്രിബ്യൂട്ടേഴ്സ് അസോസിയേഷന് വ്യക്തമാക്കി. തിയേറ്ററുകളില് നിന്നും ലഭിക്കാനുള്ള കുടിശ്ശിക പണം കിട്ടിയാല് മാത്രമേ പുതിയ സിനിമകള് നല്കുകയുള്ളൂ എന്നും നിര്മ്മാതാക്കള് സര്ക്കാരിന് മുന്പില് വച്ച ഉപാധികള് പരിഹരിക്കുകയും ചെയ്താല് മാത്രമേ സഹകരിക്കുകയുള്ളൂവെന്നും അസോസിയേഷന് അറിയിച്ചു.
ജനുവരി അഞ്ചു മുതല് സിനിമാ തിയറ്ററുകള് തുറന്നുപ്രവര്ത്തിക്കാനാണ് സര്ക്കാര് അനുമതി. സീറ്റിങ് കപ്പാസിറ്റിയുടെ അമ്പത് ശതമാനം മാത്രമേ ടിക്കറ്റ് നല്കാവൂ എന്നും കര്ശനമായ കൊവിഡ് മാനധണ്ഡങ്ങളോടെ പ്രവര്ത്തിക്കാത്ത തിയറ്ററുകള്ക്കെതിരെ നിയമനടപടി ഉണ്ടാകുമെന്നും മുഖ്യമന്ത്രി പിണറായി വിജയന് വാര്ത്താ സമ്മേളനത്തില് അറിയിച്ചു.
കൊവിഡ് മഹാമാരിയുടെ പശ്ചാത്തലത്തില് കരുതലുകള് എടുത്ത് നിയന്ത്രണങ്ങള് കുറയ്ക്കുകയാണ്. ജനങ്ങളുടെ ഉപജീവനമാര്ഗം, മാനസിക, സാമൂഹ്യക്ഷേമവും സംരക്ഷിക്കാനാണ് ഈ ഇളവ്. ചലച്ചിത്രരംഗവുമായി ബന്ധപ്പെട്ട് പ്രവര്ത്തിക്കുന്ന ആയിരക്കണക്കിന് പേര് പ്രതിസന്ധിയിലാണ്. ഇതിന്റെ ഭാഗമായാണ് നിയന്ത്രണങ്ങളോടെ തിയറ്ററുകള് തുറക്കുന്നത്. പകുതി ടിക്കറ്റുകളേ വില്ക്കാവൂ. അഞ്ചാം തീയതി തന്നെ അണുവിമുക്തമാക്കുകയും വേണം.
രാജ്യത്ത് കൊവിഡ് വ്യാപനത്തെത്തുടര്ന്നായിരുന്നു തീയറ്ററുകള്, ആരാധനാലയങ്ങള് തുടങ്ങിയവയുടെ പ്രവര്ത്തനങ്ങള് നിര്ത്തിവെച്ചത്. തിയറ്ററുകള് തുറക്കണമെന്ന ആവശ്യം വിവിധകേന്ദ്രങ്ങളില്നിന്നും ഉയര്ന്നിരുന്നു. തിയറ്റര് ഉടമകളുമായി സര്ക്കാര് നേരത്തെ ചര്ച്ച നടത്തിയിരുന്നെങ്കി ലും തീരുമാനമായിരുന്നില്ല.