സി എന്‍ എ-
കൊച്ചി:
മലയാളികള്‍ക്ക് ഏറെ ഇഷ്ടപ്പെട്ട സീരിയല്‍ സിനിമ നടിയായിരുന്നു ശരണ്യ കെഎസ്.
ദൂരദര്‍ശനില്‍ സംപ്രേഷണം ചെയ്ത 'ദൗത്യം' എന്ന മലയാളം സീരിയലില്‍ അഭിനയിച്ചുകൊണ്ടാണ് ശരണ്യ അഭിനയരംഗത്ത് കടന്നുവരുന്നത്. പിന്നീട് 'സൂര്യോദയം', 'മന്ത്രകോടി', 'രഹസ്യം', 'അവകാശികള്‍', 'കറുത്തമുത്ത്' എന്നീ മലയാളം സീരിയലുകളും 'സ്വാതി' എന്ന തെലുങ്ക് സീരിയലിലും ശരണ്യ പ്രധാന കഥാപാത്രങ്ങളെ അവതരിപ്പിച്ചിട്ടുണ്ട്. കൂടാതെ 'ചാക്കോ രണ്ടമാന്‍', 'ചോട്ട മുംബൈ', 'തലപ്പാവ്', 'ബോംബെ മാര്‍ച്ച് 12' എന്നീ മലയാള സിനിമകളിലും 2012ല്‍ 'പച്ചായ് എങ്കിര കാത്ത്' എന്ന തമിഴ് സിനിമയില്‍ നായികയായും അഭിനയിച്ചു.
എന്നാല്‍, ക്യാന്‍സര്‍ മൂലം അഭിനയരംഗത്ത്‌നിന്നും കഴിഞ്ഞ എട്ടുവര്‍ഷങ്ങളായി വിട്ടുനില്‍ക്കേണ്ടിവരികയും ആശുപത്രിക്കിടക്കയിലും വീടിന്റെ നാല് ചുവരുകള്‍ക്കിടയിലുമായി കഴിയുകയായിരുന്നു. എന്നാല്‍ ഇപ്പോള്‍ ശരണ്യ തന്റെ പുതിയ സംരംഭവവുമായി രംഗത്തെത്തിയിരിക്കുകയാണ്.
'എട്ടുവര്‍ഷമായി ഒന്നുകില്‍ ആശുപത്രിക്കിടക്കയിലും അല്ലങ്കില്‍ മുറിയുടെ നാലുചുവരുകള്‍ക്കിടയിലുമായി കഴിഞ്ഞ എനിക്ക് 2020 എന്നല്ല പത്തൊമ്പതോ പതിനെട്ടോ പതിനേഴോ ഒരു വ്യത്യാസവുമുണ്ടായിരുന്നില്ല' എന്ന് ശരണ്യ പറയുന്നു.
'എന്നാല്‍ എന്റെ രണ്ടായിരത്തി ഇരുപത്തി ഒന്ന് അല്പമെങ്കിലും വ്യത്യാസമുള്ളതാക്കണമെന്ന് എനിക്ക് മോഹമുണ്ട്' എന്നും ശരണ്യ പറയുന്നു.
താന്‍ പുതിയ യൂട്യൂബ് ചാനല്‍ തുടങ്ങിയതായി ശരണ്യ തന്റെ ഫേസ്ബുക്ക് പേജിലൂടെയാണ് ഈ വിവരം അറിയിച്ചത്.
ശരണ്യ തന്റെ എഫ്.ബി.യില്‍ കുറിച്ചത് ഇങ്ങനെയാണ്-
'പ്രിയമുള്ളവരേ നമസ്‌കാരം.
എല്ലാവര്‍ക്കും പുതുവത്സാരാശംസകള്‍
ഞാന്‍ ശരണ്യ
2020 കഴിഞ്ഞു, ഈ കഴിഞ്ഞു പോകുന്ന വര്‍ഷം ലോകത്താകമാനം കൊറോണ വരുത്തിയ ദുരന്തം വിവരണാധീതമാണല്ലോ.
ഇനി കടന്നു വരുന്ന 2021 അങ്ങനെയാകാതിരിക്കാന്‍ നമുക്കാശിക്കാം.
ആശിക്കാനല്ലേ നമ്മള്‍ക്കു കഴിയൂ !
കഴിഞ്ഞ എട്ടുവര്‍ഷമായി ഒന്നുകില്‍ ആശുപത്രിക്കിടക്കയിലും അല്ലങ്കില്‍ മുറിയുടെ നാലുചുവരുകള്‍ക്കിടയിലുമായി കഴിഞ്ഞ എനിക്ക് 2020 എന്നല്ല പത്തൊമ്പതോ പതിനെട്ടോ പതിനേഴോ ഒരു വ്യത്യാസവുമുണ്ടായിരുന്നില്ലല്ലോ.
എന്നാല്‍ എന്റെ രണ്ടായിരത്തി ഇരുപത്തി ഒന്ന് അല്പമെങ്കിലും വ്യത്യാസമുള്ളതാക്കണമെന്ന് എനിക്ക് മോഹമുണ്ട്.
പക്ഷേ പരസഹായമില്ലാതെ ഒന്നും ചെയ്യാനാകാത്ത എനിക്ക് എന്തു ചെയ്യാനാകും എന്നെ വല്ലാതെ അലട്ടുന്നുണ്ട്.
തുന്നലോ, പെന്റിംഗോ ചെയ്യാമെന്നു വെച്ചാല്‍ ഈ വിറക്കുന്ന കൈകൊണ്ട് ഒന്നും നടക്കില്ല.
അങ്ങനെയാലോചിച്ചപ്പോളാണ് വീഡിയോ ഡയറി ചെയ്യാവുന്നതാണ് എന്ന് മനസ്സിലായത്.
ഏതൊരു മൂവി ആര്‍ട്ടിസ്റ്റും കാമിറയുടെ മുന്നില്‍ ചെല്ലുമ്പോള്‍ മനസ്സുകൊണ്ട് ആദ്യം നമിക്കുന്നത് ചാര്‍ളി ചാപ്ലിനെന്ന ഇതിഹാസത്തിന്റെ മുന്നിലാണല്ലോ. അദ്ദേഹത്തിന്റെ ഏറ്റവും പ്രശസ്തമായ സിറ്റിലൈറ്റ്‌സ് എന്ന സിനിമയുടെ പേര് കടമെടുതുകൊണ്ട് ഒരു യൂറ്റിയൂബ് ചാനല്‍ ആരംഭിക്കുകയാണ്.
ഓരോ ആളും ജനനം മുതല്‍ മരണം വരെ എല്ലായ്‌പോളും ദുരന്തങ്ങളുടെ ഇരുട്ടിലോ സന്തോഷങ്ങളുടെ പ്രഭാദീപ്തിയിലുമായിരിക്കില്ലല്ലോ. ആ അനന്തമായ ഇരുട്ടില്‍ കഴിയുന്നവര്‍പോലും, ലഭ്യമായ കൊച്ചു കൊച്ചുമിന്നാമിന്നി വെട്ടങ്ങളെയെങ്കിലും കൂട്ടുപിടിച്ചായിരിക്കും മുന്നോട്ടു പോവുന്നത്. അല്ലങ്കില്‍ പതിനായിരക്കണക്കിന് പ്രകാശവര്‍ഷം അകലെനിന്ന് ചിതറിയെത്തുന്ന നക്ഷത്ര വെട്ടത്തെ ചേര്‍ത്തുപിടിക്കും.
അതായത് നാമിപ്പോള്‍ ജീവിച്ചിരിക്കുന്നു എന്നതിനര്‍ത്ഥം ആരൊക്കെയോ എപ്പോളൊക്കെയോ ഓരോ നുള്ള് നുറുങ്ങുവെട്ടങ്ങള്‍ ലഭിച്ചിട്ടുണ്ട് എന്നാണ് അല്ലായിരുന്നെങ്കില്‍ നമ്മളെന്നേ അന്തകാരത്തില്‍ വീണു പോയേനെ!
അങ്ങനെയാണ് ഞാന്‍ സിറ്റിലൈറ്റ്‌സിലേക്കെത്തുന്നത്.
എന്റെയീ ചാനല്‍ നിങ്ങള്‍ സബ്‌സ്‌െ്രെകബ് ചെയ്യുമെന്ന് എനിക്കറിയാം.
എങ്കിലും എനിക്കൊരു അഭ്യര്‍ത്ഥനയേയുള്ളൂ നിങ്ങള്‍ക്ക് ഒഴിവു കിട്ടുമ്പോള്‍ എന്നെ ഓര്‍മ്മവരുകയാണെങ്കില്‍ എന്റെ ചാനല്‍ നിങ്ങള്‍ കാണണം. വിഡിയോ ഡയറിയെന്ന നിലയില്‍ എല്ലാ ദിവസവും പുതിയവ ചെയ്യണമെന്നാണ് ആഗ്രഹം. സാധ്യമാകുമോ എന്നറിയില്ല.
നിങ്ങള്‍ക്കേവര്‍ക്കും സര്‍വേശ്വരന്റെ അനുഗ്രഹമുണ്ടാകട്ടെ!'
'Please Watch, Like & Subscribe'
https://youtu.be/t9sHBejCxzw
എന്നാണ് ശരണ്യ തന്റെ FB പോസ്റ്റില്‍ കുറിച്ചിരിക്കുന്നത്.
