സി എന് എ-
ചെന്നൈ:
വിക്രമിന്റെ 'കോബ്ര'ടീം സിനിമയുടെ ചിത്രീകരണം പൂര്ത്തിയാക്കി റഷ്യയില് നിന്നും ചെന്നൈയില് തിരിച്ചെത്തി.
ചിയാങ്ങ് വിക്രമിനെ നായകനാക്കി ആര് അജയ് ജ്ഞാനമുത്തു സംവിധാനം ചെയ്യുന്ന സ്പൈ, ആക്ഷന് ത്രില്ലര് ചിത്രമാണ് 'കോബ്ര'.
ഇക്കഴിഞ്ഞ ഫെബ്രുവരിയിലാണ് 'കോബ്ര'ടീം റഷ്യയില് ഷൂട്ടിംഗിനായി പോയത്. ഈ ഷെഡ്യൂള് പൂര്ത്തിയാക്കി ചെന്നൈയില് എത്തിയ വിവരം സംവിധായകന് അജയ് ജ്ഞാനമുത്തു തന്നെയാണ് അറിയിച്ചത്. കൊടും ശൈത്യത്തെ പ്രതിരോധിച്ചു കൊണ്ട് ചിത്രീകരണം പൂര്ത്തിയാക്കാന് സഹായിച്ച മുഴുവന് ടീം അംഗങ്ങളെയും അദ്ദേഹം പ്രശംസിച്ചു.
'എല്ലാ ബുദ്ധിമുട്ടുകള്ക്കിടയിലും ഈ ടീം ഒരിക്കലും കൈവിട്ടില്ല. ടീം വര്ക്ക് കാരണമാണ് മുഴുവന് ചിത്രീകരണപ്രക്രിയയും സുഗമമായി സാധ്യമായത്. ഇപ്പോള് ഷൂട്ടിംഗ് പൂര്ത്തിയായതോടെ അടുത്ത ഘട്ടം ചിത്രത്തിന്റെ പോസ്റ്റ് പ്രൊഡക്ഷന് ജോലികളായിരിക്കും, ഈ വര്ഷാവസാനം 'കോബ്ര' തിയേറ്ററുകളില് റിലീസ് ചെയ്യാനാണ് പദ്ധതി. ചിത്രത്തിന്റെ ടീസറില് കാണിച്ചിരിക്കുന്നതുപോലെ കോബ്രയുടെ അവതാരത്തെ ഒന്നിലധികം അവതാരങ്ങളില് ചിത്രത്തില് കാണാം.'
ഇതാണ് തന്റെ ഇന്സ്റ്റാഗ്രാം സ്റ്റോറിയിലൂടെ അജയ് കുറിച്ചത്.
സ്പൈ, ആക്ഷന് ത്രില്ലറായ 'കോബ്ര'യില് വിക്രമിനെ കൂടാതെ ശ്രീനിധി ഷെട്ടി, കെ എസ് രവികുമാര്, പ്രശസ്ത മുന് ക്രിക്കറ്റ് താരം ഇര്ഫാന് പത്താന്, മിയ ജോര്ജ് എന്നിവരാണ് പ്രധാന വേഷങ്ങളില് എത്തുന്നത്. ഫ്രഞ്ച് ഇന്റര്പോള് ഓഫീസറായി ഇര്ഫാന് എത്തുന്നു. ആക്ഷനും ത്രില്ലടിപ്പിക്കുന്ന രംഗങ്ങളുടങ്ങിയ ടീസര് അടുത്തിടെ നിര്മ്മാതാക്കള് പുറത്തിറക്കിയിരുന്നു.
സംഗീതം- എ ആര് റഹ്മാന്, സെവന് സ്ക്രീന് സ്റ്റുഡിയോസിന്റെ ബാനറില് എസ് എസ് ലളിത് കുമാര് നിര്മ്മിക്കുന്ന ചിത്രത്തിന്റെ ഛായാഗ്രഹണം ഹരീഷ് കണ്ണന് ആണ് നിര്വ്വഹിക്കുന്നത്. എഡിറ്റിംഗ്- ഭുവന് ശ്രീനിവാസന്. ആക്ഷന് കൊറിയോഗ്രഫി ദിലീപ് സുബ്ബരായന്.
Online PR - CNA.