സി എന് എ-
കൊച്ചി:
ഒരു കാലത്ത് തെന്നിന്ത്യന് സിനിമയിലെ അവിഭാജ്യ ഘടകമായിരുന്ന നടനും, സംവിധായകനും, തിരക്കഥാകൃത്തുമായ കൊച്ചിന് ഹനീഫ (തമിഴകത്തിന്റെ വി എം സി ഹനീഫ്)ഓര്മ്മയായിട്ട് 11 വര്ഷം.
മലയാളം, തമിഴ് ചിത്രങ്ങളില് അഭിനയിക്കുകയും, തിരക്കഥ എഴുതുകയും സംവിധാനം ചെയ്തും പ്രേക്ഷരെ ആഴത്തില് സ്വാധീനിച്ച ചലച്ചിത്രകാരനായിരുന്നു കൊച്ചിന് ഹനീഫ.
മിമിക്രി കലാകാരനായി കലാ ജീവിതം ആരംഭിച്ച ഹനീഫ 1970 കളില് വില്ലന് വേഷങ്ങളിലൂടെയാണ് സിനിമയില് ശ്രദ്ധിക്കപ്പെടുന്നത്. ഇടക്കാലത്തു കോമഡി വേഷങ്ങളിലേക്ക് കടന്ന് ചിരിയുടെ പുതിയൊരു മുഖം സൃഷ്ടിക്കുകയുംചെയ്തു. സിബിമലയില് സംവിധാനം ചെയ്ത 'കിരീടം' എന്ന സിനിമയിലെ ചിരിപ്പിക്കുന്ന വില്ലന് ഹനീഫയുടെ അഭിനയ ജീവിതത്തിലെ നാഴികക്കല്ലായി മാറി. പിന്നീടങ്ങോട്ട് ചിരിപ്പിക്കുന്ന കഥാപാത്രങ്ങളിലൂടെ ഹനീഫ നടത്തിയ തേരോട്ടം പ്രേക്ഷകര് അംഗീകരിച്ചു കൊടുക്കുകയും ചെയ്തു.
അഭിനയജീവിതത്തിലെ തിരക്കുകള്ക്കിടയില് തിരക്കഥാകൃത്തും സംവിധായകനുമായി തമിഴിലും തെലുങ്കിലും യാത്ര നടത്തി. 'വാത്സല്യം', 'ഭീഷ്മാചാര്യ' എന്നീ സിനിമകളാണ് ഹനീഫ ഏറ്റവും ഒടുവില് സംവിധാനം ചെയ്തത്. അതിന് ശേഷം സിനിമ സംവിധാനം ചെയ്യാനുള്ള ഒരുക്കങ്ങള് നടന്നിരുന്നുവെങ്കിലും നടനെന്ന നിലയിലുള്ള തിരക്കുകള് കാരണം സംവിധായകനിലേക്ക് എത്താന് കഴിയാതെ പോയെന്ന് ഹനീഫ പറയുമായിരുന്നു.
ഇന്ത്യന് സിനിമയിലെ ഇതിഹാസ ഗോപുരങ്ങളായ മമ്മൂട്ടിയുടെയും മോഹന്ലാലിന്റെയും രജനീകാന്തിന്റെയും കമലഹാസന്റെയും തോളില് കയ്യിട്ടു നില്ക്കാന് കഴിയുന്ന അപൂര്വ്വം നടന്മാരില് ഒരാളായിരുന്നു കൊച്ചിന് ഹനീഫ. തമിഴ്നാടിന്റെ ആരാധ്യനായ മുന് മുഖ്യമന്ത്രിയും തിരക്കഥാകൃത്ത് കൂടിയായ കലൈഞ്ചര് കരുണാനിധിയുടെ വീട്ടില് അനുവാദമില്ലാതെ കടന്നുചെല്ലാന് അവകാശമുണ്ടായിരുന്ന ഒരേ ഒരാളായിരുന്നു കൊച്ചിന് ഹനീഫ എന്നതും പ്രത്യേകം ശ്രദ്ധേയമാണ്.
1948 മെയ് 5ന് എറണാകുളത്താണ് കൊച്ചിന് ഹനീഫയുടെ ജനനം. വെളുത്തേടത്ത് മുഹമ്മദിന്റെയും ഹാജിറയുടെയും രണ്ടാമത്തെ മകന്. 1970 കളിലാണ് ഹനീഫ തന്റെ ചലച്ചിത്ര ജീവിതം ആരംഭിക്കുന്നത്. മലയാളം, തമിഴ്, ഹിന്ദി എന്നീ ഭാഷകളിലായി 300 ഓളം സിനിമകളില് അഭിനയിച്ചു. 'സൂത്രധാരന്' എന്ന ചിത്രത്തിലെ അഭിനയത്തിന് 2001ല് മികച്ച സഹനടനുള്ള സംസ്ഥാന സര്ക്കാരിന്റെ പുരസ്കാരം ലഭിച്ചു.
1994 ലായിരുന്നു ഹനീഫയുടെ വിവാഹം. തലശ്ശേരി സ്വദേശിനിയായ ഫാസിലയാണ് ഭാര്യ. ഇവരുടെ മക്കളാണ് ഇരട്ടകളായ സഫയും മര്വ്വയും. ഹനീഫ ഈ ലോകത്തോട് വിട പറയുമ്പോള് കുട്ടികള്ക്ക് മൂന്നര വയസ്സേ ഉണ്ടായിരുന്നുള്ളൂ.
ഹനീഫയുടെ വേര്പാടില് അനാഥമായിപോയ ഭാര്യയും മക്കളും ഹനീഫയുടെ കുടുംബ വീട്ടില് നിന്ന് മാറി എറണാകുളത്തു ഒരു ഫ്ളാറ്റിലാണ് ഇപ്പോള് താമസിക്കുന്നത്.