സി എന്‍ എ-
പനജി:
ദാദാ സാഹെബ് ഫാല്‍ക്കെയ്ക്ക് ഭാരതരത്‌ന നല്‍കണമെന്നും അദ്ദേഹത്തിന്റെ ജീവിതം ആസ്പദമാക്കി ബയോപിക് ഇറക്കണമെന്നും ഫാല്‍ക്കെയുടെ ചെറുമകന്‍ ചന്ദ്രശേഖര്‍ പുസല്‍കര്‍. ഫാല്‍ക്കെയുടെ 150ാം ജന്മവാര്‍ഷികത്തോടനുബന്ധിച്ച് ഗോവ അന്താരാഷ്ട്ര ചലച്ചിത്ര വേദിയില്‍ സംഘടിപ്പച്ച പ്രത്യേക പരിപാടിയില്‍ സംസാരിക്കുകയായിരുന്നു അദ്ദേഹം.
ദാദാ സാഹെബ് ഫാല്‍ക്കെ പുരസ്‌കാരം സര്‍ക്കാര്‍ ഏര്‍പ്പെടുത്തിയിരുന്നില്ലെങ്കില്‍ തന്റെ മുത്തശ്ശന്റെ കലയും ജീവിതവും രണ്ടു പേജില്‍ ഒടുങ്ങിപ്പോവുമായിരുന്നുവെന്നും ചന്ദ്രശേഖര്‍ പറഞ്ഞു.
'സിനിമയില്‍ സെലിബ്രിറ്റികള്‍ വരികയും പോവുകയും ചെയ്യും. എന്നാല്‍ ദാദാ സാഹേബ് ഫാല്‍ക്കെ ഇവിടെ തന്നെ ഉണ്ടാകും. ഇന്ത്യന്‍ സിനിമയുള്ളിടത്തോളം കാലം അദ്ദേഹം ഓര്‍മിക്കപ്പെടും. ചലച്ചിത്രമേഖലയില്‍ 'മെയ്ക്ക് ഇന്‍ ഇന്ത്യ ക്യാമ്പയിന്‍' തുടങ്ങിവച്ച അദ്ദേഹം ഇന്ത്യന്‍ സിനിമയുടെ വഴികാട്ടിയാണ്. അദ്ദേഹത്തിന്റെ കയ്യില്‍ പണമില്ലായിരുന്നു. മുത്തശ്ശിയുടെ ആഭരങ്ങളും മറ്റും വിറ്റിട്ടാണ് സിനിമ ചെയ്യാന്‍ ആരംഭിച്ചത്.
അദ്ദേഹം പണമുണ്ടാക്കാനല്ല സിനിമ ചെയ്തത്. ഇന്ത്യന്‍ സിനിമയിലെ എല്ലാ തലമുറയ്ക്കും അദ്ദേഹം പ്രചോദനമായിരുന്നു. എന്തെങ്കിലും പഠിക്കണമെന്നുണ്ടെങ്കില്‍ പഠിക്കാന്‍ പ്രായം തടസ്സമല്ലെന്ന് വിശ്വസിക്കുകയും മറ്റുള്ളവര്‍ക്ക് മാതൃകയാവുകയും ചെയ്ത അദ്ദേഹത്തില്‍ നിന്ന് പഠിക്കേണ്ട ഏറ്റവും വലിയ പാഠം അതാണെന്നും ചന്ദ്രശേഖര്‍ പുസല്‍ക്കര്‍ പറഞ്ഞു.
