CNA
കൊച്ചി:
പ്രശ്ത നടന്‍ പ്രേംകുമാര്‍ എഴുതിയ 'ദൈവത്തിന്റെ അവകാശികള്‍' എന്ന പുസ്തകത്തിന്റെ കവര്‍ച്ചിത്രം എം മുകുന്ദന്‍, മമ്മൂട്ടി, മോഹന്‍ലാല്‍, സ്പീക്കര്‍ എം.ബി. രാജേഷ്, പ്രതിപക്ഷ നേതാവ് വി.ഡി. സതീശന്‍ എന്നിവര്‍ ചേര്‍ന്ന് പ്രകാശനം ചെയ്തു.
കോവിഡിന്റെ സാഹചര്രത്തില്‍ ഓണ്‍ലൈനായാണ് കവര്‍ച്ചിത്രം പ്രകാശനം നടന്നത്.
പുസ്തകത്തിന് ആശംസകള്‍ നേര്‍ന്നുകൊണ്ടുള്ള കുറിപ്പുകളും അവര്‍ ഫേസ്ബുക്കില്‍ പങ്കുവെച്ചു.
ഡി സി ബുക്‌സ് ഇംപ്രിന്റായ ലിറ്റ്മസാണ് പുസ്തകം പ്രസിദ്ധീകരിച്ചിരിക്കുന്നത്.
ഇതിനുമുമ്പും നിരവധി താരങ്ങള്‍ പുസ്തകങ്ങള്‍ എഴുതുകയും പ്രസിദ്ധീകരിക്കുകയും ചെയ്തിട്ടുണ്ട്. തങ്ങളുടെ അഭിനയ ജീവിതത്തെക്കുറിച്ചും കുടുംബ ജീവിതത്തെക്കുറിച്ചും അഭിനയപരീക്ഷണങ്ങളെക്കുറിച്ചുമൊക്കെയാണ് അവര്‍ എഴുതിയത്. എന്നാല്‍ അവരില്‍നിന്നൊക്കെ വ്യത്യസ്തനായി തന്റെ നിരീക്ഷണങ്ങളും നിലപാടുകളും അനുഭവങ്ങളും ആഗ്രഹങ്ങളും ചിന്തകളും മറ്റും പങ്കുവച്ചിരിക്കുകയാണ് 'ദൈവത്തിന്റെ അവകാശികള്‍' എന്ന ഈ പുസ്തകത്തിലൂടെ പ്രേംകുമാര്‍.
'ആനുകാലിക പ്രസിദ്ധീകരണങ്ങളില്‍ ഞാന്‍ എഴുതിയ തെരഞ്ഞെടുക്കപ്പെട്ട 22 ലേഖനങ്ങളാണ് 'ദൈവത്തിന്റെ അവകാശികള്‍' എന്ന ഈ പുസ്തകത്തിലുള്ളത്.
രാഷ്ട്രീയം, സാമൂഹികം, സാംസ്‌കാരികം, ആദ്ധ്യാത്മികം തുടങ്ങിയ വ്യത്യസ്ത വിഷയങ്ങളെ അധീകരിച്ചാണ് ഈ 22 ലേഖനങ്ങളും ഞാന്‍ എഴുതിയിട്ടുള്ളത്. അതിലൊരു ലേഖനത്തിന്റെ പേരാണ് ഡി.സി. ബുക്‌സ് ടൈറ്റിലായി തെരഞ്ഞെടുത്തത് ദൈവത്തിന്റെ അവകാശികള്‍. ഇത് കൂടാതെ പ്രമുഖ മാധ്യമപ്രവര്‍ത്തകന്‍ കെ.പി. മോഹന്‍സാര്‍ ഞാനുമായി നടത്തിയ നീണ്ട അഭിമുഖവും ഈ പുസ്തകത്തില്‍ ഉള്‍പ്പെടുത്തിയിട്ടുണ്ട്.
സിനിമാ അഭിനേതാക്കള്‍ക്ക് പൊതുവെ പ്രേക്ഷകര്‍ കല്‍പ്പിച്ച് നല്‍കുന്ന ഒരു മുഖമുണ്ടായിരിക്കും. അതവര്‍ സിനിമയില്‍ ചെയ്ത കഥാപാത്രങ്ങളിലൂടെ ലഭിക്കുന്നതാണ്. അതില്‍നിന്നൊക്കെ വ്യത്യസ്തമായൊരു മുഖം എനിക്കുമുണ്ടെന്ന് അടയാളപ്പെടുത്താനുള്ള എളിയ ശ്രമമാണ് ഈ പുസ്തകം.
തുമ്പാ സെന്റ് സേവിയേഴ്‌സ് കോളേജില്‍ പ്രീഡിഗ്രിക്ക് പഠിക്കുമ്പോള്‍ അവിടെ എന്നെ പഠിപ്പിച്ച അദ്ധ്യാപകനാണ് കവി കൂടിയായ പ്രൊഫ. മധുസൂദനന്‍ നായര്‍ സാര്‍. അദ്ദേഹമാണ് എന്റെ പുസ്തകത്തിന് അവതാരിക എഴുതിത്തന്നത്. അതും എന്റെ സന്തോഷം ഇരട്ടിപ്പിച്ചു. വ്യത്യസ്ത മേഖലയില്‍ പ്രവര്‍ത്തിക്കുന്നവര്‍ എന്ന നിലയിലാണ് മമ്മൂക്കയെയും ലാലേട്ടനെയും എം.ബി. രാജേഷിനെയും വി.ടി. സതീശനെയും മുകുന്ദന്‍ സാറിനെയും പ്രകാശനത്തിനായി ഞാന്‍ തെരഞ്ഞെടുത്തത്.
ആവശ്യമറിയിച്ചപ്പോള്‍ ഒരു മടിയും കൂടാതെ അവരത് നിര്‍വ്വഹിച്ച് തരികയും ചെയ്തു. എന്റെ ജീവിതത്തിലെ ഒരിക്കലും മറക്കാനാവാത്ത ദിനം കൂടിയാണത്.' പ്രേംകുമാര്‍ പറഞ്ഞു.
'ഈ ലേഖനങ്ങള്‍ മനുഷ്യനില്‍ കലാകാരന്‍ രൂപപ്പെട്ടു വന്നതിന്റെയും കലാകാരനിലൂടെ മനുഷ്യ മൂല്യങ്ങള്‍ പുനര്‍ജനിക്കുന്നതിന്റെയും അക്ഷരസാക്ഷ്യങ്ങളാണ്.
സത്യത്തെ, ഉദാത്താനുഭവമായി ഹൃദയത്തിലേക്കു പ്രക്ഷേപിക്കുന്ന ധീരമായ സംസ്‌കരണകര്‍മ്മമാണു കല. ആ കല അഭിനയത്തിലൂടെ മാത്രമല്ല അക്ഷരത്തിലൂടെയും സഫലമായി നിര്‍വഹിക്കാന്‍ തനിക്കു കഴിയുമെന്നുതന്നെ പ്രേംകുമാറിന്റെ ശൈലിയും വചനമര്യാദയും വിളിച്ചു പറയുന്നു.' എന്നാണ് പ്രൊഫ. വി. മധുസൂദനന്‍ നായര്‍, ഈ പുസ്തകത്തിന്റെ അവതാരിക എഴുതിയിരിക്കുന്നത്.
Online PR - CinemaNewsAgency.Com
