സി എന്‍ എ-
ചെന്നൈ:
തമിഴിലെ പ്രശസ്ത സംവിധായകന്‍ ശങ്കറിനെതിരെ എഗ്‌മോര്‍ മെട്രോപൊളിറ്റന് മജിസ്‌ട്രേറ്റ് 2ആം കോടതി ജാമ്യമില്ലാ വാറണ്ട് പുറപ്പെടുവിച്ചു. ഒരു കേസുമായി ബന്ധപ്പെട്ട് കോടതിയില്‍ തുടര്‍ച്ചയായി ഹാജരാകാതിരുന്നതിനാലാണ് ജാമ്യമില്ലാ വാറണ്ട് പുറപ്പെടുവിച്ചത്.
2010 ല്‍ മദ്രാസ് ഹൈക്കോടതിയില്‍ ആരുര്‍ തമിഴ്‌നാട് എന്ന എഴുത്തുകാരന്‍ ശങ്കറിനെതിരെ കേസ് ഫയല്‍ ചെയ്തിരുന്നു. അതേ വര്‍ഷം പുറത്തിറങ്ങിയ 'എന്തിരന്‍' തന്റെ 'ജൂഗീബ' എന്ന കഥയുടെ കോപ്പിയാണെന്ന് ആരോപിച്ചായിരുന്നു കേസ് ഫയല്‍ ചെയ്തത്. തന്റെ ആശയത്തില്‍ നിന്ന് 'എന്തിരന്‍' നര്‍മ്മാതാക്കള്‍ വലിയ സാമ്പത്തിക നേട്ടം ഉണ്ടാക്കിയിട്ടുണ്ടെന്നും അദ്ദേഹം ആരോപിച്ചു.
1996 ഏപ്രിലില്‍ 'ഇനിയ ഉദയം' എന്ന മാസികയില്‍ 'ജുഗീബ' പ്രസിദ്ധീകരിച്ചതായും ഇതേ കഥ 2007 ല്‍ 'ടിക് ടിക് ദീപിക' എന്ന നോവലായി വീണ്ടും പ്രസിദ്ധീകരിച്ചതായും അദ്ദേഹം കോടതിയെ അറിയിച്ചിരുന്നു. ഇതേ തുടര്‍ന്ന് ശങ്കറിനെതിരെ ഇന്ത്യന്‍ പീനല്‍ കോഡിലെ സെക്ഷന്‍ (420) വഞ്ചന കുറ്റത്തിനും പകര്‍പ്പവകാശ നിയമത്തിലെ മറ്റ് വകുപ്പുകളും ചേര്‍ത്ത് കേസ് എടുത്തിരുന്നു.
തനിക്കെതിരായ കേസുകള്‍ റദ്ദാക്കാണമെന്നാശ്യപ്പെട്ട് ശങ്കര്‍ 2019 ല്‍ മദ്രാസ് ഹൈക്കോടതിയെ സമീപിച്ചെങ്കിലും 2019 ജൂണില്‍ കോടതി അദ്ദേഹത്തിന്റെ അപേക്ഷ തള്ളുകയായിരുന്നു. അതിന് ശേഷം ശങ്കര്‍ സുപ്രീംകോടതിയില്‍ പോയെങ്കിലും ഫലമുണ്ടായില്ല.
2017 മുതല്‍ നടപടികളില്‍ വാദം കേള്‍ക്കുന്ന മജിസ്‌ട്രേറ്റ് കോടതി ഇപ്പോള്‍ സംവിധായകനെതിരെ ജാമ്യമില്ലാ വാറണ്ട് പുറപ്പെടുവിച്ചിരിക്കുകയാണ്.
ഫെബ്രുവരി 19 നകം 'എന്തിരന്‍' എന്ന സിനിമയുടെ സംവിധായകന്‍ കോടതിയില്‍ ഹാജരാകണമെന്ന് 2ആം മെട്രോപൊളിറ്റന് മജിസ്‌ട്രേറ്റ് കോടതി ജഡ്ജി റോസിലിന്‍ ദുരായ് ഉത്തരവിട്ടു.
