സി എന്‍ എ-
കൊച്ചി:
മലയാളികളുടെ സ്വകാര്യ അഹങ്കാരമായ ഗാനഗന്ധര്വന് യേശുദാസിന്റെ 81ആം ജന്മദിനമാണ് ഇന്ന്. നിരവധി തലമുറയെ തന്റെ സംഗീതത്തിലൂടെ ഉത്തേജിപ്പിച്ചിട്ടുള്ള യേശുദാസ് ഇത്തവണ പതിവ് തെറ്റിച്ച് പിറന്നാള്‍ ആഘോഷിക്കുന്നത് അമേരിക്കയിലെ ഡാളസ്സിലാണ്. കഴിഞ്ഞ 48 വര്‍ഷമായി മുടങ്ങാതെ തന്റെ പിറന്നാള്‍ കുടുംബ സമേതം, മൂകാംബിയമ്മയുടെ അടുത്താണ് ഭജനയിരുന്ന് കൊണ്ടാടിയിരുന്നത്.
ഇന്നത്തെ കൊറോണ സാഹചര്യത്തില്‍ മാര്‍ച്ചില്‍ വിമാന സര്‍വീസ് ആരംഭിക്കുന്നതോടെ മാത്രമേ അദ്ദേഹത്തിന് നാട്ടില്‍ എത്താന്‍ സാധിക്കുകയുള്ളു.
വരാനാവില്ലെങ്കിലും ദമ്പതീ സമേതം ചെയ്യേണ്ട ചണ്ഡികാഹോമം ഒഴിച്ചുള്ള പിറന്നാള്‍ പൂജാകര്‍മങ്ങളെല്ലാം നടത്താന്‍ മുഖ്യ അര്‍ച്ചകന്‍ ഗോവിന്ദ അഡിഗയെ ഏല്‍പ്പിച്ചിട്ടുണ്ട്.
ഡാളസ്സിലെ വീട്ടു പൂജാ മുറിയില്‍ വിളക്ക് കൊളുത്തി ജപ ധ്യാന ഗാനാരാധന ചെയ്യുമെന്നും പ്രാര്‍ഥനാനിരതനായി ദേവീ ക്ഷേത്ര ദര്‍ശനം നടത്തുമെന്നും അദ്ദേഹം അറിയിച്ചിട്ടുണ്ട്.
മാത്രമല്ല പിറന്നാളിനോട് അനുബന്ധിച്ച് സംഗീതജ്ഞന്‍ കാഞ്ഞങ്ങാട് രാമചന്ദ്രന്റെ നേതൃത്വത്തിലുള്ള മൂകാംബിക സംഗീതോത്സവം തന്റെ അസാന്നിധ്യത്തില്‍ പതിവ് പോലെ നടത്താന്‍ യേശുദാസ് അറിയിച്ചിട്ടുണ്ട്.
അതേസമയം, 81ആം ജന്മദിനം കൊണ്ടാടുന്ന ഗാനഗന്ധര്വന് പിറന്നാള്‍ സമ്മാനമായി 28 ഗായകര്‍ കൈകോര്‍ത്ത് സംഗീത വിഡിയോ ഒരുക്കിയിരിക്കുകയാണ്.
ശ്വേതാ മോഹന്‍ സംഗീതമൊരുക്കിയ ഗാനത്തിനു വരികള്‍ എഴുതിയിരിക്കുന്നത് ഹരിനാരായണനാണ്. ചിത്ര, എം.ജി. ശ്രീകുമാര്‍, സുജാത, ജി. വേണുഗോപാല്‍, കൃഷ്ണചന്ദ്രന്‍, ഉണ്ണി മേനോന്‍, ബിജു മേനോന്‍, മധു ബാലകൃഷ്ണന്‍, വിജയ് യേശുദാസ്, സുദീപ് കുമാര്‍, വിധുപ്രതാപ്, ഹരിശങ്കര്‍, സിതാര, മധുശ്രീ, രാജലക്ഷ്മി, ജ്യോത്സന, അഫ്‌സല്‍, ശ്രീനിവാസ്, ഗായത്രി, നിഷാദ് കെ.കെ, അനൂപ് ശങ്കര്‍, രവി ശങ്കര്‍, രാകേഷ് ബ്രഹ്മാനന്ദന്‍, ദേവാനന്ദ്, റിമി ടോമി, രഞ്ജിനി ജോസ്, ആലാപ് രാജു, ശ്വേത എന്നിവര്‍ ചേര്‍ന്നാണ് സംഗീത വിഡിയോയില്‍ പാടിയിരിക്കുന്നത്.
