സി എന് എ-
കൊച്ചി:
സിനിമാ പ്രേമികള് ഏറെ പ്രതീക്ഷയോടെ കാത്തിരുന്ന മോഹന്ലാല് - ജീത്തു ജോസഫ് ചിത്രം 'ദൃശ്യം 2' ഇന്നലെ രാത്രിയാണ് ഒടിടി പ്ലാറ്റ്ഫോമായ ആമസോണ് പ്രൈമില് റിലീസ് ചെയ്തു.
മികച്ച പ്രതികരണമാണ് രണ്ടാം ഭാഗത്തിനും ലഭിക്കുന്നത്.
എന്നാല് 'ദൃശ്യം 2' റിലീസ് ചെയ്ത് രണ്ട് മണിക്കൂറിനുള്ളില് വ്യാജ പതിപ്പ് ടെലിഗ്രാമില് എത്തുകയായിരുന്നു. ഇത് ആരാധകരേയും അണിയറപ്രവര്ത്തകരെയും നിരാശരാക്കുകയാണ്.
വ്യാജ പതിപ്പിറങ്ങിയത് ദൗര്ഭാഗ്യകരമാണെന്നും ആമസോണ് അത് തടയുമെന്ന് പ്രതീക്ഷിക്കുന്നുവെന്നും സംവിധായകന് ജീത്തു ജോസഫ് പറഞ്ഞു.
ചിത്രത്തിനുള്ള മികച്ചതെന്ന അഭിപ്രായം സന്തോഷിപ്പിക്കുന്നുണ്ടെന്നും എന്നാല് 'ദൃശ്യം1' നേക്കാള് നല്ലതെന്ന് അഭിപ്രായപ്പെട്ടത് തന്നെ ഞെട്ടിച്ചെന്നും ജിത്തു ജോസഫ് പറഞ്ഞു. നിലവിലെ സാഹചര്യങ്ങള് കൊണ്ടാണ് ചിത്രം തിയേറ്ററില് റിലീസ് ചെയ്യാന് പറ്റാതെ പോയത്.
തിയേറ്ററിലായിരുന്നെങ്കില് ചിത്രം രണ്ടാഴ്ച നിറഞ്ഞോടും. എന്നാല് ഫാമിലികള് തിയേറ്ററുകളിലേക്ക് വരാന് മടിക്കുമെന്നാണ് പല കുടുംബങ്ങളില് നിന്നും ഞങ്ങള്ക്ക് ലഭിച്ച ഫീഡ്ബാക്ക്. അതാണ് ഒടിടി റീലീസിന് കാരണമായതെന്നും ജീത്തു ജോസഫ് പറഞ്ഞു.
ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂരാണ് 'ദൃശ്യം 2' നിര്മ്മിച്ചിരിക്കുന്നത്.
ചിത്രത്തില് മോഹന്ലാലിനെ കൂടാതെ മീന, സിദ്ദിഖ്, ആശ ശരത്, മുരളി ഗോപി, അന്സിബ, എസ്തര്, സായ്കുമാര് എന്നിവരാണ് പ്രധാന വേഷങ്ങളില് എത്തുന്നത്.