അഞ്ജു അഷറഫ്-
കൊച്ചി:
ബോളിവുഡിലെ പ്രശസ്ത സംവിധായകന്‍ ആര്‍. ബാല്‍കി ഒരുക്കുന്ന ത്രില്ലര്‍ ചിത്രത്തില്‍ മലയാളത്തിന്റെ യൂത്ത് ഐക്കണ്‍ ദുല്‍ഖര്‍ സല്‍മാന്‍ നായക കഥാപാത്രത്തെ അവതരിപ്പിക്കുന്നു.
ദുല്‍ഖര്‍ സല്‍മാന്‍ അഭിനയിക്കുന്ന മൂന്നാമത്തെ ഹിന്ദി ചിത്രമാണിത്. വ്യത്യസ്ത പാറ്റേണിലുള്ള സിനിമകള്‍ ഒരുക്കി ശ്രദ്ധേയനായ ആര്‍. ബാല്‍കി രണ്ടുവര്‍ഷത്തെ കഥയൊരുക്കത്തിനുശേഷമാണ് ദുല്‍ഖറിനെ നായകനാക്കി ആറാമത്തെ ചിത്രമൊരുക്കുന്നത്.
ലോക്ക് ഡൗണ്‍ കാലം കഥയെഴുത്തിന്റെ കാലമായിരുന്നു. എല്ലാ ത്രില്ലറുകളും പോലെ നിഗൂഢതകളുള്ള ഒരു കഥയിലെ ശക്തനായ കഥാപാത്രത്തെയാണ് ദുല്‍ഖര്‍ അവതരിപ്പിക്കുന്നത്. കഥാപാത്രത്തിന് അനുയോജ്യനായ നടന്‍ തന്നെയാണ് ദുല്‍ഖര്‍ സല്‍മാന്‍. ചിത്രത്തിലെ നായികയെയും മറ്റു അഭിനേതാക്കളെയും ഉടന്‍ പ്രഖ്യാപിക്കും. സിനിമയുടെ നിര്‍മ്മാതാവും ബാല്‍കി തന്നെയാണ്.
2018 ലായിരുന്നു ബോളീവുഡില്‍ ദുല്‍ഖറിന്റെ അരങ്ങേറ്റം. ഇര്‍ഫാന്‍ ഖാനോടൊപ്പം 'കാര്‍വാന്‍' എന്ന സിനിമയില്‍ അഭിനയിച്ചു. അടുത്തവര്‍ഷം സോനം കപൂറിന്റെ 'സോയ ഫാക്ടര്‍' എന്ന സിനിമയില്‍ നായകവേഷം. ഇപ്പോള്‍ സംവിധായകന്‍ ബാല്‍കിയോടൊപ്പം മൂന്നാമത്തെ ഹിന്ദി ചിത്രം.
മലയാളത്തില്‍ ദുല്‍ഖര്‍ അഭിനയിച്ച 'കുറുപ്പ്' എന്ന സിനിമ റിലീസിന് തയ്യാറെടുക്കുകയാണ്. തമിഴില്‍ പ്രശസ്ത ഡാന്‍സ് മാസ്റ്റര്‍ ബ്രിന്ദ സംവിധാനം ചെയ്ത 'ഹേയ് സിനാമിക' എന്ന സിനിമയുടെ ചിത്രീകരണം പൂര്‍ത്തിയാക്കി എത്തിയ ദുല്‍ഖര്‍ മലയാളത്തില്‍ റോഷന്‍ ആന്‍ഡ്രൂസ് സംവിധാനം ചെയ്യുന്ന പുതിയ സിനിമയില്‍ ജോയിന്‍ ചെയ്യും.
ബോബി സഞ്ജയ് തിരക്കഥ എഴുതി റോഷന്‍ ആന്‍ഡ്രൂസ് സംവിധാനം ചെയ്യുന്ന സിനിമയുടെ ചിത്രീകരണം ജനുവരി അവസാനത്തില്‍ ആരംഭിക്കും. ഇതിന് പുറമെ ഒരു തെലുങ്ക് സിനിമയിലും ദുല്‍ഖര്‍ അഭിനയിക്കുന്നുണ്ട്.
മലയാളം, തമിഴ്, തെലുങ്ക്, ഹിന്ദി എന്നീ നാല് ഭാഷകളില്‍ നിര്‍മ്മിക്കുന്ന വ്യത്യസ്തങ്ങളായ സിനിമകളില്‍ അഭിനയിച്ചുകൊണ്ടിരിക്കുന്ന മലയാളത്തിലെ ഏകനടനാണ് ദുല്‍ഖര്‍ സല്‍മാന്‍.
