സി എന്‍ എ-
കൊല്ലം:
ദുല്‍ഖര്‍ സല്‍മാന്‍ സിനിമയിലെത്തിയിട്ട് 9 വര്‍ഷം പൂര്‍ത്തിയാവുകയാണ്. ഒമ്പതാം വര്‍ഷികത്തില്‍ ദുല്‍ഖര്‍ അഭിനയിക്കുന്നത് റോഷന്‍ ആന്‍ഡ്രൂസ് സംവിധാനം ചെയ്യുന്ന സിനിമയിലാണ്. സിനിമ നിര്‍മ്മിക്കുന്നതും ദുല്‍ഖര്‍ തന്നെയാണ്. സിനിമയുടെ ഷൂട്ടിംഗ് നടക്കുന്ന കൊല്ലത്ത്. റാവിസ് ഹോട്ടലിലാണ് ദുല്‍ഖറും സംഘവും താമസിക്കുന്നത്. ഒമ്പതാം വര്‍ഷത്തിന്റെ ആഘോഷ വേദിയായതും റാവിസ് ഹോട്ടലാണ്.
ക്ലാപ് ബോര്‍ഡിന്റെ മാതൃകയില്‍ തയാറാക്കിയ ബ്ലാക് ഫോറസ്റ്റ് കേക്ക് മുറിച്ച് ആഘോഷം ഗംഭീരമാക്കിയ ദുല്‍ഖര്‍ കൊല്ലത്തിന്റെ തനതായ ഭക്ഷണരുചി ആസ്വദിച്ച് 'ഉസ്താദ് ഹോട്ടലിലെ ഫൈസിയായി മാറി.
'സെക്കന്‍ഡ് ഷോ' എന്ന സിനിമയിലൂടെ ചലച്ചിത്ര രംഗത്തു തുടക്കം കുറിച്ച ദുല്‍ഖറിന്റെ ഒന്‍പതാം വാര്‍ഷികാഘോഷത്തിനു ചുക്കാന്‍ പിടിച്ചതു സംവിധായകന്‍ റോഷന്‍ ആന്‍ഡ്രൂസാണ്.
ദുല്‍ഖര്‍ നിര്‍മ്മിച്ച് റോഷന്‍ സംവിധാനം ചെയ്യുന്ന പുതിയ ചിത്രത്തിന്റെ പ്രധാന ലൊക്കേഷനാണ് കൊല്ലം. കഴിഞ്ഞ ദിവസം ഷൂട്ടിങ് കഴിഞ്ഞു മുറിയിലെത്തിയ ദുല്‍ഖറിനെ കാത്തിരുന്നത് സര്‍പ്രൈസ് കേക്ക് ആയിരുന്നു.
ദുല്‍ഖര്‍ തന്നെ കേക്കു മുറിച്ചു സഹപ്രവര്‍ത്തകര്‍ക്കു നല്‍കി. അപ്പവും നെയ്മീന്‍ നിര്‍വാണയും കണവ റോസ്റ്റും ഗ്രില്‍ഡ് ടൈഗര്‍ പ്രോണ്സുമായിരുന്നു അത്താഴം. ദുല്‍ഖറിന്റെ പഴ്‌സനല്‍ ഷെഫ് കൂടെ ഉണ്ടായിരുന്നെങ്കിലും ആഘോഷ ദിവസം ഹോട്ടല്‍ ഷെഫ് സുരേഷ് പിള്ള തയാറാക്കിയ വിഭവങ്ങള്‍ മതിയെന്നായിരുന്നു തീരുമാനം.
അപ്പച്ചട്ടിയില്‍ വാഴയില നിരത്തി അതില്‍ നെയ്മീന്‍ വച്ചു തേങ്ങാപ്പാല്‍ ഒഴിച്ചു കുറുക്കി ഉപ്പും കുരുമുളകും ഇഞ്ചിയും കറിവേപ്പിലയും ചേര്‍ത്തു പൊള്ളിച്ചെടുത്ത നെയ്മീന്‍ നിര്‍വാണ ദുല്‍ഖര്‍ ആസ്വദിച്ചു കഴിക്കുകയും അതിന്റെ പാചകരീതി ചോദിച്ചറിയുകയും ചെയ്തു. നാടന്‍ വിഭവങ്ങളോടാണ് ദുല്‍ഖറിന് പ്രിയമെന്നു ഹോട്ടല്‍ ഷെഫ് പറയുന്നു.
