സി എന്‍ എ-
തിരു:
വളരെ സന്തോഷം നിറഞ്ഞ കുട്ടിക്കാലമായിരുന്നു ഡയാനയുടേത്. പക്ഷേ, അവളൂടെ എല്ലാ മോഹങ്ങളേയും, സ്വപ്നങ്ങളേയും ചവിട്ടിമെതിച്ചു കൊണ്ട് ചെറിയ പ്രായത്തില്‍ തന്നെ അവള്‍ക്ക് വരണമാല്യം അണിയേണ്ടിവന്നു. ഡയാനയുടെ ജീവിതത്തിലെ എല്ലാ സന്തോഷങ്ങള്‍ക്കും വിലങ്ങു വീണു. വര്‍ഷങ്ങളുടെ വ്യത്യാസത്തില്‍ ഡയാനക്ക് രണ്ട് പെണ്‍കുഞ്ഞുങ്ങള്‍ പിറന്നു. അവളുടെ സന്തോഷങ്ങളും, സ്വപ്നങ്ങളൂം അവളൂടെ മക്കളിലൂടെ സാക്ഷാത്കരിക്കാന്‍ അവള്‍ അഹോരാത്രം കഷ്ടപ്പെട്ടു. ഭര്‍ത്താവിന്റ വരൂമാനത്തില്‍ ഒതുങ്ങുന്നതായിരുന്നില്ല അവളുടെ കുടുംബത്തിന്റ ചിലവുകള്‍... കഷ്ടപ്പാടുകള്‍ക്കിടയിലും അവള്‍ രണ്ട് മക്കളേയും നന്നായി പഠിപ്പിച്ചു. സാമ്പത്തിക ബാധ്യതകളാല്‍ അവള്‍ ഏറെ വേദനിച്ചു. ഭര്‍ത്താവുണ്ടെങ്കിലും എല്ലാ ചുമതലകളും അവളില്‍ മാത്രമായി. അങ്ങനെയിരിക്കെ, ഡയാനയുടെ മൂത്ത മകള്‍ക്ക് ഒരു വിവാഹാലോചന വന്നു. മകള്‍ സാന്ദ്രയെ സ്‌നേഹിക്കുന്ന ജോബി ആയിരുന്നു വരന്‍. മകള്‍ സാന്ദ്രക്കും ജോബിയെ വലിയ ഇഷ്ടമായിരുന്നു. അവരുടെ വിവാഹം വലിയ ആര്‍ഭാടങ്ങള്‍ ഒന്നുമില്ലാതെ ഡയാനക്ക് നടത്തിയെടുക്കാന്‍ കഴിഞ്ഞു. ഡയാന ബാധ്യതകളില്‍ നിന്നും ബാധ്യതകളിലേക്ക് പൊയ്‌ക്കൊണ്ടിരുന്നു. എങ്കിലും ഒരു മകളുടെയെങ്കിലും വിവാഹം കഴിഞ്ഞതില്‍ അവള്‍ക്ക് ആശ്വാസമായി. കുടുംബത്തിന് താങ്ങും തണലുമാകേണ്ട മരുമകനില്‍ നിന്നും ഡയാനക്കും കുടുംബത്തിനും വലിയ ക്രൂരതകള്‍ ഏല്‍ക്കേണ്ടി വന്നു. വളരെയധികം ട്വിസ്റ്റുകള്‍ നിറഞ്ഞ ഒരു സംഭവ കഥയാണ് 'ഏകാകിനി' എന്ന ചിത്രം പറയുന്നത്.
മലപ്പുറം, മഞ്ചേരിയിലുള്ള മുസ്ലീം യാഥാസ്ഥിതിക കുടുംബത്തില്‍ നിന്നും നര്‍ത്തകിയും, അഭിനേത്രിയുമായ അമ്പിളി അമ്പാളിയാണ് കേന്ദ്ര കഥാപാത്രമായ ഡയാനയെ അവതരിപ്പിക്കുന്നത്.
ബാനര്‍- ആമി ക്രിയേഷന്‍സ്, സംവിധാനം, ക്യാമറ- അജി മസ്‌ക്കറ്റ്, കഥ- ആമി അമ്പാളി, തിരക്കഥ, സംഭാഷണം- മനോജ്, ഗാന രചന, സംഗീതം- ഖാലിദ്, പ്രൊഡ. കണ്‍ട്രോളര്‍- ജയശീലന്‍ സദാനന്ദന്‍, പ്രൊഡ. എക്‌സിക്യൂട്ടീവ്- രാജേഷ് എം സുന്ദരം, കലാസംവിധാനം- മധുരാഘവന്‍, ചമയം- ബൈജു ബാലരാമപുരം, വസ്ത്രാലങ്കാരം- ശ്രീജിത്കുമാരപുരം, സ്റ്റുഡിയോ- ചിത്രാഞ്ജലി, പോസ്റ്റര്‍ ഡിസൈന്‍സ്- മനുദേവ്, സ്റ്റില്‍സ്- അജി മസ്‌ക്കറ്റ്, ഷംനാദ് എന്‍.ജെ, പി.ആര്‍.ഒ- അജയ് തുണ്ടത്തില്‍.
കേന്ദ്രകഥാപാത്രമായ ഡയാനയെ അവതരിപ്പിക്കുന്ന അമ്പിളി അമ്പാളിയോടൊപ്പം മലയാളത്തിലെ പ്രശസ്ത താരങ്ങളും അഭിനയിക്കുന്നു.
