വാഴൂര്‍ ജോസ്-
കൊച്ചി:
'വെള്ളി മൂങ്ങാ', 'മുന്തിരിവള്ളികള്‍ തളിര്‍ക്കുമ്പോള്‍', 'ആദ്യരാത്രി' എന്നീ സിനിമകള്‍ക്ക് ശേഷം ജിബു ജേക്കബ് സംവിധാനം ചെയ്യുന്ന ചിത്രമാണ് ആസിഫ് അലി നായക കഥാപത്രത്തെ അവതരിപ്പിക്കുന്ന 'എല്ലാം ശരിയാകും'.
ഡോ. പോള്‍സ് എന്റെര്‍ടൈന്‍മെന്റ് ആന്റ് തോമസ് തിരുവല്ലാ ഫിലിംസിന്റെ ബാനറില്‍ ഡോ. പോള്‍ വര്‍ഗീസും തോമസ് തിരുവല്ലയും ചേര്‍ന്നു നിര്‍മ്മിക്കുന്ന സിനിമ യുടെ ചിത്രീകരണം ഡിസംബര്‍ അവസാനം ഈരാറ്റുപേട്ടയില്‍ ആരംഭിക്കും. കാഞ്ഞിരപ്പള്ളി, കോട്ടയം എന്നിവിടങ്ങളിലായി ചിത്രീകരണം പൂര്‍ത്തിയാകും.
പൊളിറ്റിക്കല്‍ ഫാമിലി പശ്ചാത്തലത്തില്‍ പറയുന്ന ഗൗരവ പ്രാധാന്യമുള്ളൊരു പ്രമേയമാണ് 'എല്ലാം ശരിയാകും'. ഇടതു പക്ഷ യുവജന പ്രസ്ഥാനത്തിന്റെ സജീവ പ്രവര്‍ത്തകനായ ഒരു യുവാവിന്റെ പൊതുജീവിതവും കുടുംബജീവിതവും രസകരമായി പ്രതിപാദിക്കുന്ന സിനിമയില്‍ യുവനിരയിലെ ശ്രദ്ധേയനായ നടന്‍ ആസിഫ് അലി കേന്ദ്രകഥാപാത്രത്തെ അവതരിപ്പിക്കുന്നു. ഒരു നിയോജക മണ്ഡലത്തിലെ ഒരേയൊരു പഞ്ചായത്തു മാത്രമാണ് ഇടതുപക്ഷം ഭരിക്കുന്നുള്ളൂ. മറ്റു പഞ്ചായത്തുകളെല്ലാം ജനാധിപത്യ രാഷ്ടീയ പാര്‍ട്ടികളുടെ സ്വാധീനത്തില്‍പ്പെട്ടതാണ്.
അവര്‍ക്കിടയില്‍ തന്റെ രാഷ്ട്രീയ കാഴ്ച്ചപ്പാടുകളിലൂടെ ജീവിക്കുന്ന ഈ ഇടതുപക്ഷക്കാരന്റെ ജീവിതത്തിലെ പ്രതിസന്ധികളും വെല്ലുവിളികളും സംഘര്‍ഷങ്ങളുമാണ് ചിത്രത്തിലൂടെ ജിബു ജേക്കബ് അവതരിപ്പിക്കുന്നത്.
രജീഷാ വിജയനാണ് നായിക. സിദ്ദിഖ്, കലാഭവന്‍ ഷാജോണ്‍, സുധീര്‍ കരമന, ജോണി ആന്റണി, ജയിംസ്, സേതുലക്ഷമി, തുളസി (മഹാനദി ഫെയിം) ജോര്‍ഡി പൂഞ്ഞാര്‍ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
ഷാരിസ് മുഹമ്മദിന്റേതാണ് തിരക്കഥ. ഹരി നാരായണന്റെ വരികള്‍ക്ക് ഔസേപ്പച്ചന്‍ ഈണം പകര്‍ന്നിരിക്കുന്നു. ശ്രീജിത്ത് നായര്‍ ഛായാഗ്രഹണവും സൂരജ് ഇ.എസ് എഡിറ്റിംഗും നിര്‍വ്വഹിക്കുന്നു. കലാസംവിധാനം- ദിലീപ് നാഥ്. കോസ്റ്റ്യൂം ഡിസൈന്‍- നിസ്സാര്‍ റഹ്മത്ത്, മേക്കപ്പ്- റഹിം കൊടുങ്ങല്ലുര്‍, സ്റ്റില്‍സ്- ലിബിസണ്‍ ഗോപി, അസ്സോസ്സിയേറ്റ് ഡയക്ടര്‍- രാജേഷ് ഭാസ്‌ക്കരന്‍, പ്രൊഡക്ഷന്‍ കണ്‍ട്രോളര്‍- മനോജ് പൂങ്കുന്നം.
എല്ലാം ശരിയാകും സെന്‍ട്രല്‍പിക്‌ചേഴ്‌സ് റിലീസ് ഈ ചിത്രം പ്രദര്‍ശനത്തിനെത്തിക്കും. പിആര്‍ഒ- വാഴൂര്‍ ജോസ്.
