സി എന് എ-
ഈരാറ്റുപേട്ട:
ജിബു ജേക്കബ് സംവിധാനം ചെയ്യുന്ന 'എല്ലാം ശരിയാകും' എന്ന സിനിമയുടെ ചിത്രീകരണം ഈരാറ്റുപേട്ടയില് ആരംഭിച്ചു. രാഷ്ട്രീയ പശ്ചാത്തലത്തില് കുടുംബബന്ധങ്ങളുടെ കഥ പറയുന്ന സിനിമയാണ് ആസിഫ് അലി നാകനാവുന്ന 'എല്ലാം ശരിയാകും'. ദിനേശ് എന്ന കേന്ദ്ര കഥാപാത്രത്തെയാണ് അസിഫ് അലി അവതരിപ്പിക്കുന്നത്.
സിനിമയുടെ ആരംഭം ദിവസം നടന്ന പൂജ ചടങ്ങില് എംഎല്എമാരായ പി.സി.ജോര്ജ്, മാണി.സി. കാപ്പന് എന്നിവര് ആദ്യഭദ്രദീപം തെളിയിച്ചു. തുടര്ന്ന് സിദ്ദിഖ്, രെജീഷാ വിജയന്, തുളസി (ശങ്കരാഭരണം ഫെയിം) എന്നിവരും അലക്സ് ജോര്ജ് (ഷാജി സെന്ട്രല് പിക്ച്ചേര്സ്), സംഗീത സംവിധായകന് ഔസേപ്പച്ചന് എന്നിവര് ചേര്ന്ന് ഈ ചടങ്ങ് പൂര്ത്തികരിച്ചു.
സംഗീത സംവിധായകന് ഔസേപ്പച്ചന്സ്വിച്ചോണ് കര്മ്മവും നിര്മ്മാതാവ് ഡോ.പോള് വര്ഗീസ് ഫസ്റ്റ് ക്ലാപ്പും നല്കി.
സിദ്ദിഖ്, രജീഷാ വിജയന്, തുളസി എന്നിവര് ആദ്യ രംഗത്തില് അഭിനയിച്ചു.
നിയുക്ത മുഖ്യമന്ത്രി ചാക്കോ സാര് എന്ന അതിശക്തമായ കഥാപാത്രത്തെയാണ് സിദ്ദിഖ് ഈ ചിത്രത്തില് അവതരിപ്പിക്കുന്നത്.
ഭാര്യ മറിയാമ്മയായി തുളസിയും മകള് ആന്സിയായി രെജീഷയും വേഷമിടുന്നു.
പ്രശസ്തമായ 'ശങ്കരാഭരണം' സിനിമയില് ആണ്കുട്ടിയെ അവതരിപ്പിച്ചത് തുളസിയാണ്. ഇതൊരു കൗതുകമാണന്ന് പി.സി.ജോര്ജ് എം.എല്.എ പറഞ്ഞു.
ഇടതുപക്ഷയുവജനപ്രസ്ഥാനത്തിന്റെ സജീവ പ്രവര്ത്തകനായ വിനീത് എന്ന കഥാപാത്രത്തെ പ്രധാനമായും കേന്ദ്രീകരിച്ചു കൊണ്ടാണ് ഈ ചിത്രത്തിന്റെ കഥാവികസനം.
രണ്ട് ആശയങ്ങള് തമ്മിലുള്ള ഏറ്റുമുട്ടലുകള് കുടുംബ ബന്ധങ്ങളിലേക്കു കൂടി കടക്കുന്നിടത്താണ് പുതിയ വഴിത്തിരിവ് ഉണ്ടാകുന്നത്.
കലാഭവന് ഷാജോണ്, ജോണി ആന്റണി, ബാലു വര്ഗീസ്, ഇന്ദ്രന്സ്, ജയിംസ് ഏല്യാ, സജിന്, ജെന്സണ് ആലപ്പാട്ട്, ജോര്ഡി, അഞ്ജു മേരി തോമസ് തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.
ഷാരിസ് മുഹമ്മദിന്റേതാണ് തിരക്കഥ. ഹരി നാരായണന്റെ വരികള്ക്ക് ഒസേപ്പച്ചന് ഈണം പകര്ന്നിരിക്കുന്നു. ശ്രീജിത്ത് നായര് ഛായാഗ്രഹണവും സൂരജ് ഇ.എസ്. എഡിറ്റിംഗും നിര്വ്വഹിക്കുന്നു, കലാസംവിധാനം- ദിലീപ് നാഥ്, മേക്കപ്പ്- റഹിം കൊടുങ്ങല്ലൂര്, കോസ്റ്റും ഡിസൈന്- നിസ്സാര് റഹ്മത്ത്, സ്റ്റില്സ്- ലിബിസണ് ഗോപി, ചീഫ് അസ്സോസ്സിയേറ്റ് ഡയറക്ടര്- രാജേഷ് ഭാസ്ക്കരന്, അസ്സോസിയേറ്റ് ഡയറക്ടര്- ദിപില്ദേവ്, അസിസ്റ്റന്റ് ഡയറക്ടര്സ്- ഷിന്റോസണ്ണി, ഷബില് അസീസ്, ശരണ്.
പ്രൊഡക്ഷന് എക്സിക്കുട്ടീവ്സ്- ഷിന്റോ ഇരിങ്ങാലക്കുട, ഉണ്ണി പൂങ്കുന്നം. പ്രൊഡക്ഷന് കണ്ട്രോളര്- മനോജ് പൂങ്കുന്നം. ഡോ.പോള് എന്റര്ടെയിന്മെന്റ്സ് ആന്റ് തോമസ് തിരുവല്ല ഫിലിംസിന്റെ ബാനറില് ഡോ. പോള് വര്ഗീസും, തോമസ് തിരുവല്ലയും ചേര്ന്നു നിര്മ്മിക്കുന്ന ഈ ചിത്രത്തിന്റെ ചിത്രീകരണം പുരോഗമിക്കുന്നു.
സെന്ട്രല്പിക്ച്ചേഴ്സ് ഈ ചിത്രം പ്രദര്ശനത്തിനെത്തിക്കുന്നു. പിആര്ഒ- വാഴൂര് ജോസ്.