സി എന്‍ എ-
കൊച്ചി:
ഫഹദ് ഫാസില്‍ വല്ലാതെ മെലിഞ്ഞിരിക്കുന്നു. ഒറ്റനോട്ടത്തില്‍ ഇത് ഫഹദ് ഫാസില്‍ തന്നെയാണോ എന്ന് സംശയിച്ചു പോകുന്ന രൂപം. ശരീരം വലിഞ്ഞു കവിള്‍ ഒട്ടി ഇതില്‍ കൂടുതല്‍ മെലിയാന്‍ പറ്റുമെന്ന് തോന്നുന്നില്ല. മാസങ്ങള്‍ക്കു മുമ്പ് ഇങ്ങനെ ഒരു ചിത്രം പുറത്തുവന്നപ്പോള്‍ 'മാലിക്' എന്ന സിനിമയ്ക്ക് വേണ്ടി തടി കുറച്ചതാണെന്നുപറഞ്ഞു കേട്ടു. ആ സിനിമയില്‍ ഫഹദിന് രണ്ട് ഗെറ്റപ്പുണ്ട്. അതിലൊന്ന് ഇങ്ങനെയാണത്രേ. ഫഹദിന്റെ ആരാധകര്‍ അത് വിശ്വസിക്കുകയും ചെയ്തു. മഹേഷ് നാരായണന്‍ സംവിധാനം ചെയ്യുന്ന 'മാലിക്' എല്ലാ വര്‍ക്കുകളും പൂര്‍ത്തിയായി റിലീസ് ചെയ്യാന്‍ ഒരുങ്ങി നില്‍ക്കുകയാണ്. വലിയ മുതല്‍ മുടക്കുള്ള സിനിമയാണ്.
പക്ഷേ ഇപ്പോള്‍ പുറത്തുവന്നിരിക്കുന്ന ഫഹദിന്റെ ചിത്രമാണ് ചലച്ചിത്ര പ്രേമികളില്‍ അമ്പരപ്പ് ഉണ്ടാക്കിയിരിക്കുന്നത്. മാലിക്കിനെ ചിത്രീകരണം പൂര്‍ത്തിയായി മാസങ്ങള്‍ക്കുശേഷം ഫഹദിനെ കാണുമ്പോഴും മെലിഞ്ഞൊട്ടിയാണിരിക്കുന്നത്. 'മാലിക്' കഴിഞ്ഞ് 'സി യു സൂണ്‍...' വന്നു അതിനുശേഷം അഭിനയിക്കുന്നത് നടന്‍ ദിലീഷ് പോത്തന്‍ സംവിധാനം ചെയ്യുന്ന 'ജോജി' എന്ന സിനിമയിലാണ്. എരുമേലിയിലും പരിസര പ്രദേശങ്ങളിലുമായി സിനിമയുടെ ചിത്രീകരണം പുരോഗമിക്കുകയാണ്. ആ സെറ്റില്‍ നിന്ന് ഒരു സംഭവവും ഒരു ഫോട്ടോ പോലും പുറത്തു പോകരുതെന്ന് കര്‍ശന ഉത്തരവുണ്ടെന്നാണ് അറിഞ്ഞത്. എന്നിട്ടും ഫഹദ് ഫാസിലിന്റെ ചിത്രം പുറത്തുവന്നു. അതാണിപ്പോള്‍ സോഷ്യല്‍ മീഡിയയില്‍ ചര്‍ച്ചയായിരിക്കുന്നത്. മാലിക്കില്‍ മെലിഞ്ഞുണങ്ങിയ ഫഹദ് തന്നെയാണ് ജോജിയിലും അഭിനയിക്കുന്നത്. ദിലീഷ് പോത്തന്‍ സിനിമകളില്‍ ഫഹദ് അവതരിപ്പിക്കുന്ന കഥാപാത്രം എങ്ങനെയുള്ളതാണെന്ന് മുന്‍കൂട്ടി പറയാന്‍ കഴിയില്ല. കാരണം മഹേഷിന്റെ പ്രതികാരം തൊണ്ടിമുതലും ദൃക്‌സാക്ഷിയും എന്നീ സിനിമകളില്‍ ഫഹദും ദിലീഷ് പോത്തനും തമ്മിലുള്ള കെമിസ്ട്രി പ്രേക്ഷകര്‍ കണ്ടതാണ്. അതേ ടീമിന്റെ മൂന്നാമത്തെ ചിത്രമാണ് ജോജി. അത്ഭുതങ്ങള്‍ സംഭവിക്കാം.
