സി എന്‍ എ-
കൊച്ചി:
സിനിമ മേഖലയില്‍ കാസ്റ്റിംഗ് കാള്‍ തട്ടിപ്പ് വ്യാപകമാകുന്നു. മുമ്പ് ഇതുമായി ബന്ധപ്പെട്ട് ധാരാളം വാര്‍ത്തകള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്, പോലീസ് നടപടികള്‍ ഉണ്ടായിട്ടുമുണ്ട്. എന്നിട്ടും ഇക്കാര്യത്തില്‍ വേണ്ടത്ര ജാഗ്രത പുലര്‍ത്താന്‍ സിനിമാ മോഹവുമായി നടക്കുന്നവര്‍ തയ്യാറാവുന്നില്ല എന്നത് അമ്പരപ്പിക്കുന്ന വസ്തുതയാണ്. തട്ടിപ്പിനിരയാകുന്നവരില്‍ അധികവും യുവാക്കളും യുവതികളുമാണ്. സാമ്പത്തികമായും ശാരീരികമായും തട്ടിപ്പിന് ഇരയായവര്‍ പുറത്ത് പറയാനും പോലീസില്‍ പരാതിപ്പെടാനും തയ്യാറാകാത്തതാണ് വ്യാജ കാസ്റ്റിംഗ് കാള്‍ നടത്തുന്നവരുടെ ധൈര്യം.
കാസ്റ്റിംഗ് കാള്‍ പ്രഖ്യാപനം ഇപ്പോള്‍ സോഷ്യല്‍ മീഡിയ ഗ്രൂപ്പുകള്‍ വഴിയാണ് പലരും നടത്തുന്നത്. സിനിമയുമായി ബന്ധമില്ലാത്തവര്‍ സിനിമാക്കാരാണെന്നു പറഞ്ഞാണ് ഇത്തരം തട്ടിപ്പുകള്‍ നടത്തുന്നത്. ഇന്‍ഡസ്ട്രിയിലെ പ്രമുഖരായ വ്യക്തികളെ അറിയാം, അവരുടെ സിനിമകളില്‍ പ്രവര്‍ത്തിച്ചിട്ടുണ്ട്, മലയാള സിനിമയിലെ പ്രശസ്തരായ നായകനും നായികയും ഞങ്ങളുടെ സിനിമയില്‍ അഭിനയിക്കുന്നു എന്നൊക്കെപറഞ്ഞാണ് സിനിമയില്‍ അഭിനയിക്കാന്‍ ആളെ സംഘടിപ്പിച്ചു തട്ടിപ്പ് നടത്തുന്നത്.
ഒരു സിനിമയില്‍ പലതരത്തിലുള്ള കഥാപാത്രങ്ങള്‍ ഉണ്ടാവും. സംഭാഷണം പറയുന്ന ചെറിയ കഥാപാത്രത്തിന് 25000 രൂപയും കൂടുതല്‍ സീനില്‍ കൂടുതല്‍ സംഭാഷണം ഉള്ള കഥാപാത്രത്തിന് ഒരു ലക്ഷവുമൊക്കെയാണ് ചോദിച്ചു വാങ്ങുന്നത്. പൈസ കൊടുക്കാന്‍ തയ്യാറുള്ളവരെ വച്ച് ഫോട്ടോ ഷൂട്ട്, മേക്കപ്പ് ടെസ്റ്റ്, അങ്ങനെ പലതരം ഇടപാടുകള്‍ ഉണ്ട്. പെണ്‍കുട്ടികളെ വെച്ച് നടത്തുന്ന ഫോട്ടോഷൂട്ട് പ്രത്യേകം ശ്രദ്ധിക്കേണ്ട കാര്യമാണ്.
അടുത്ത സമയത്ത് നടന്ന ഒരു കാസ്റ്റിംഗ് കോള്‍ തട്ടിപ്പിന്റെ കഥ വ്യക്തമാക്കുന്ന ഓഡിയോ ടേപ്പ് പുറത്തുവരുകയുണ്ടായി.
'തെരുവു നക്ഷത്രങ്ങള്‍' എന്ന സിനിമയുടെ സംവിധായകനും ഇപ്പോള്‍ സോഷ്യല്‍ മീഡിയയില്‍ വൈറലായ '102', 'മോഡല്‍' എന്നീ ഷോര്‍ട്ട് ഫിലിമുകളും ഒരുക്കിയ അമീര്‍ അലി. 'വ്യാജ കാസ്റ്റിംഗ് കോള്‍' സംഘത്തിലെ പ്രധാന കണ്ണിയുമായി നടത്തിയ ഫോണ്‍ സംഭാഷണമാണ് പുറത്തായിരിക്കുന്നത്.
'കൃഷ്ണപുരത്തെ വീരസേന' എന്ന സിനിമയുടെ തിരക്കഥ മൂകാംബികയില്‍ പൂജ ചെയ്യുന്നതിന്റെ ദൃശ്യങ്ങള്‍ കാണിച്ചു 70 കോടി രൂപ മുടക്കി നിര്‍മ്മിക്കുന്ന സിനിമയാണ്, പൃഥ്വിരാജും നയന്‍താരയും അഭിനയിക്കുന്നു എന്നൊക്കെ സോഷ്യല്‍ മീഡിയ വഴി പ്രചരണം നടത്തിയാണ് കാസ്റ്റിംഗ് കോള്‍ തട്ടിപ്പ് നടന്നത്.
അഭിനയ മോഹവുമായി എത്തിയവരോട് ഇരുപത്തി അയ്യായിരം മുതല്‍ ഒരു ലക്ഷം രൂപ വരെയാണ് ആവശ്യപ്പെട്ടതത്രേ. ഇത്തരം തട്ടിപ്പുകള്‍ സിനിമയില്‍ പ്രവര്‍ത്തിക്കുന്നവരെയും സിനിമ സംവിധാനം ചെയ്യാന്‍ ഒരുങ്ങുന്ന ചെറുപ്പക്കാരെയും യഥാര്‍ത്ഥ കലാകാരന്മാരെയും ദോഷകരമായി ബാധിക്കുകതന്നെ ചെയ്യും. സിനിമയില്‍ അവസരം നല്‍കാമെന്ന് വ്യാജ വാഗ്ദാനം നല്‍കി ആളുകളെ ചൂഷണം ചെയ്യുന്ന വാര്‍ത്തകള്‍ ദിനംപ്രതി കേട്ടുകൊണ്ടിരിക്കുകയാണ്. നിരവധി പരാതികള്‍ഫെഫ്കയില്‍ കിട്ടുന്നുണ്ട്. കാസ്റ്റിംഗ്കാള്‍ യഥാര്‍ത്ഥമാണോ എന്ന് അന്വേഷിക്കണം. എടുത്തുചാടി ചതിയില്‍ വീഴരുതെന്ന് ഫെഫ്ക മുന്നറിയിപ്പുനല്‍കുന്നു. കാസ്റ്റിംഗ് കാള്‍ നടത്തുന്നവരുടെ വിവരങ്ങള്‍ ഫെഫ്ക്കയില്‍ അറിയിക്കാനും വ്യക്തിപരമായി പരിചയമില്ലാത്തവരുടെ കാസ്റ്റിംഗ് കോളുകള്‍ ഫോര്‍വേഡ് ചെയ്യരുതെന്നും നിര്‍ദേശമുണ്ട്. സിനിമയുമായി യാതൊരു ബന്ധവുമില്ലാത്തവരാണ് സിനിമ മേഖലയ്ക്കു മൊത്തം അവമതിപ്പ് ഉണ്ടാക്കുന്ന ഇത്തരം നിയമവിരുദ്ധ പ്രവര്‍ത്തനങ്ങള്‍ക്ക് നേതൃത്വം നല്‍കുന്നത്.
സിനിമാ രംഗത്തേക്കു വരാന്‍ ആഗ്രഹിക്കുന്നവര്‍ ഇക്കാര്യത്തില്‍ കൂടുതല്‍ ജാഗ്രത പുലര്‍ത്തണമെന്ന് ഫെഫ്ക ജനറല്‍ സെക്രട്ടറി ബി. ഉണ്ണികൃഷ്ണന്‍ നേരത്തെ പ്രസ്താവന ഇറക്കിയിരുന്നു. അത് നിലനില്‍ക്കെയാണ് കാസ്റ്റിംഗ് കാള്‍ തട്ടിപ്പ്തുടരുന്നത്.
