CNA
കൊച്ചി:
കോഴിക്കോടന്‍ ഭാഷയും ശുദ്ധമായ നര്‍മ്മ പ്രകടനവും കൊണ്ട് മലയാളി പ്രേക്ഷകന്റെ പ്രിയ താരമായി മാറിയ ഹരീഷ് കണാരന്‍ നായകനായി അഭിനയിക്കുന്ന പുതിയ ചിത്രത്തില്‍ സൗബിന്‍ ഷാഹിറും സുപ്രധാനമായ ഒരു കഥാപാത്രത്തെ അവതരിപ്പിക്കുന്നു.
ഇനിയും നാമകരണം ചെയ്തിട്ടില്ലാത്ത ഈ ചിത്രം സംവിധാനം ചെയ്യുന്നത് നവാഗതനായ ബിജോയ് ജോസഫാണ്.
മഹേഷ് നാരായണന്‍, വി.കെ. പ്രകാശ്, ജോസ് സെബാസ്റ്റ്യന്‍ എന്നിവര്‍ക്കൊപ്പം പ്രവൃര്‍ത്തിച്ചു പോന്നിരുന്ന വ്യക്തിയാണ് ബിജോയ് ജോസഫ്.
ജെമിനി സ്റ്റുഡിയോസ് അവതരിപ്പിക്കുന്ന ഈ ചിത്രം റിയാണോ റോസ് പ്രൊഡക്ഷന്‍സിന്റെ ബാനറില്‍ ജോണ്‍ കുടിയാന്‍മലയും ഹരീഷ് കണാരനും ചേര്‍ന്നാണ് ഈ ചിത്രം നിര്‍മ്മിക്കുന്നത്.
ഈ ചിത്രം തികച്ചും ഗ്രാമീണാന്തരീക്ഷത്തിലൂടെ ഒരു സര്‍ക്കാര്‍ ജീവനക്കാരന്റെ ജീവിതത്തില്‍ അരങ്ങേറുന്ന സംഭവങ്ങള്‍ രസകരവും ഹൃദയസ്പര്‍ശിയുമായ മുഹൂര്‍ത്തങ്ങളിലൂടെ അവതരിപ്പിക്കുകയാണ് ഈ ചിത്രത്തിലൂടെ.
വര്‍ണ്ണപ്പൊലിമയില്ലാതെ ജീവിതത്തിന്റെ യഥാര്‍ത്ഥ്യങ്ങള്‍ക്കാണ് ഈ ചിത്രം പ്രാധാന്യം നല്‍കുന്നത്.
ഇതിലെ ഉല്ലാസ് എന്ന കഥാപാത്രം നമ്മുടെ സമൂഹത്തിലെ നാം ഓരോരുത്തരുടേയും പ്രതിനിധിയായിത്തന്നെ കണക്കാക്കാം.
ചിത്രത്തില്‍ അജു വര്‍ഗീസ്, സലിംകുമാര്‍, ജോണി ആന്റണി, ഇടവേള ബാബു, നിര്‍മ്മല്‍ പാലാഴി, സരയൂ, സീനത്ത്, എന്നിവരും മറ്റ് പ്രധാന കഥാപാത്രങ്ങളെ അവതരിപ്പിക്കുന്നു.
കഥ- ബിജോയ് ജോസഫ്, തിരക്കഥ, സംഭാഷണം- പോള്‍ വര്‍ഗീസ്.
ഹരിനാരായണന്റെ വരികള്‍ക്ക് എബി സാല്‍വിന്‍ ഈണം പകര്‍ന്നിരിക്കുന്നു. മനോജ പിള്ളയാണ് ഛായാഗ്രാഹകന്‍.
എഡിറ്റിംഗ്- നൗഫല്‍ അബ്ദുള്ള, കലാസംവിധാനം- ത്യാഗു തവനൂര്‍, കോസ്റ്റ്യം ഡിസൈന്‍- ലിജി പ്രേമന്‍, മേക്കപ്പ്- ഹസ്സന്‍ വണ്ടൂര്‍, പ്രൊഡക്ഷന്‍ എക്‌സിക്കുട്ടിവ്- അഭിലാഷ് അര്‍ജുന്‍, പ്രൊഡക്ഷന്‍ കണ്‍ട്രോളര്‍- റിച്ചാര്‍ഡ്.
വെള്ളൂര്‍, കൊച്ചി, അങ്കമാലി എന്നിവിടങ്ങളിലായി ഈ സിനിമയുടെ ചിത്രീകരണം പൂര്‍ത്തിയാകും.
- വാഴൂര്‍ ജോസ്.
ഫോട്ടോ- ശ്രീജിത്ത് ചെട്ടിപ്പടി.
