അഞ്ജു അഷറഫ്-
കൊച്ചി:
മലയാള സിനിമയെ ലോക പ്രേക്ഷകരിലേക്കെത്തിക്കാന്‍ ശക്തമായ ശ്രമങ്ങള്‍ വേണമെന്ന് ഓപ്പണ്‍ ഫോറം അഭിപ്രായപ്പെട്ടു.
രാജ്യാന്തര ചലച്ചിത്ര മേളയുടെ ഭാഗമായി തന്നെ ഫിലിം മാര്‍ക്കറ്റുകള്‍ പോലുള്ള സംരംഭങ്ങള്‍ ആവിശ്യമാണ്. ലോകമെമ്പാടുമുള്ള സിനിമകള്‍ നമ്മുടെ മേളയില്‍ പ്രദര്‍ശനത്തിനെത്തിക്കാന്‍ സാധിക്കുന്നുണ്ട്.
നമ്മുടെ സിനിമകളും ലോകമെമ്പാടുമുള്ള മേളകളിലും പ്രേക്ഷകരിലുമെത്തിക്കാന്‍ സാധിക്കണം. ചലച്ചിത്രമേളകളിലൂടെ ഉയര്‍ന്നുവരുന്ന സംവിധായകര്‍ക്ക് അവരുടെ സിനിമകള്‍ നിര്‍മ്മിക്കാനും പ്രദര്‍ശിപ്പിക്കുവാനും ഉള്ള അവസരങ്ങള്‍ മേളയുടെ ഭാഗമായി തന്നെ സൃഷ്ട്ടിക്കപ്പെടണം.
പല വിദേശ മേളകളും തിരക്കഥാരചനക്കും ചലച്ചിത്ര നിര്‍മ്മാണത്തിനുമായി പ്രത്യേക ഫണ്ടുകള്‍ നവാഗത സംവിധായകര്‍ക്ക് നല്‍കുന്നുണ്ട്. ഐ എഫ് എഫ് കെ യുടെ ഭാഗത്തുനിന്നും അത്തരം നടപടികള്‍ ഉണ്ടാകണമെന്നും ഓപ്പണ്‍ ഫോറം ആവശ്യപ്പെട്ടു.
മലയാള സിനിമകളെ ലോക വേദികളിലെത്തിക്കാന്‍ ചലച്ചിത്ര അക്കാദമിയുടെ ഭാഗത്തു നിന്നും നീക്കങ്ങള്‍ തുടങ്ങിയെന്നും അതിനായി അക്കാദമിയുടെ ആസ്ഥാനത്ത് സ്ഥിരം സംവിധാനം ഏര്‍പ്പെടുത്താനുള്ള ശുപാര്‍ശ സര്‍ക്കാരിന്റെ പരിഗണനയിലാണെന്നും അക്കാദമി സെക്രട്ടറി അജോയ് ചന്ദ്രന്‍ പറഞ്ഞു. സംവിധയകരായ സജിന്‍ ബാബു, കമല്‍ കെ എം, ജബ്ബാര്‍ കല്ലറക്കല്‍, ജീവ കെ. വി സന്ദീപ് രവീന്ദ്രന്‍ തുടങ്ങിയവര്‍ ചര്‍ച്ചയില്‍ പങ്കെടുത്തു.
