അഞ്ജു അഷറഫ്-
തിരു:
ആവിഷ്കാര സ്വാതന്ത്ര്യത്തിന് മേല് ഭരണകൂടങ്ങളുടെ നിയന്ത്രണം മികച്ച ചിത്രങ്ങളുടെ സൃഷ്ടിക്ക് തടസമാണെന്നും വര്ത്തമാനകാലത്തെ നിയന്ത്രണങ്ങള് സ്വതന്ത്ര ചിന്തകളുടെയും ചലച്ചിത്ര മേളകളുടെയും ഭാവി ചോദ്യചിഹ്നമാക്കി മാറ്റിയിരിക്കുകയാണെന്നും 'നസിര്' എന്ന ചിത്രത്തിന്റെ സംവിധായകന് അരുണ് കാര്ത്തിക് പറഞ്ഞു . ഒ.ടി.ടി. പ്ലാറ്റ്ഫോമുകളെപോലും ഭരണകൂടം നിയന്ത്രിക്കുകയാണ്. കലയുടെ സമസ്ത മേഖലകളിലുമുള്ള ആ നിയന്ത്രണം ജനാധിപത്യത്തിന്റെ നിലനില്പ്പിന് ഭീഷണിയാണന്നും അദ്ദേഹം വ്യക്തമാക്കി.
സെന്സറിങ്, സിനിമകളുടെ ആത്മാവിനെ നശിപ്പിക്കുകയാണ്. സിനിമയുടെ സര്ട്ടിഫിക്കേഷന് മാത്രമാണ് സെന്സര് ബോര്ഡിന് രൂപം നല്കിയതെന്നും അതില് കവിഞ്ഞുള്ള ഇടപെടലാണ് അവര് നടത്തുന്നതെന്നും സംവിധായകന് ഗൗരവ് മദന് പറഞ്ഞു. ഇരുവരും 25 ആമത് IFFK യുടെ ഓപ്പണ് ഫോറത്തില് സംസാരിക്കുകയായിരുന്നു. മോഹിത് പ്രിയദര്ശി, മനോജ് ജാസണ്, ശ്യാം സുന്ദര്, തമിഴ്, റ്വിത ദത്ത തുടങ്ങിയവരും പങ്കെടുത്തു.
സിനിമ പ്രകൃതിയുടെ പ്രതിഫലനമാണ്...
മനുഷ്യനൊപ്പം പ്രകൃതിയെയും സമയത്തെയും കൂടി സംബന്ധിക്കുന്നതാണ് സിനിമയെന്ന് സംവിധായകന് അക്ഷയ് ഇന്ഡിക്കര്. സിനിമകളുടെ പ്രമേയം പലപ്പോഴും മനുഷ്യനെ മാത്രം കേന്ദ്രീകരിക്കുകയാണ്. നമുക്ക് ചുറ്റുമുള്ള പ്രകൃതിയും കാലവുമൊക്കെ സിനിമകളില് മനുഷ്യനോളം തന്നെ പ്രാധാന്യ മര്ഹിക്കുന്നവയാണെന്നും,
'സ്ഥല്പുരാന്' എന്ന ചിത്രത്തിന്റെ പ്രദര്ശനത്തിന് ശേഷം പ്രേക്ഷകരുമായുള്ള കൂടി കാഴ്ചയില് അദ്ദേഹം വ്യക്തമാക്കി.
സംവിധായകര് പ്രേക്ഷകരെ മാനിക്കണം....
സംവിധായകര് എല്ലാതരം പ്രേക്ഷകരേയും കണക്കിലെടുത്ത് കൊണ്ട് വേണം സിനിമകള് നിര്മ്മിക്കാനെന്നു ഫ്രഞ്ച് സംവിധായകന് ഴാങ് ലുക് ഗൊദാര്ദ്. പ്രേക്ഷകരോടുള്ള ബഹുമാനം കൂടിയാണ് സിനിമയില് പ്രതിഫലിക്കേണ്ടത്. ചിത്രങ്ങളിലൂടെ കഥപറയുന്ന കലയാണ് സിനിമയെന്നും അതില് നിശബ്ദതക്കു വലിയ പ്രാധാന്യമുണ്ടെന്നും അദ്ദേഹം വ്യക്തമാക്കി.
വിവര സാങ്കേതിക വിദ്യയെ പ്രയോജനപ്പെടുത്തി നിരവധി സിനിമകള് നിര്മ്മിക്കപെടുന്നുണ്ട്. എന്നാല് പ്രേക്ഷകരെ തൃപ്തിപ്പെടുത്താനുള്ള വ്യഗ്രതക്കിടയില് കലാമൂല്യമുള്ള ചിത്രങ്ങള് ഉണ്ടാകുന്നില്ല. എണ്ണത്തെക്കാള് പ്രധാനം സിനിമകളുടെ ഉള്ളടക്കമാണെന്നും പ്രേക്ഷകരുമായുള്ള ഓണ്ലൈന് സംവാദത്തില് അദ്ദേഹം പറഞ്ഞു.