അഞ്ജു അഷറഫ്-
കൊച്ചി:
ഐ എഫ് എഫ് കെ ഇരുപത്തിയഞ്ചാം എഡിഷന് കൊച്ചിയില് സംഘാടക സമിതി യോഗം എറണാകുളം ടൗണ് ഹാളില് നഗരസഭാ മേയര് അനില്കുമാര് ഉദ്ഘാടനം ചെയ്തു.
എം എല് എമാരായ ടി ജെ വിനോദ്, പി ടി തോമസ്, നഗരസഭാ ഡെപ്യൂട്ടി മേയര് കൗണ്സിലര്മാര് ചലച്ചിത്ര രാഷ്ട്രീയസാമൂഹ്യ രംഗത്തെ ഉന്നതര് തുടങ്ങി നിരവധി പേര് യോഗത്തില് പങ്കെടുത്തു.
കൊച്ചിന് കോര്പ്പറേഷന്റെ പുതിയ ഭരണസമിതിക്ക് കിട്ടിയ വലിയ ഭാഗ്യമാണ് രാജ്യാന്തര ചലച്ചിത്രമേളയുടെ ഭാഗമാകാന് സാധിച്ചതെന്ന് മേയര് അനില്കുമാര് ഉദ്ഘാടന പ്രസംഗത്തില് പറഞ്ഞു. എന്റെ സുഹൃത്തുക്കളായ ധാരാളം ചലച്ചിത്രപ്രവര്ത്തകര് കൊച്ചിയിലുണ്ട്.
ജോഷി സാറിനെ പോലെ സിബിമലയില് സാറിനെ പോലുള്ള ഗുരുതുല്യരായ ചലചിത്രകാരന്മാരും കൊച്ചിയിലുണ്ട്. എല്ലാവരെയും ചേര്ത്തുപിടിച്ചുകൊണ്ട് പുതിയൊരു ചലച്ചിത്ര സംവിധാനം കൊച്ചിയില് കൊണ്ടുവരും. കലാകാരന്മാര് എല്ലാത്തിനും അപ്പുറത്താണെന്നും ഒറ്റക്കെട്ടായി നിന്നു കൊണ്ട് ഈ ചലച്ചിത്ര സംരംഭത്തെ വിജയിപ്പിക്കുമെന്നും മേയര് പറഞ്ഞു.
എല്ലാ വര്ഷവും ഡിസംബര് രണ്ടാം പകുതിയിലാണ് രാജ്യാന്തര ചലച്ചിത്രമേള തിരുവനന്തപുരത്ത് സംഘടിപ്പിക്കാറ്.
ഇരുപത്തിയഞ്ചാം വാര്ഷികമായതുകൊണ്ട് കുറച്ചുകൂടി വിപുലമായ രീതിയില് മേള നടത്താനുള്ള തയ്യാറെടുപ്പുകള് ആരംഭിച്ചതാണെന്ന് ആമുഖപ്രസംഗത്തില് അക്കാദമി ചെയര്മാന് കമല് പറഞ്ഞു. അപ്രതീക്ഷിതമായുണ്ടായ കോവിഡും ലോക്ക്ഡൗണും കാരണം മേള നടത്താന് കഴിയുമോ എന്ന ആശങ്കയിലായിരുന്നു. നാടിന്റെ വിവിധ ഭാഗങ്ങളില് നിന്ന് തിരുവനന്തപുരത്ത് പതിനയ്യായിരത്തോളം ആളുകള് ചലച്ചിത്രമേളയില് പങ്കെടുക്കാന് എത്താറുണ്ട്.
പ്രോട്ടോകോള് പാലിച്ചുകൊണ്ട് ആള്ക്കൂട്ടം പരമാവധി ഒഴിവാക്കാന് വേണ്ടിയാണ് ഇത്തവണ നാല് കേന്ദ്രങ്ങളിലായി നടത്താന് തീരുമാനിച്ചത്. നാല് കേന്ദ്രങ്ങളിലായി അഞ്ചുദിവസം വീതമായിരിക്കും മേള നടക്കുക. എല്ലാ കേന്ദ്രങ്ങളിലും ഒരേ സിനിമ തന്നെയാണ് പ്രദര്ശിപ്പിക്കുകയെന്നും ചെയര്മാന് കമല് പറഞ്ഞു.
ഫെബ്രുവരി പത്തിന് തിരുവനന്തപുരം നിശാഗന്ധിയില് മുഖ്യമന്ത്രി രാജ്യാന്തര ചലച്ചിത്രമേള ഉദ്ഘാടനം ചെയ്യും. തിരുവനന്തപുരത്ത് 6 തീയേറ്ററുകളിലാണ് സിനിമ പ്രദര്ശിപ്പിക്കുന്നത്. 17 മുതല് 21 വരെയാണ് കൊച്ചിയില് മേള നടക്കുന്നതെന്നും കമല് പറഞ്ഞു.
FEFKA ചെയര്മാനും സംവിധായകനും ചലച്ചിത്ര അക്കാദമി എക്സിക്യൂട്ടീവ് കമ്മിറ്റി അംഗവുമായ സിബി മലയില് മേളയുടെ രൂപീകരണത്തെക്കുറിച്ച് സംഘാടക സമിതി യോഗത്തില് വളരെ വിശദമായ സ്വാഗത പ്രസംഗം നടത്തി. യോഗത്തില് ടി.ജെ. വിനോദ് എംഎല്എ അധ്യക്ഷനായിരുന്നു.
പി ടി തോമസ് എംഎല്എ, ചലച്ചിത്ര സംവിധായകന് മോഹന്, ഡിസ്ട്രിബ്യൂട്ടേഴ്സ് അസോസിയേഷന് പ്രസിഡന്റ് സിയാദ് കോക്കര്, ആര്ട്ടിസ്റ്റിക് ഡയറക്ടര് ബീനാ പോള്, നടന് ടിനി ടോം എന്നിവര് പ്രസംഗിച്ചു.