അഞ്ജു അഷറഫ്-
കൊച്ചി:
പുസ്തകത്തില് നിന്ന് സിനിമയിലേയ്ക്ക് ഒരുപാടു ദൂരമുണ്ടെന്നും സാഹിത്യവും ടെക്നോളജിയും ചേരുന്നതാണ് സിനിമയെന്നും സംവിധായകന് ബ്ലെസി പറഞ്ഞു.
കൊച്ചിയില് അന്താരാഷ്ട്ര ചലച്ചിത്ര മേളയില് പങ്കെടുക്കാനെത്തിയ ബ്ലെസി തന്റെ പുതിയ സിനിമയായ 'ആടുജീവിതത്തെക്കുറിച്ചു സംസാരിക്കുകയായിരുന്നു. ഒരു നോവല് സിനിമയാകുമ്പോള് വായനക്കാരന്റെ ഭാവനയിലെ ദൃശ്യങ്ങള് ചിത്രീകരിക്കാന് എളുപ്പമല്ല. പുസ്തകത്തിനു ലഭിച്ച സ്വീകാര്യത സിനിമയ്ക്ക് ലഭിക്കുമോയെന്ന് ചിന്തിക്കുന്നില്ലെന്നും അദ്ദേഹം പറഞ്ഞു.
ചലച്ചിത്ര മേളയിലൂടെയാണ് തന്റെ സിനിമ ജീവിതം ആരംഭിക്കുന്നത്. 80 കള് മുതല് ഫിലിം സൊസൈറ്റിയില് അംഗമായിരുന്നു. വലിയ സാംസ്കാരിക വിനിമയങ്ങള് നടക്കുന്ന ഇടമാണ് ഇതുപോലെയുള്ള ചലച്ചിത്രമേളകള്.സിനിമ കാണാനും സിനിമയില് പ്രവര്ത്തിച്ചവരുമായുള്ള സംവാദങ്ങളും മേള പ്രദാനം ചെയ്യുന്നു.
ചെണ്ടമേളം വീട്ടിലിരുന്നു ഓണ്ലൈനില് കാണുമ്പോള് നഷ്ടപ്പെടുന്ന ആരവം ആണ് ഓണ്ലൈനില് സിനിമ കാണുമ്പോള് നഷ്ടപ്പെടുന്നത്. എന്നാല് ടെക്നോളജിയുടെ വികസനത്തെ അവഗണിക്കാന് സാധ്യമല്ലെന്നും ബ്ലെസി പറയുന്നു.