സി എന് എ-
കൊച്ചി:
പ്രശസ്ത സംഗീത സംവിധായകന് ഐസക് തോമസ് കൊട്ടുകപ്പള്ളി അന്തരിച്ചു.
കോട്ടയം ജില്ലയിലെ പാലാ സ്വദേശിയാണ്. പൂനെ ഫിലിം ഇന്സ്റ്റിറ്റിയൂട്ടില് നിന്നും സംവിധാനത്തിലും തിരക്കഥാരചനയിലും പിജി ഡിപ്ലോമ നേടിയ ഇദ്ദേഹം സംഗീതത്തില് കൊടൈക്കനാല് സ്കൂളിലെ അമേരിക്കന് ടീച്ചേഴ്സില് നിന്ന് രണ്ടുവര്ഷത്തെ പഠനത്തിനു ശേഷം ലണ്ടന് ട്രിനിറ്റി കോളേജ് ഓഫ് മ്യൂസിക്കില് നിന്നും പിയാനോയില് സിക്സ്ത്ത് ഗ്രെയ്ഡും പാസായി.
കെ.ജി. ജോര്ജിന്റെ മണ്ണിലൂടെ സിനിമയിലെത്തി. പിന്നീട് പ്രശസ്ത സംവിധായകന് അരവിന്ദന്റെ 'തമ്പ്' എന്ന ചിത്രത്തില് അസിസ്റ്റന്റ് ഡയറക്ടറായി. ജി അരവിന്ദനൊപ്പം 'തമ്പ്', 'കുമ്മാട്ടി', 'എസ്തപ്പാന്' എന്നീ ചിത്രങ്ങളുടെ തിരക്കഥാരചനയില് പങ്കുചേര്ന്നിട്ടുണ്ട്.
എസ്തപ്പാനിലൂടെയാണ് പശ്ചാത്തല സംഗീത രംഗത്തേക്കെത്തിയത്. അരവിന്ദന്, അടൂര് ഗോപാലകൃഷ്ണന്, ടി. വി. ചന്ദ്രന്, ഷാജി എന്. കരുണ്, ഗിരീഷ് കാസറവള്ളി, കവിത ലങ്കേഷ്, ജാനകി വിശ്വനാഥന് തുടങ്ങിയ അതികായരുടെ ചിത്രങ്ങളിലൂടെ ഇദ്ദേഹത്തിന്റെ സംഗീതം ലോകമെമ്പാടുമൊഴുകിയെത്തി.
'ഭവം' (2002), 'മാര്ഗം' (2003), 'സഞ്ചാരം', 'ഒരിടം' (2004), 'ആദാമിന്റെ മകന് അബു' (2010) എന്നീ സിനിമകളിലൂടെ മികച്ച പശ്ചാത്തല സംഗീതത്തിന് സംസ്ഥാന പുരസ്കാരങ്ങള് നേടി.
'ആദാമിന്റെ മകന് അബു'വിലൂടെ ദേശീയ ചലച്ചിത്ര പുരസ്കാരവും നേടി.
കേരളത്തില് ആരംഭിച്ച ആദ്യത്തെ സ്വകാര്യ ചാനലായ ഏഷ്യാനെറ്റിന്റെ വൈസ് പ്രസിഡന്റും ക്രിയേറ്റീവ് ഡയറക്ടറുമായിരുന്നു ഐസക് തോമസ്.
Content courtesy:
Malayalam Movie & Music DataBase (m3db)