അഞ്ജു അഷറഫ്
കൊച്ചി:
ഇന്ന് ദക്ഷിണേന്ത്യന്‍ചലച്ചിത്ര നടിശാലിനിയുടെ ജന്മദിനമാണ്. പക്ഷേ മലയാളത്തെ സംബന്ധിച്ചിടത്തോളം പ്രത്യേകിച്ച് സിനിമ ഇന്‍ഡസ്ട്രിയില്‍ പെട്ടെന്ന് ആളെ തിരിച്ചറിയണമെങ്കില്‍ ബേബിശാലിനി എന്ന് തന്നെ പറയണം. ശാലിനിയുടെ ജന്മദിനമാണ് നവംബര്‍ 20. നവോദയക്ക് വേണ്ടി ഫാസില്‍ സംവിധാനം ചെയ്ത 'എന്റെ മാമാട്ടിക്കുട്ടിയമ്മക്ക്' എന്ന സിനിമ 1983ലാണ് റിലീസ് ചെയ്യുന്നത്. ആ ഒരൊറ്റ സിനിമ കൊണ്ട് മലയാള പ്രേക്ഷകരുടെ ഹൃദയം കീഴടക്കുകമാത്രമല്ല സംസ്ഥാന ചലച്ചിത്ര അവാര്‍ഡും നേടിയെടുത്തു. അതോടെ ബേബി ശാലിനി മലയാളത്തിന്റെ മാമാട്ടിക്കുട്ടിയമ്മയായി. ഒരേസമയം സ്വന്തം പേരിലും കഥാപാത്രത്തിന്റെ പേരിലും ശാലിനി അറിയപ്പെട്ടു. ഇത് ശാലിനിക്ക് മാത്രം കിട്ടിയ അപൂര്‍വ്വ ഭാഗ്യമാണ്.
ബേബി ശാലിനിയെ കേന്ദ്രീകരിച്ച് നിരവധി സിനിമകള്‍ ഉണ്ടായി. തമിഴിലും തെലുങ്കിലും കന്നഡത്തിലും അഭിനയിച്ച ദാക്ഷിണേന്ത്യ മുഴുവന്‍ പടര്‍ന്നുകയറിയ ബേബിശാലിനി ഇടക്കൊന്നു ബ്രേക്കിട്ടു. 1997ല്‍ രണ്ടാമൂഴത്തിന് തുടക്കമിടുന്നത് ഫാസിലിന്റെ 'അനിയത്തിപ്രാവ്' എന്ന സിനിമയിലാണ്. കൗമാരപ്രായത്തില്‍ എത്തിയ ശാലിനിയുടെ ആദ്യ നായകന്‍ കുഞ്ചാക്കോബോബനാണ്. രണ്ടുപേരുടെയും അരങ്ങേറ്റ ചിത്രം അതിഗംഭീരമായി. കുഞ്ചാക്കോ ബോബന്റെയും ശാലിനിയുടെയും കരിയറിന്റെ വിജയകരമായ തുടക്കമായിരുന്നു 'അനിയത്തിപ്രാവ്'.
തമിഴകത്തെ തലയെടുപ്പുള്ള താരം അജിത്തും ശാലിനിയും തമ്മിലുള്ള വിവാഹം രണ്ടായിരത്തിലായിരുന്നു. വിവാഹിതയായതോടെ അഭിനയ വേദിയില്‍ നിന്ന് അകന്നുപോയ ശാലിനി നല്ലൊരു വീട്ടമ്മയായി മാറി. അജിത് ശാലിനി ദമ്പതികള്‍ക്ക് 2 മക്കള്‍ അനുഷ്‌ക, അദ്വിക്. ജന്മദിനം പ്രമാണിച്ച് പ്രത്യേകമായ ആഘോഷങ്ങളൊ ന്നും ഉണ്ടാകാറില്ല. പക്ഷേ ഇത്തവണ ശാലിനിയെ പോലും ഞെട്ടിച്ചുകൊണ്ട് ഒരു കുഞ്ഞു ആരാധിക വലിയൊരു സര്‍പ്രൈസ് സമ്മാനം നല്‍കുകയുണ്ടായി. ഒറ്റനോട്ടത്തില്‍ മാമാട്ടിക്കുട്ടിയമ്മയായി എത്തിയ ബേബിശാലിനി തന്നെയല്ലേ ഈ കുഞ്ഞു ആരാധിക എന്ന് തോന്നിപ്പോകും. അത്രയും രൂപസാദൃശ്യമുള്ള കൊച്ചു കലാകാരിയാണ് ഇവാനിയ നാഷ്. സമൂഹമാധ്യമങ്ങളില്‍ തരംഗം സൃഷ്ടിച്ച ഈ കൊച്ചുമിടുക്കി പുതിയ മാമാട്ടിക്കുട്ടിയമ്മയായി ക്യാമറയ്ക്കു മുന്നില്‍ എത്തുകയാണ്. മറ്റൊരു വലിയ പ്രത്യേകതയുള്ളത് ശാലിനിയുടെ ജന്മദിനമായ നവംബര്‍ 20നാണ് ഇവാനിയയും ജനിച്ചത്. ഒരേ ദിവസം ജനിച്ച ഒരേ പ്രായത്തിന്റെ മുഖസാദൃശ്യമുള്ള വര്‍. 1983 ല്‍ 'എന്റെ മാമാട്ടിക്കുട്ടിയമ്മയ്ക്ക്' എന്ന സിനിമയില്‍ മോഹന്‍ലാലിനൊപ്പമാണ് ബേബി ശാലിനി അഭിനയിച്ചത്. 37 വര്‍ഷങ്ങള്‍ക്കു ശേഷം അന്നത്തെ ബേബി ശാലിനിയുടെ പ്രായമുള്ള ഇവാനിയ, മോഹന്‍ലാലിന്റെ കൂടെ ഒരു പരസ്യ ചിത്രത്തില്‍ അഭിനയിച്ചുകൊണ്ടാണ് അഭിനയ വേദിയില്‍ തുടക്കമിടുന്നത്. പരസ്യചിത്രത്തിന്റെ ഷൂട്ട് കഴിഞ്ഞു സിനിമയിലേക്കാണ് യാത്ര. കണ്ണൂര്‍ കുടിയാന്‍മലയില്‍ നാഷ്, സോണിയ ദമ്പതികളുടെ മകളാണ് എല്‍കെജി വിദ്യാര്‍ഥിനിയായ ഈ കൊച്ചു സുന്ദരി.
