ന്യൂസ് ഡെസ്‌ക്-
തിരു:
ചലച്ചിത്ര രംഗത്തെ സമഗ്ര സംഭാവനക്കുള്ള ജെ സി ഡാനിയല്‍ പുരസ്‌കാരം ഹരിഹരന്. അഞ്ചു ലക്ഷം രൂപയും പ്രശസ്തി പത്രവും ശില്പവും അടങ്ങുന്നതാണ് പുരസ്‌കാരം. എം ടി വാസുദേവന്‍ നായര്‍ ചെയര്‍മാനായ സമിതിയാണ് 2019ലെ പുരസ്‌കാര നിര്‍ണയം നടത്തിയത്. മലയാള സിനിമയുടെ പിതാമഹന്‍ എന്നറിയപ്പെടുന്ന ജെ സി ഡാനിയലിന്റെ പേരില്‍ 1992 ലാണ് പുരസ്‌കാരം ഏര്‍പ്പെടുത്തിയത്. നിര്‍മ്മാതാവും ഡിസ്ട്രിബ്യൂട്ടറുമായ ടി ഇ വാസുദേവനാണ് ആദ്യ പുരസ്‌ക്കാരം ലഭിച്ചത്. 2018ലെ പുരസ്‌കാരത്തിന് അര്‍ഹയായത് നടി ഷീലയും. 1973 ല്‍ 'ലേഡീസ് ഹോസ്റ്റല്‍' എന്ന സിനിമ സംവിധാനം ചെയ്തു തുടക്കമിട്ട ഹരിഹരന് കഴിഞ്ഞ അര നൂറ്റാണ്ട് കാലത്തിനിടയില്‍ അമ്പതിലധികം സിനിമകള്‍ ഒരുക്കി ചലച്ചിത്രവേദിയില്‍ ശ്രദ്ധേയമായ സ്ഥാനം ഉറപ്പിക്കുകയും ചെയ്തു. ഏറ്റവുമൊടുവില്‍ സംവിധാനം ചെയ്തത് 2013 ല്‍ 'ഏഴാമത്തെ വരവ്' എന്ന സിനിമയാണ്. മലയാള സിനിമയുടെ കലാപരവും ഭാവുകത്വപരമായ പരിവര്‍ത്തനങ്ങള്‍ക്കൊപ്പം സഞ്ചരിക്കുകയും ചരിത്രത്തിലെ നാഴികക്കല്ലുകളായ സിനിമകള്‍ സമ്മാനിക്കുകയും ചെയ്തുവെന്ന് വിലയിരുത്തിയാണ് ജൂറി 2019ലെ ജെ സി ഡാനിയല്‍ പുരസ്‌കാരത്തിനു ഹരിഹരനെ തിരഞ്ഞെടുത്തത്.
