സി എന്‍ എ-
കൊച്ചി:
കോവിഡ് കാലത്ത് അടച്ചു പൂട്ടിയ മേഖലകളില്‍ ഒന്നാണ് സിനിമാ തിയറ്ററുകള്‍. ഇതിനെ മാത്രം ആശ്രയിച്ചു കഴിഞ്ഞിരുന്ന ഒരുപാട് പേര്‍ പട്ടിണിയിലാണ്. തൊഴില്‍ രഹിതരായവര്‍ തീയേറ്റര്‍ തുറക്കുന്നതും കാത്ത് നില്‍ക്കുകയാണ്. അതോടൊപ്പം തന്നെ നിരവധി സിനിമകളാണ് അണിയറയില്‍ റിലീസിന് തയ്യാറായി നില്‍ക്കുന്നത്. ഒടിടി പ്ലാറ്റ്‌ഫോമുകളില്‍ സിനിമ റിലീസ് ചെയ്യാതെ തിയറ്ററില്‍ തന്നെ റിലീസ് ചെയ്യാന്‍ കാത്തിരിക്കുന്ന ധാരാളം നിര്‍മ്മാതാക്കളുണ്ട്.
സൂപ്പര്‍ താര ചിത്രമായ 'ദൃശ്യം 2' ആമസോണ്‍ പ്രൈമില്‍ റിലീസ് ചെയ്യുന്നതിനെതിരെ കടുത്ത പ്രതിഷേധം ഉയരുന്ന സാഹചര്യത്തില്‍ ഒടിടി പ്ലാറ്റ്‌ഫോമുകളില്‍ സിനിമ റിലീസ് ചെയ്യുന്നതിനെ അനുകൂലിച്ച് നിര്‍മാതാവ് ജോബി ജോര്‍ജ് രംഗത്തെത്തിയിരിക്കുന്നു. 'കാവല്‍', 'വെയില്‍' തുടങ്ങിയ സിനിമകള്‍ക്കായി ഒടിടി പ്ലാറ്റ്‌ഫോമുകളുമായി ചര്‍ച്ച നടത്തിയിരുന്നുവെന്നും അദ്ദേഹം പറയുന്നു.
'ഒരു പുതുമുഖ സംവിധായകന്റെ ചിത്രമാണ് 'വെയില്‍', മാത്രവുമല്ല ചിത്രത്തില്‍ ഷെയ്ന്‍ നിഗം മികച്ച പ്രകടനമാണ് കാഴ്ചവച്ചിരിക്കുന്നത്. അതുകൊണ്ട് തന്നെ ആ ചിത്രം തിയേറ്ററില്‍ റിലീസ് ചെയ്യേണ്ടതാണെന്ന് തോന്നി. മാത്രവുമല്ല സുരേഷ് ഗോപി നായകനായ 'കാവല്‍' എന്ന ചിത്രത്തിന് 7 കോടി രൂപ ഒടിടി വാഗ്ദാനം ഉണ്ടായിരുന്നു. തിയറ്ററുകാരെ വിചാരിച്ച് കൊടുത്തില്ലെന്നും ജോബിജോര്‍ജ് പറയുന്നു.
സിനിമ തിയറ്ററില്‍ റിലീസ് ചെയ്യുന്നതാണ് നല്ലത്.
ഗത്യന്തരമില്ലെങ്കില്‍ എന്തു ചെയ്യും. ഈ പ്രതിസന്ധിയില്‍ എനിക്ക് പിടിച്ചു നില്‍ക്കാനായി. മറ്റുള്ളവര്‍ക്ക് അത് സാധ്യമാകണമെന്നില്ലല്ലോ.
എല്ലാ സിനിമകളും ഒ.ടി.ടിയില്‍ റിലീസ് ചെയ്യാന്‍ പറ്റോന്നറിയില്ല. ഞാന്‍ മനസ്സിലാക്കിയതനുസരിച്ച് പ്രൊഡക്ഷന്‍ ഹൗസ്, അഭിനേതാക്കള്‍, സംവിധായകന്‍ ഇതെല്ലാം പരിഗണിച്ചാണ് OTT ക്കാര്‍ സമീപിക്കുക. തിയറ്ററുകളില്‍ വിജയം നേടിയ സിനിമകളാണ് നേരത്തേ ഒ.ടി.ടിയില്‍ എത്തിയിരുന്നത്. പക്ഷെ ഇപ്പോള്‍ സാഹചര്യം പ്രതികൂലമായതിനാലാണ് ഒ.ടി.ടി റിലീസ് കൂടുതലായി സംഭവിക്കുന്നതെന്നും ജോബി ജോര്‍ജ്ജ് പറയുന്നു.
