സി എന് എ
കൊച്ചി:
മലയാളചലച്ചിത്ര ശാഖയ്ക്ക് സമഗ്ര സംഭാവന നല്കിയ പ്രതിഭകളായ സാങ്കേതിക വ്യക്തിത്വങ്ങള്ക്ക് രണ്ടുവര്ഷം കൂടുമ്പോള് മാക്ട നല്കിപ്പോരുന്ന പരമോന്നത ബഹുമതിയായ മാക്ട ലെജന്ഡ് ഓണര് പുരസ്കാരം പ്രഖ്യാപിച്ചു.
ഈ വര്ഷം ഈ പുരസ്കാരത്തിന് അര്ഹനായിരിക്കുന്നത് എക്കാലത്തെയും മികച്ച ചലച്ചിത്രകാരനായ ശ്രീ കെ എസ് സേതുമാധവനാണ്.
മാക്ട ലെജന്ഡ് ഓണര് പ്രഥമ പുരസ്കാരം ശ്രീ എം ടി വാസുദേവന് നായര്ക്കാണ് നല്കിയത്. രണ്ടാമത്തെ പുരസ്കാരം നടനും സംവിധായകനും നിര്മ്മാതാവുമായ ശ്രീ മധുവിന് നല്കുകയുണ്ടായി.
സുദീര്ഘമായ ആറ് പതിറ്റാണ്ടുകളായി ചലച്ചിത്ര വേദിക്ക് നല്കിവരുന്ന ആദരണീയമായ ബഹുമുഖ സംഭാവനകളെ ബഹുമാനിച്ചാണ് ശ്രീ കെ എസ് സേതുമാധവനെ മാക്ട ലെജന്ഡ് ഓണര് പുരസ്കാരത്തിനായി ജൂറി ഐകകണ്ഠേന നിര്ദേശിച്ചത്.
മലയാളത്തിനു പുറമേ സിംഹള, ഹിന്ദി, തമിഴ്, കന്നട, തെലുങ്ക് ഭാഷ ചലച്ചിത്ര വേദികളില് സജീവ സമുന്നത സാന്നിധ്യമായിരുന്നു.
സംസ്ഥാന ദേശീയ അവാര്ഡുകള് നിരവധി തവണ അദ്ദേഹത്തിന് ലഭിച്ചിട്ടുണ്ട്. സംവിധായകന്, നിര്മ്മാതാവ്, തിരക്കഥാകൃത്ത് എന്നീ നിലകളില് അദ്ദേഹത്തിന്റെ ക്രിയാത്മകമായ പങ്കാളിത്തം നിസ്തുലമാണ്. പ്രമേയ സ്വീകരണത്തില് വിസ്മയിപ്പിക്കുന്ന വൈവിധ്യം പുലര്ത്തിയിരുന്നു അദ്ദേഹത്തിന്റെ ചിത്രങ്ങള്.
പ്രകൃഷ്ടങ്ങളായ നിരവധി സാഹിത്യകൃതികള്ക്ക് അദ്ദേഹം ചലച്ചിത്ര ഭാഷ്യം നല്കി. വിവിധ തലമുറകളില് പെട്ട നിരവധി അഭിനേതാക്കളെയും സാങ്കേതിക കലാകാരന്മാരെയും അദ്ദേഹം സിനിമയിലേക്ക് കൈപിടിച്ച് ആനയിച്ചു. ചെന്നൈയില് അദ്ദേഹത്തിന്റെ വസതിയില് നേരിട്ട് എത്തി പ്രമുഖ വ്യക്തിത്വങ്ങള് പുരസ്കാരം സമ്മാനിക്കുന്നതാണ്.
ശ്രീ ജോണ് പോള് ചെയര്മാനും ശ്രീ കലൂര് ഡെന്നീസ് കണ്വീനറും സര്വ്വശ്രീ ഫാസില്, സിബി മലയില്, കമല് എന്നിവര് ജൂറി അംഗങ്ങളും ആയിരുന്നു.
പ്രശസ്ത ശില്പി കാനായി കുഞ്ഞിരാമന് രൂപകല്പന ചെയ്ത ശില്പവും ഒരുലക്ഷം രൂപയും പ്രശംസ പത്രവുമാണ് ലെജന്ഡ് ഓണര് പുരസ്കാരം.