CNA
കോഴിക്കോട്:
പ്രശസ്ത സംഗീത സംവിധായകന്‍ കൈതപ്രം വിശ്വനാഥന്‍(58) അന്തരിച്ചു. അര്‍ബുദബാധയെ തുടര്‍ന്ന് കോഴിക്കോട് എം.വി.ആര്‍ കാന്‍സര്‍ സെന്ററില്‍ ചികിത്സയിലായിരിക്കേ ഇന്ന് ഉച്ചയോടെ മരണം സംഭവിക്കുകയായിരുന്നു.
1963ല്‍ കണ്ണൂര്‍ ജില്ലയിലെ പിലാത്തറക്കടുത്തുള്ള കൈതപ്രം എന്ന ഗ്രാമത്തില്‍ കണ്ണാടി ഭാഗവതര്‍ എന്നറിയപ്പെട്ടിരുന്ന കണ്ണാടി ഇല്ലത്ത് കേശവന്‍ നമ്പൂതിരിയുടേയും അദിതി അന്തര്‍ജ്ജനത്തിന്റെയും ഇളയ മകനായി ജനിച്ചു.
തിരുവനന്തപുരത്തെ സ്വാതിതിരുനാള്‍ സംഗീത കോളേജില്‍ നിന്നും ഗാനഭൂഷണം നേടിയതിനുശേഷം ജ്യേഷ്ഠനായ കൈതപ്രം ഗാനരചനയും സംഗീതവും നിര്‍വ്വഹിച്ച 'ദേശാടനം' എന്ന ചലച്ചിത്രത്തില്‍ സഹായിയായി ചലച്ചിത്ര രംഗത്തേക്കെത്തി.
ജയരാജ് സംവിധാനം ചെയ്ത 'കണ്ണകി' എന്ന ചലച്ചിത്രത്തിലൂടെ സ്വതന്ത്ര സംഗീത സംവിധായകനായി. 'കരിനീലക്കണ്ണഴകീ', 'കയ്യെത്തും ദൂരെ ഒരു കുട്ടിക്കാലം', 'നീയൊരു പുഴയായ്', 'എനിക്കൊരു പെണ്ണുണ്ട്', 'സാറേ സാറേ സാമ്പാറേ', 'ആടെടീ ആടാടെടീ ആലിലക്കിളിയേ' തുടങ്ങിയ സൂപ്പര്‍ ഹിറ്റ് ഗാനങ്ങള്‍ ശ്രദ്ധേയമായവയാണ്.
'കണ്ണകി', 'തിളക്കം', 'ദൈവനാമത്തില്‍', 'ഉള്ളം', 'ഏകാന്തം', 'മധ്യവേനല്‍', 'നീലാംബരി', 'ഓര്‍മ്മ മാത്രം' എന്നീ ചിത്രങ്ങളിലാണ് സംഗീത സംവിധാനം നിര്‍വ്വഹിച്ചത്. 'കണ്ണകി'ക്ക് പശ്ചാത്തല സംഗീതത്തിന് സംസ്ഥാന പുരസ്‌കാരവും ലഭിച്ചു.
'സെക്ഷന്‍ 306 IPC' എന്ന ചിത്രത്തിനുവേണ്ടിയാണ് കൈതപ്രം വിശ്വനാഥന്‍ അവസാനമായി സംഗീത സംവിധാനം നിര്‍വ്വഹിച്ചത്. ശ്രീജിത്ത് വര്‍മ്മ നിര്‍മ്മിച്ച് ശ്രീനാഥ് ശിവ സംവിധാനം ചെയ്ത സിനിമയില്‍ പി. ജയചന്ദ്രന്‍, വിദ്യാധരന്‍ മാസ്റ്റര്‍, ഇന്ദുലേഖ വാരിയര്‍ എന്നിവരാണ് ഗാനങ്ങള്‍ ആലപിച്ചത്.
ഭാര്യ- ഗൗരി. മക്കള്‍- അതിഥി, നര്‍മദ, കേശവന്‍.
