സി എന്‍ എ-
കൊച്ചി:
തിരുവനന്തപുരം നിശാഗന്ധി ഓപണ്‍ എയര്‍ തിയറ്ററില്‍ ചലച്ചിത്ര പ്രദര്‍ശനം ഇന്ന് ആരംഭിക്കും. കെ.എസ്.എഫ്.ഡി.സിയാണ് ജനുവരി, ഫെബ്രുവരി മാസങ്ങളില്‍ പ്രദര്‍ശനം നടത്തുക. ആദ്യ പ്രദര്‍ശനം ഇന്ന് (10-1-2021) വൈകിട്ട് ആറിന് ആരംഭിക്കും. മൈഡിയര്‍ കുട്ടിച്ചാത്തന്‍ (3D) ആണ് ആദ്യ ചിത്രം. കോവിഡ് പ്രോട്ടോക്കോള് പാലിച്ച് 200 പേര്‍ക്കാണ് പ്രവേശനം അനുവദിച്ചിരിക്കുന്നത്.
കോവിഡ് കാരണം ഒന്‍പതുമാസമായി തിയറ്ററുകളില്‍ പോകാത്ത ചലച്ചിത്ര പ്രേമികളെ ആകര്‍ഷിക്കുന്നതിനാണ് ശ്രമമെന്ന് ചലച്ചിത്ര വികസന കോര്‍പറേഷന്‍ ചെയര്‍മാന്‍ ഷാജി എന്‍. കരുണ്‍ പറഞ്ഞു.
3000 പേര്‍ക്ക് ഇരിക്കാവുന്ന നിശാഗന്ധിയില്‍ 200 സീറ്റ് മാത്രമേ ഉണ്ടാകൂ. ഓപ്പണ്‍ എയര്‍ തിയറ്റര്‍ ആയതിനാല്‍ മറ്റ് ആശങ്ക വേണ്ട. ശരീര താപനില പരിശോധിച്ചും കോവിഡ് മാനദണ്ഡങ്ങള്‍ കര്‍ശനമായി പാലിച്ചുമായിരിക്കും പ്രേക്ഷകരെ പ്രവേശിപ്പിക്കുക. ഒരാഴ്ചത്തെ പ്രേക്ഷകരുടെ പ്രതികരണം അറിഞ്ഞ ശേഷമായിരിക്കും തുടര്‍ന്നുള്ള പ്രദര്‍ശനം. ആളുണ്ടെങ്കില്‍ അടുത്ത മാസം വരെ എല്ലാ ദിവസവും വൈകുന്നേരം മികച്ച മലയാളം, ഇംഗ്ലിഷ് സിനിമകള്‍ പ്രദര്‍ശിപ്പിക്കും.
ടിക്കറ്റിന് 100 രൂപയാണ് നിരക്ക്. കൂടാതെ 20 രൂപയാണ് ത്രീഡി കണ്ണടക്കായി നല്‍കേണ്ടത്. ഉപയോഗിച്ചതിന് ശേഷം കണ്ണട തിരിച്ച് നല്‍കേണ്ടതില്ല.
ജനുവരി 8 മുതല്‍ കലാഭവനില്‍ നിന്ന് ടിക്കറ്റുകള്‍ ബുക്കിങ്ങ് ആരംഭിച്ചിരുന്നു.
