സി എന്‍ എ-
കൊച്ചി:
ലോകത്ത് ഇന്ന് ഏറ്റവും കൂടുതല്‍ പ്രതിസന്ധി നേരിടുന്ന അഭയാര്‍ത്ഥി സമൂഹമായ റോഹിങ്ക്യന്‍ അഭയാര്‍ഥികളുടെ കഥ പറയുന്ന ആദ്യ ഇന്ത്യന്‍ സിനിമ 'കാറ്റ്, കടല്‍, അതിരുകള്‍' ആക്ഷന്‍ ഒ ടി ടി പ്ലാറ്റ്‌ഫോമിലൂടെ ആഗസ്റ്റ് 19ന് മുഹറം നാളില്‍ പ്രേക്ഷകര്‍ക്ക് മുന്നിലെത്തുന്നു.
കൊക്കൂണ്‍ പ്രൊഡക്ഷന്‍സിന്റെ ബാനറില്‍ ഷാജി ഇ കെ നിര്‍മ്മിച്ച ഈ ചിത്രം സംവിധാനം ചെയ്തിരിക്കുന്നത് സമദ് മങ്കടയാണ്.
ബംഗ്ലാദേശിലെ ആഭ്യന്തര പ്രശ്‌നങ്ങളെ തുടര്‍ന്ന് അഭയം തേടി ഇന്ത്യയിലേക്ക് എത്തിയ റോഹിങ്ക്യന്‍ ജനതയുടെയും 60 വര്‍ഷം മുന്‍പ് തലായി അമ്മയോടൊപ്പം ഇന്ത്യയിലേക്ക് പാലായനം ചെയ്ത തിബറ്റന്‍ സമൂഹത്തിന്റെയും ജീവിതാവസ്ഥകള്‍ ആണ് ഈ സിനിമ പറയുന്നത്.
സ്വന്തമായി ഒരു ദേശം പോലും ഇല്ലാതായി തീരുന്നവരുടെ പൗരത്വ പ്രശ്‌നം ആണ് ഈ ചിത്രം ചര്‍ച്ച ചെയ്യുന്നത്.
സെന്‍സര്‍ ബോര്‍ഡിന്റെ ഭാഗത്തുനിന്നും ഒട്ടേറെ എതിര്‍പ്പുകള്‍ മറികടന്നാണ് സിനിമ പ്രദര്‍ശനത്തിനെത്തുന്നത് എന്നാണ് അണിയറ പ്രവര്‍ത്തകര്‍ അവകാശപ്പെടുന്നത്.
അഭയാര്‍ത്ഥി വിഷയം ചര്‍ച്ച ചെയ്യുന്നതിനാല്‍ വിദേശരാജ്യങ്ങളുമായുള്ള ഇന്ത്യയുടെ സൗഹൃദത്തെ ബാധിക്കുന്ന വിഷയമാണെന്നും അക്കാര്യത്തില്‍ അനുമതി തരാന്‍ കഴിയില്ലെന്നും റിജിയണല്‍ സെന്‍സര്‍ ബോര്‍ഡ് സിനിമയ്ക്ക് ആദ്യം അനുമതി നിഷേധിച്ചു എന്നും അവര്‍ വ്യക്തമാക്കുന്നു.
ജിയോ ക്രിസ്റ്റി എന്ന ഗവേഷണ വിദ്യാര്‍ഥിയും ആബിദ് ഹസന്‍ എന്ന ഒരു യുവ മാധ്യമ പ്രവര്‍ത്തകയും നടത്തുന്ന രണ്ട് വ്യത്യസ്തമായ യാത്രകളിലൂടെയാണ് കഥ വികസിക്കുന്നത്.
കേരളത്തില്‍ ഇംഗ്ലീഷ് സാഹിത്യം പഠിക്കുന്നതിനായി എത്തിയ ധാവലാമോ എന്ന ടിബറ്റന്‍ അഭയാര്‍ത്ഥി പെണ്‍കുട്ടിയോടുള്ള പ്രണയവും ബുദ്ധനോട് തോന്നിയ ആരാധനയും അനുഭവവുമായിരുന്നു ജിയോ ക്രിസ്റ്റിയുടെ യാത്രകള്‍ക്ക് പിന്നില്‍.
ആബിദയുടെതാകട്ടെ ഖൈറുല്‍ അമീന്‍ എന്ന് റോഹിങ്ക്യന്‍ അഭയാര്‍ത്ഥിയുടെ ഉറ്റവരെ തേടിയുള്ള നീണ്ട അലച്ചിലായിരുന്നു.
വ്യത്യസ്തമായ ഈ രണ്ട് യാത്രകളിലൂടെയാണ് ഒരേ ലക്ഷ്യത്തിലേക്ക് സിനിമയും സഞ്ചരിക്കുന്നത്.
കര്‍ണാടകയിലെ ബൈലക്കുപ്പ, സിക്കിമിലെ നാഥുല, ഗുരു ദേഗന്മാര്‍, ഹിമാചല്‍ പ്രദേശിലെ മക്‌ലിയോഡ് ഗഞ്ച, മണാലി, ദില്ലി എന്നീ വിവിധ ലൊക്കേഷനുകളിലെ ഏറെ വെല്ലുവിളികള്‍ നിറഞ്ഞ ചിത്രീകരണത്തിന് ശേഷമാണ് 'കാറ്റ്, കടല്‍, അതിരുകള്‍' പൂര്‍ത്തിയാക്കിയിരിക്കുന്നത്.
അനു മോഹന്‍, ലിയോണ ലിഷോയ്, കൈലാഷ്, അനില്‍ മുരളി, ഡോ. വേണുഗോപാല്‍, ശരണ്‍ തുടങ്ങിയ അഭിനേതാക്കള്‍ക്കൊപ്പം കാവാലം ഓ എന്ന തിബറ്റ് അഭയാര്‍ത്ഥിയായി അഭിനയിക്കുന്നത് പേരിലുള്ള ബൈലക്കുപ്പ അഭയാര്‍ത്ഥി സെറ്റില്‍മെന്റ് അന്തേവാസി തന്നെയാണ്.
ധാവാലാമയ്ക്ക് ഒപ്പം ഒട്ടേറെ തിബറ്റന്‍ അഭയാര്‍ത്ഥികള്‍ ഒന്നിച്ചഭിനയിക്കുന്ന സിനിമ എന്നതും ഇതിന്റെ പ്രത്യേകതയാണ്.
എസ് ശരത് കഥയും, കെ സജിമോന്‍ തിരക്കഥയും സംഭാഷണവും രചിച്ചിരിക്കുന്നു. ഈ ചിത്രത്തിന് ഛായാഗ്രഹണം അന്‍സര്‍ ആഷ് ത്വയിബ്, എഡിറ്റിംഗ് വിപിന്‍ മണ്ണൂര്‍, പശ്ചാത്തല സംഗീതം റോണി റാഫേല്‍, ശബ്ദമിശ്രണം ബോണി എം ജോയ് എന്നിവരാണ്.
Online PR - CNA.
