അഞ്ജു അഷറഫ്-
കൊച്ചി:
ഫിലിം പ്രൊഡ്യൂസേഴ്സ് ഡിസ്ട്രിബ്യൂട്ടേഴ്സ് എക്സിബിറ്റേഴ്സ് എന്നീ സംഘടനകളുടെ ഏകോപന സമിതിയായ കേരള ഫിലിം ചേംബര് ഓഫ് കൊമേഴ്സിന്റെ 64 ആമത് വാര്ഷിക ജനറല്ബോഡി യോഗത്തില് പ്രസിഡണ്ടായി ജി. സുരേഷ് കുമാറിനെയും സെക്രട്ടറിയായി ബി. ആര്. ജേക്കബിനെയും തെരഞ്ഞെടുക്കപ്പെട്ടു.
സാഗ അപ്പച്ചനാണ് ട്രഷറര്. മൂന്നുപേരും ഏകകണ്ഠമായാണ് തെരഞ്ഞെടുക്കപ്പെട്ടത്. വൈസ് പ്രസിഡന്റ്, രണ്ട് ജോയിന് സെക്രട്ടറിമാര് മൂന്ന് സംഘടനകളില് നിന്നായി 46 ഭരണസമിതി അംഗങ്ങള് എല്ലാവരും തന്നെ ഏകകണ്ഠമായാണ് തെരഞ്ഞെടുക്കപ്പെട്ടത്.
അതേസമയം ഒരു വൈസ് പ്രസിഡന്റ് സ്ഥാനത്തേക്ക് മാത്രമായി തെരഞ്ഞെടുപ്പ് വേണ്ടി വന്നു. രണ്ട് വൈസ് പ്രസിഡണ്ട് മാരില് ഒരു വൈസ് പ്രസിഡണ്ട് സ്ഥാനത്തേക്ക് ആയിരുന്നു മത്സരം.
നിര്മ്മാതാക്കളും ഡിസ്ട്രിബ്യൂട്ടേഴ്സുമായ സിയാദ് കോക്കറും അബ്ദുല് അസീസും തമ്മിലായിരുന്നു മത്സരം. അനുരഞ്ജന ശ്രമങ്ങള് പരാജയപ്പെട്ടതിനെ തുടര്ന്നായിരുന്നു വൈസ് പ്രസിഡണ്ട് സ്ഥാനത്തേക്ക് തെരഞ്ഞെടുപ്പ് വേണ്ടിവന്നത്.
ആകെ 528 അംഗങ്ങളില് 262 പേര് വോട്ട് രേഖപ്പെടുത്തി. ഇതില് 70 ശതമാനം വോട്ട് നേടി സിയാദ് കോക്കര് വന് ഭൂരിപക്ഷത്തോടെയാണ് വിജയിച്ചത്. 262 ല് 178 വോട്ട് സിയാദ് കോക്കറിന് ലഭിച്ചു. 82 വോട്ടാണ് അബ്ദുല് അസീസിന് ലഭിച്ചത്. രണ്ടു വോട്ട് അസാധുവായി.
കേരള ഫിലിം പ്രൊഡ്യൂസേഴ്സ് അസോസിയേഷന് പ്രസിഡണ്ട്, ജനറല് സെക്രട്ടറി, ഭരണ സമിതി അംഗം എന്നീ നിലകളില് പലവട്ടം തെരഞ്ഞെടുക്കപ്പെടുകയും മികവുറ്റ രീതിയില് സംഘടനയെ മുന്നോട്ടു നയിക്കുകയും ചെയ്തിട്ടുള്ള നിര്മ്മാതാവ് ജി. സുരേഷ് കുമാര് ആദ്യമായിട്ടാണ് കേരള ഫിലിം ചേംബര് ഓഫ് കൊമേഴ്സിന്റെ പ്രസിഡണ്ടായി തിരഞ്ഞെടുക്കപ്പെടുന്നത്.
നിലവില് കേരള ഫിലിം പ്രൊഡ്യൂസേഴ്സ് അസോസിയേഷന് ഭരണ സമിതി അംഗമാണ് സുരേഷ്കുമാര്. തീയറ്റര് ഉടമകളുടെ പ്രതിനിധിയായ ബി. ആര്. ജേക്കബാണ് ജനറല് സെക്രട്ടറി. കാലാവധി പൂര്ത്തിയായ കഴിഞ്ഞ ഭരണ സമിതിയുടെ ജനറല്സെക്രട്ടറിയായിരുന്ന നിര്മ്മാതാവും ഡിസ്ട്രിബ്യൂട്ടര്മായ സാഗ അപ്പച്ചനാണ് പുതിയ ഭരണസമിതിയുടെ ട്രഷറര്. സിയാദ് കോക്കര്, സോണി തോമസ് എന്നിവരാണ് വൈസ് പ്രസിഡന്റ് മാര്. സജി നന്ത്യാട്ട് അനില് വി. തോമസ് എന്നിവര് ജോയിന് സെക്രട്ടറിമാരാണ്.
കല്ലിയൂര് ശശി, എം.രഞ്ജിത്ത്, സന്ദീപ് സേനന്, ആനന്ദ് കുമാര്, സന്തോഷ് ദാമോദര്, അവുസേപ്പച്ചന്, മുകേഷ് ആര്. മേത്ത, സന്തോഷ് പവിത്രം, എം പി സുബൈര്, ആന്റോ ജോസഫ്, ബി. രാകേഷ്, ഷാജി നടേശന്, ആല്വിന് ആന്റണി, മുഹമ്മദ് കുഞ്ഞ്, ശരത് ചന്ദ്രന് നായര്, എന്.കൃഷ്ണകുമാര്, നടന് ദിലീപ്, ലിസ്റ്റിന്സ്റ്റീഫന്, സജിത് കുമാര്, എവര്ഷൈന് മണി, എം എം ഹംസ, സി.വി. രാമകൃഷ്ണന്, വി. പി. മാധവന് നായര്, ബി.ഉണ്ണികൃഷ്ണന്, കെ. നന്ദകുമാര് തുടങ്ങി നിര്മ്മാതാക്കളുടെയും ഡിസ്ട്രിബ്യൂട്ടേഴ്സി ന്റെയും എക്സിബിറ്റേഴ്സിന്റെയും പ്രതിനിധികളായി 46 എക്സിക്യൂട്ടീവ് അംഗങ്ങളും ഉള്പ്പെടുന്നതാണ് ഭരണസമിതി.
സിനിമ ഇന്ഡസ്ട്രിക്ക് വേണ്ടി ഒരുപാട് കാര്യങ്ങള് ചെയ്യാനുണ്ട്. ഒരുപാട് കാര്യങ്ങള് ചെയ്യണമെന്നുണ്ടെന്നും പ്രസിഡന്റ് ജി. സുരേഷ് കുമാര് പറഞ്ഞു. സംഘടനയുമായി ബന്ധപ്പെട്ട കാര്യങ്ങള് എല്ലാവരുമായി ആലോചിച്ചും ചര്ച്ച ചെയ്തു മാത്രമേ മുന്നോട്ടു പോകാന് കഴിയൂ എന്ന ഉത്തമ ബോധ്യം എനിക്കുണ്ട്. ഇക്കാര്യത്തില് എല്ലാവരുടെയും സപ്പോര്ട്ടും സഹായവും എനിക്ക് ആവശ്യമുണ്ട്. എല്ലാവരും ഒന്നിച്ചു നിന്നാല് മാത്രമേ നമുക്ക് ലഭ്യമാകേണ്ട ആനുകൂല്യങ്ങള് നേടിയെടുക്കാന് സാധിക്കൂ. എന്തിനെയും വിമര്ശിക്കുന്ന സമീപനത്തില് നിന്ന് മാറി അഭിപ്രായങ്ങള് തുറന്നു പറഞ്ഞു പോസിറ്റീവായ തീരുമാനങ്ങളെടുക്കാന് എല്ലാവരും സഹകരിക്കണം. നമ്മളെല്ലാം ഒരു കുടുംബത്തിലെ അംഗങ്ങള് ആണെന്ന ഉദ്ദേശത്തോടെ വേണം മുന്നോട്ടു പോകാനെന്നും ഗുരു കാരണവന്മാരെ സ്മരിച്ചു കൊണ്ട് ഫിലിം ചേംബറിന്റെ പ്രസിഡന്റ് പദവി ഏറ്റെടുക്കുക യാണെന്നും സുരേഷ് കുമാര് പറഞ്ഞു.
ഫിലിം ചേംബര് മുന് പ്രസിഡന്റ് വിജയകുമാര് സുരേഷ്കുമാറിന് ബൊക്കെ നല്കി പ്രസിഡന്റ് പദവി കൈമാറി. ജനറല് സെക്രട്ടറി ബി. ആര്. ജേക്കബ് യോഗത്തിന് നന്ദി പറഞ്ഞു.