സി എന്‍ എ-
കൊച്ചി:
ദുല്‍ഖര്‍ സല്‍മാന്‍ നായകനാകുന്ന 'കുറുപ്പ്' എന്ന സിനിമയിലെ പുതിയ പോസ്റ്റര്‍ പുറത്തിറങ്ങി. ഒരു പാന്‍ ഇന്ത്യ റിലീസ് ആയിട്ടാകും ചിത്രം പ്രദര്‍ശനത്തിന് എത്തുക. അഞ്ച് ഭാഷകളില്‍ ആണ് ചിത്രം റിലീസ് ചെയ്യിക. മലയാളത്തിന് പുറമെ തമിഴ്, ഹിന്ദി, തെലുഗ്, കന്നഡ ഭാഷകളില്‍ ആണ് ചിത്രം റിലീസ് ചെയ്യുക.
ദുല്‍ഖറിന്റെ ആദ്യ ചിത്രമായ 'സെക്കന്‍ഡ് ഷോ' സംവിധാനം ചെയ്ത ശ്രീനാഥ് രാജേന്ദ്രനാണ് 'കുറുപ്പ്' സംവിധാനം ചെയ്യുന്നത്.
വര്‍ഷങ്ങളായി കേരളം തിരയുന്ന കുപ്രസിദ്ധ പിടികിട്ടാപ്പുള്ളി സുകുമാര കുറുപ്പിന്റെ ജീവിതത്തെ ആസ്പദമാക്കി ഒരുക്കിയ ചിത്രമാണിത്. കേരളത്തിന്റെ ജുഡീഷ്യല്‍ ചരിത്രത്തിലെ ഏറ്റവും കാലം നിലനിന്ന ചാക്കോ വധക്കേസിലെ പ്രതിയാണ് സുകുമാര കുറുപ്പ്.
തന്നോട് രൂപ സാദൃശ്യമുള്ള ചാക്കോയെ കൊലപ്പെടുത്തി മൃതദേഹം കത്തിച്ച ശേഷം അത് താനാണെന്ന് വരുത്തി ഇന്‍ഷുറന്‍സ് തുക തട്ടിയെടുക്കാന്‍ സുകുമാര കുറുപ്പ് ശ്രമിച്ചെന്നാണ് കേസ്. ഒടുവില്‍ പൊലീസില്‍ നിന്ന് രക്ഷപ്പെടാന്‍ കുറുപ്പ് വിദേശത്തേക്ക് കടന്നുവെന്നാണ് കരുതപ്പെടുന്നത്.
സുകുമാര കുറുപ്പിനെ മഹത്വവല്‍ക്കരിക്കുന്ന തരത്തിലാകില്ല സിനിമയുടെ ചിത്രീകരണമെന്ന് അടുത്തിടെ ഒരു അഭിമുഖത്തില്‍ ദുല്‍ഖര്‍ വ്യക്തമാക്കിയിരുന്നു.
വേഫെയറര്‍ ഫിലിംസിന്റെയും എം സ്റ്റാര്‍ ഫിലിംസിന്റെയും ബാനറില്‍ ദുല്‍ഖര്‍ തന്നെയാണ് ചിത്രം നിര്‍മ്മിക്കുന്നത്.
ദുല്‍ഖറിന് പുറമെ ഇന്ദ്രജിത് സുകുമാരന്‍, സണ്ണി വെയ്ന്‍, ഷൈന്‍ ടോം ചാക്കോ തുടങ്ങിയവരും ചിത്രത്തില്‍ ഒരു പ്രധാന വേഷത്തിലെത്തുന്നുണ്ട്.
ജിഷ്ണു ശ്രീകുമാറും ജിതിന്‍ കെ ജോസും ചേര്‍ന്നാണ് ചിത്രത്തിന്റെ രചന നിര്‍വഹിച്ചത്. സ്‌ക്രീന്‍ പ്ലേയും സംഭാഷണങ്ങളും നിര്‍വഹിച്ചത് ഡാനിയേല്‍ സായൂജും കെ എസ് അരവിന്ദും ചേര്‍ന്നാണ്.
ഛായാഗ്രഹണം- നിമിഷ് രവി, സംഗീതം- സുഷിന്‍ ശ്യാം, ദേശീയ പുരസ്‌കാര ജേതാവ് വിനേഷ് ബംഗ്ലാനാണ് കലാസംവിധാനം.
ദുല്‍ഖറിന്റെ കരിയറിലെ ഏറ്റവും വലിയ ബജറ്റില്‍ ഒരുങ്ങിയ ചിത്രമായിരിക്കും ഇത്. ചിത്രം തിയറ്ററുകളില്‍ തന്നെ ആദ്യം എത്തിക്കുന്നതിനാണ് അണിയറ പ്രവര്‍ത്തകര്‍ ശ്രമിക്കുന്നത്.
